a39.1Iba 141.3, Kl 4.5, Ya 3.2
b39.4Iba 90.12
c39.5Iba 62.9, 90.4, 144.4

Psalms 39

Agali mbira ibuha genda yu howa bi lenego

I̱na bi lo wirugo ogo, a 
I̱nime bi ko loligo
mana berogobi baya hangu mamage howa bialu holebero.
Agali mana ko biaga i̱ koria kaware kangi
i̱na ti baba bi mbira nalolebero, larugoni.
I̱na i̱naga ne hariga ndibulo howa
bi mbira nale haru.
Bi bayalenaga lalubi mbira nale dege harugoni.
Anigoyu i̱ha genda timbuniore ngelo hene.
I̱na mini tumutumu bu harugoni.
I̱na mitangitangi bialu haabo hewagola
i̱naga miniha mo ko haiore hene.
Ai i̱na i̱naga ne hariga ndibu lowa ndo
i̱na bi lolebero manda biru.
I̱na Anduane Homogohondo hale halu lalu, b 
Anduane Homogo-o i̱naga holeneha i̱ mali agira agima holeberobe.
I̱ angi homoliyadabe.
I̱ dindini holene tubagi dege wiaruabe be ludabe
i̱ni langibe, laru.

I̱naga holene tigimandi hangu ngeledegonida. c 
Í̠naga deni i̱naga holene emene ogoni
nagaloneoredane hendede.
Wali agali bibahendenaga holene lu ndo
mbiralime ne harigaha buhe̱ halu mbira hangu latagi hagagobi dege nga.
Ni daragola ina mbiralinaga munini ale kama.
Dindini mbirale bayale wini ngaru mule biabe erekuibi bia bialu howa
bame nagalone bialu haga.
Iname mbirale dewaore mo mogo bialu kamagoyu
ái ibu holebirabe manda nabi kama.

Ai Anduane Homogo-o i̱na agilenaga mini dunubia ho holiyabe.
Í̠na hangu i̱ biamogo bibelo lowa
i̱na í̠nihondo mini dunubia ho kogoni.
Í̠na i̱ pele ngialu i̱na ko biruru domo wahabe.
Agali ko mini nawi ale karume
i̱ hondo oba halu mege bialu helo nahelabe.
I̱na i̱naga ne hariga ndibu lowa
bi mbira nale holebero.
Ogonaga irane i̱na tandaga uruni narogo
í̠nime i̱hondo ibilaridagonaga bi nalolebero.
10 Ainde i̱ lone nababe laro.
Í̠na i̱ pani ngirigome
ai homabeheore kogoni ndobe.
11 Wali agalime mana ko birarunaga í̠na pani mirili.
Bombome aga labolabo nalu budabaga biagadagua
í̠na inanaga mbirale hameledamaru mo wahai haga kegoni.
Heneneore larogo wali agali bibahendenaga ne harigaha buhe̱ halu mbira hangu
latagi hagagobi dege ka.

12 Anduane Homogo-o i̱naga bi larogo hale habe.
I̱na bi lalu kogoni baya hangu hale ho habe.
I̱na dugu bialu koria de iba ibirago hondowa
í̠na i̱ biamogo bibe.
I̱naga mamaliru ti nde dindi ogoria tigi mbira hangu halu homayadagua
i̱nibi nde dindi ogoria tigimandi hangu holeberogo
í̠ manda biaiho kegoni.
13 I̱ lone mo tandaga nahe
emene hangu nde i̱naga bu miniha dungulo holiya helabe laro.
Mani i̱ homalu nde dindi ogo wahalu poliyadago
ani helabe laro.
Copyright information for `HUI