a41.1Min 14.21
b41.2Iba 27.12
c41.92 Sml 15.12, Iba 55.12-13, 55.20, Yar 20.10, Md 26.23, Mg 14.20, Lg 22.21, Yo 13.18

Psalms 41

Agali mbira warago bo wuwa Anduane Homogohondo bi lenego ogo

Yagibano karu mitangi bialu biamogo biaga karu a 
ti turubiore holebira.
Uruni tiha genda timbuni tagira ibirangi
Anduane Homogohanda ti biamogo bulebira.
Anduane Homogohanda ti biamogo bialu b 
handayaho holebira.
Ibugua ti dindini turu ho helo
baya hangu handayaho holebira.
Tinaga waitigi karume mo ko helo
ibugua ti yupe naholebira.
Wali agali uruni ti warago timbuni bo ngangi
Anduane Homogo ibugua handayaho haabo holebira.
Anduane Homogohanda ti warago bararu mo dabi halu
bayale helo mo hongo holebira.

I̱na bi ogodagua laru.
Anduane Homogo-o i̱na í̠hondo ko timbuniore birugoni.
I̱na ani birugo í̠na i̱ dara howa biamogo bialu
i̱ha warago timbuni ngago mo dabi habe.
I̱naga waitigi karume i̱hondo bi tandagabi lalu kagoni.
Tigua lalu, Ibu abale homa nabirago
ina embedaho wahami̱ya, laga bialu ka.
Agali i̱ warago bo ngoria de hondo ibirarume
dara hetingi howa hondo ibaga.
I̱ warago ko timbuni bo ngogonaga te hale holene hame laga.
Hale halu tagira puwa bibahendeha
i̱naga warago ogoninaga te loyogo laga.
I̱ handabe manga haga karume
i̱ warago ogoninaga hagarere bi lagalaga bialu haga.
Tigua mitangi bialu
ko timbuniore mbirame i̱ mo ko haragonida lo mitangi biaga.

Tigua lalu,
Warago ko tara mbirame minidagonigo
ibu lone heyulene nawi homolebira, laga bialu kagoni.
I̱naga nenegeore mbira henego c 
iya haru mandagi ibagabu halu
tomobi mandagi nalu biraga henego ogoni ibuguabi nde
i̱ handabe manga dege halu handa tara haya.

10 Anduane Homogo-o ainde í̠na i̱ dara howa biamogo bialu
i̱naga warago ngogo mo dabi habe.
I̱naga waitigi biarume i̱hondo biyarunaga pani
i̱na biadai buliya ani bibe.
11 Waitigi bu karume i̱ bope nahayagua nde
í̠na i̱ gubaliniore ho kedalo mandabu holebero.
12 I̱na mbirale beroru tigabi bialu koria de hondowa
í̠na i̱ biamogo bulebere.
I̱ í̠niha haparaho holiya
í̠na i̱ handayaho haabo holebere.

Anduane Homogo Isaraele wali agalinaga Ngode Datagaliwabe kago
ibunaga mini áyu ogoni yaraga holene nga. d 
Wali agali mani hama polobadarumebi
ani dege bialu haabo helo.
Aniore bilo laro.
13 

MBUGA MENDE

(Iba Gana 42-72)

Copyright information for `HUI