a44.1Har 12.26-27, Iba 78.3
b44.2Iba 78.55, 80.8
c44.3Man 8.17, Yos 24.12
d44.6Iba 33.16, Hos 1.7
e44.18Yob 23.11
f44.19Iba 23.4
g44.21Iba 139.1, Yar 17.10
h44.22Lm 8.36
i44.23Iba 35.23, 78.65

Psalms 44

Isaraele wali agalime ti biamogo bia lalu Ngode Datagaliwabehondo bi lenego ogo

Ngode Datagaliwabe-o í̠na biabe hongoheore bialu harigo
inanaga haleme hale harimagoni. a 
Ina mamali ala dindini heneyarume bamba heneyangi
í̠ni binigo te inahondo langiya.
Í̠na dindi aba ala ogoria hene hearu bo taliatagi halu b 
inanaga mamaliru dindi ogoriani haru íbu helariya.
Wali agali tara tara bu hearume biyagonaga í̠na ti pani mialu
inanaga mamaliru biamogo bialu mo dewa halu bayale helo helariya.
Inanaga mamaliru tigua wai bialu howa
tininaga wai biaganeme dindi ogo karulene ndo. c 
Tininaga hongome wai buwa wayali hene ndoore.
Í̠nime ti gubalini ho howa
í̠naga wá holene helarigomebi
í̠naga hongoni howa ti wayali ho hene.

I̱naga Kinibi i̱naga Ngode Datagaliwabebi í̠ore kegoni.
Í̠nime bi ledegola Yagabanaga hameigini karume wai bialu wayali haga.
Í̠naga hongoni howa iname waitigi bu karu bo batagitagi beramali.
Ina í̠naga minini howa waitigi bope halu wayali haramali.
I̱naga danda timu yandareru wia ngogo d 
urunime i̱na wai bialu wayali harodalo manda nabiore kogoni.
Wai bialu ayu tibu yu ha kogonigo
ogonimebi i̱ wayali holiyanaga biamogo nabiaga manda bidogoni.
Mbirale urunime ndo í̠na ina biamogo birigola
waitigi bope harima.
Waitigime ina handabe manga ho hearia
í̠na ti bope haga bialu mo taga harigoni.
I̱name Ngode Datagaliwabe í̠ninaga mini dege yaraga halu
í̠na birigonaga ka̱i̱ lalu haabo holeberema.

Ani birigoyu ai í̠na ina mo nagalone halu erembira ngirigoni.
Inanaga ami agaliru heba í̠ wai nape.
Anidagua bialu kego irane aginagabe.
10 Í̠na ogonidagua birigome inanaga waitigiru ibiyagola
ina ibida pirimagoni.
Ibida pirimagola tigua inanaga mbirale wimaru
mo yalu piai haya.
11 Tigua nogo sibi bo wahagadagua
ina bo homelelo ale helarigoni.
Inane dindini hemaria í̠na ina bo taliatagi halu
wali agali dindi tara tarani bu hearu
ti dege dombeneha hama pelarigoni ndobe.
12 Í̠naga wali agali biaru wali agali dindi tara tarani bu hearunaga garabaya biabe ale bialu helo pelarigoni.
Dindi tarani hearu tigua í̠ yolo emene hangu bigi biyagome
í̠na muni timbuni namo yi kegoni.

13 Í̠na ogonidagua birigola
wali agali ina baba mandagi haga karume
ina hondo mege bialu ka.
Wali agali bu hama pedarume inahondo oba haga birago
í̠na ina mo taga helo birigoni.
14 Í̠na wali agali dindi tara taraha karu mo heya harigola
tigua ina mini lalu mo taga halu ka.
Inaha mbirale mbira biragola
tigua ina hondo oba halu kagoni.
15 Agalime i̱hondo mege bialu bi koru lalu kagola
i̱ tagabi howa handa dindi ho kogoni.
I̱naga waitigirubi agali i̱ handabe manga haga karubi
i̱na ti handarodagua i̱naga miniha mo ko halu
i̱ taga timbuni ho kogoni ndobe.

17 Ngode Datagaliwabe-o iname í̠ embeda nahe howa
í̠naga habo nalolene bi lowini biagobi
mo habo nale kama.
Ani birimagola mbirale genda uruni inaha anda ibiragoni.
18 Iname í̠ erembira ngialu pu nabi e 
í̠naga harigani polenegobi yu wanahe kamagoni ndobe.
19 Ina ani bialu kamagoyu í̠na ina gabua tara tara haga ngagoha helowa f 
arumaha homolene ngagoria helaridagoni.

20 Iname inanaga Ngode Datagaliwabe kago erembira mialu puwa g 
mbirale gime wabini ngaruhondo bi pupu wialu henedale nde
í̠nime manda bidele.
Ina bu kamarunaga miniha wia do hene ngamaru bibahende
í̠ni manda biai ho kegonigo í̠ ani manda bidele.
22 Ina í̠ninaga wali agaliore kamagonaga h 
tigua ina bo wahalu haabo kagoni.
Tigua ina handalu karia
nogo sibi ale dege bo waholene ale kamaria hendedagoni.

23 Anduane Homogo-o í̠ abale heyabe.
Aguanaga paliahondo kebe.
Ina wahalu erembira ngialu puabo nahabe. i 
24 Irane aginaga ha do ho kebe.
Agali bu karume ina mo ko haragola
ina tandaga timbuni halu genda dewaore yu kamago embeda nahabe.

25 Ina dindini pilo ibira halu
inanaga tingini homene ale dindi himuni wima pedemagoni ndobe.
26 Ngode Datagaliwabe-o abale heyalu
ina biamogo bule ibabe.
Í̠naga gubalini haabo holene ngegome ina mitangi bialu
ina homoligo abale pele ngibe laro.
Copyright information for `HUI