a40.2Iba 27.5, 69.2, Yar 38.6, 38.10-13
b40.3Iba 32.7, 33.3, 64.9
c40.4Iba 84.12, 125.5
d40.5Iba 71.15, 139.17-18, Ais 55.8-9
e40.6Ais 1.11, Yar 6.20, Mai 6.6-8
f40.6-8Hi 10.5-7
g40.8Iba 37.31, 2 Ko 3.3
h40.10Iba 89.1, Ab 20.20, 20.27
i40.12Iba 18.5, 38.4, 65.3

Psalms 40

Anduane Homogonaga mini yaraga halu iba gana lenego ogo

Anduane Homogo ibugua i̱ biamogo bilonaga
i̱ mini dege dindi nahe ema nabi haru.
Ani hewaria nde
ibugua i̱na bi larugo hale halu biamogo biya.
I̱ gundu uli gibi hiriribiha pilo wiwaria a 
ibugua hale halu gililo miya.
Uli unuraore lumburaha homole yupe halu hewaria
ibugua i̱ gililo miya.
Ibugua i̱ gililo muwa ege to̱le̱ni mo heya ho helalu
i̱ yo pialu poliya ani biya.
Ibugua i̱na iba gana gahenge mbira b 
i̱nanaga Ngode Datagaliwabe kagonaga mini yaraga halu loliya lawai haya.
Ani biyaego hondowa wali agali dewaoreme mini wialu
ti Anduane Homogohondo mini mbiraore wulebira.

Wali agali Anduane Homogohondo mini mbiraore wuwa c 
mbirale tara gime wabiniru mitangi nahe
mbirale uruniale mitangi haga karume biagadagua nabiaga karu
ti turuho ka.
Anduane Homogo inanaga Ngode Datagaliwabe-o d 
í̠na inanaga mbirale dewaore gibi bia haga birigoni.
Í̠ aleore mende nahe manda bidama.
Iname bima lama hama polomadagonaga dewaore
í̠naga miniha magoyu kegoni.
Hama ibirimahayagibi walia hama ibirigoni.
Í̠na inanaga bia hama ibirigoni manda bialu howa
ina daga au loabe tobahe gibiore bia harigoni mandabu kama.

Ogoni bia harigonaga iname í̠hondo turu halu mbirale lomabu ngulenegobi e, f 
mbirale homa hende loma delagane dabuni bo delo ngulenegobi
uruni alego í̠ hame nalagayagoni.
Inanaga ko domabelo lowa mbirale mbira bo delo ngulenegobi
í̠ hame nalaga degeyagoni.
I̱na í̠naga bi larego hale halu buliyanaga
í̠na i̱naga hale kira wabuwa dugua ho heledegoni.
Í̠na ani bidego manda buwa i̱na buliya damenego
í̠naga mbuganimana lo ngegonidagua
i̱na bule kogoni laru.
I̱naga Ngode Datagaliwabe-o g 
i̱na í̠na hame ledegodaguaore bule turuho kogoni.
Í̠naga bi mana lo ngeru
i̱na i̱naga bu habaneha mo hengedogoni.

Anduane Homogo í̠naga wali agali mo ngoaiho bereagoria
i̱na ina kamaru pele ngiaga í̠ kego lalu
bi baya turubi ogoni ti hale hai helo lamiru.
I̱na bi ogoni dege lalu kone lairi naholeberogo í̠ manda bidegoni.
10 Anduane Homogo í̠na wali agali pele miaga kegonaga bi te h 
ogoniore i̱ni yu donge nahe lamiru.
Í̠na biamogo biaabo hariligonagabi
í̠ mini bilinahe kegonagabi wali agali lamiaabo haru.
Í̠naga wali agali bibahende mo ngoaiho bereagoria
Anduane Homogohanda ina handaya haho wiaabo halu
gubalini haho wiaabo haga ka lalu
i̱na yu donge nahe lamiaiore haru.

11 Anduane Homogo-o í̠na i̱ dara howa biamogo bulene nawi howa
dara howa biamogo biaabo hariligoni.
Ogoninaga biairi naholebeda lo manda bido.
Í̠naga gubalini holenemebi mini bilinahe holenemebi
i̱ yani ho wiaabo kegola
i̱ bayale karulapeore holoboda lo manda bido.

Ngode Datagaliwabehanda biamogo bilonaga bi lenego ogo

(Iba Gana 70)

12 Genda bulene tara tara dewaore i 
i̱ kogoria bu payabu ngagola kogoni.
Genda bulene dewaore wu mabu bupe kagola
i̱ dombeneha kogoni.
Genda bulene uruni daga aulole nalabehe dewaore ngagoni.
Mana ko i̱na bigi birurume
i̱ni bope henego kogoni.
I̱ni ko uruni birugome i̱ mininaga de au henego
mbirale bayuwa handabe nahe kogoni.
I̱na ko biruruni dagalabe nahe
i̱ninaga haguaneni mandari li bu karubi ndo gibiore birugoni.
I̱naga miniha hongo mbira naheore pirilipe ho wahenego kogoni.
13 Ani bidane kogo Anduane Homogo-o í̠na i̱ pele ngibe.
Áyu ogoniore i̱ mo wia.
14 Agali marume i̱ bo wahole manda bialu karu
í̠na ti bope halu tinaga miniha mo talola howa
mini burugulo helabelo hamelo kogoni.
I̱ genda timbuni yu kogo hondowa
wali agali maru ti turu haga ka.
Wali agali urunibi biaga karu
í̠na bo badai bialu tinaga mini ti taga ho helo
bope habelo hamelo ko.
15 Wali agali urunime i̱naga mini lahiralu i̱ mege biaga karuore
í̠na ti mo taga haho wiaabo habelo hameledo.
Í̠na ani berego handalu tini taga halu
tini mana bialu hayadago mitangi budai bilo
mo taga habelo hamelo kogoni.

16 Wali agali maru í̠ keria ibiraru
ti bibahende turuho helo hameledo.
Í̠na ti pele mirigonaga turu howa ka̱i̱ lalu karume
Anduane Homogo ibu gibi daligaore ka lai helo hameledo.

17 Anduane Homogo-o i̱ ko yagibanoni hongo naheore kogoni.
Í̠ ani kogonigoyu
í̠na i̱ embeda nahe mitangi bu kegoni.
Í̠ i̱naga Ngode Datagaliwabebi i̱naga pele ngiagabi kegonigo
i̱ pele ngule áyu ogoni abale ibabe laro.
Copyright information for `HUI