a48.2Md 5.35
b48.6Har 15.15, Hos 13.13
c48.14Ais 58.11

Psalms 48

Saiono tano Ngode Datagaliwabenaga winigo ogo

Anduane Homogo ibu mini leneore kagonigo
ibunaga mini yaraga holene nga.
Ngode Datagaliwabenaga tano ngagoria anda puwa
ibunaga hari loma bia hene ngagoria
ibunaga mini yaraga hami̱ya.
Ngode Datagaliwabenaga hari loma bia hene ogoni a 
daliga timbuniore bayale nga.
Dindi abene uyurahayagi Saiono tano ogoni kini dunini kagonaga ngago lalu
wali agali dindi bibahendeha karume turu timbuni ho kagoni.
Ngode Datagaliwabenaga tano ogoniha wai anda ibiragola
ibugua wali agali ibu heba haga karu abale biamogo bialu
ti bayale haga ka.

Bamba kini tara tara bu hearume mo mogo bialu
Saiono tanoha hearu baba wai bule ibiya.
Ti ibalu tano biago de hondowa mogolo handaya.
Mogolo hondowa gi halu ibida pugupugu biai haya.
Ti mogo timbuni lalu walime gali taba honole b 
tandaga timbuniore hagagobi hayagoni.
Puyabu timbuniore ni tagira ibiragohayagi howa ibiragome
Tasisi tanonaga iba sibi timbuni bu ngaru bo gingirulo wahai hagadagua
Ngode Datagaliwabe ibugua waitigi uruni bo amo lai hayagoni.

Ngode Datagaliwabehanda bamba biniyago
ina haleme hale ho harimagoni.
Anduane Homogo Hongo Haiheore kagome
ibuninaga tanoha mbirale uruni biniyago
ai ina deme handai harima.
Ibugua ibunaga tano ogoni mo hongo haragome
bayale wiaabo holebira.

Ngode Datagaliwabe-o ina í̠naga andaha biruwa
í̠naga gubalini haabo holene mana ngego mitangi bialu bedema.
10 Wali agali dindi bibahendeha bu karume
í̠naga mini yaraga halu kagoni.
Í̠ mini leneore kegonaga dindi bibahendeha
wali agali karume loyogo leda.
Í̠na í̠naga mana tigabi ngegome
wali agali bu karu handayaho haga kegoni.
11 Hari Saiononi wali agali bu karu
ti bibahende turu hai helo helabe.
Wali agali tinime mana biragobi
í̠na tigatiga ngadaguaore mo tale biaga kegoni.
Yuda dindiha tano ngaruha karu ti bibahende turu hai helo helabe.

12 Ngode Datagaliwabenaga wali agaliru
tígua Hari Saiono kagoria tanonaga ege pabe kadagua pu mabu bilimu.
Pu mabu bialu pabe daligani mamagealinaga anda lu bima iraga halu bu heledaru
bibahende dagalai halimu.
13 Tígua Saiononaga ege pabe kagobi anda hongohe bu karubi
bayuwa handa kia bu helalimu.
Wali agali mani holobadaru te lamulenaga baya hanguore handalimu.
14 Tígua mani holobadaruhondo ogodagua lamilimu. c 
Ngode Datagaliwabe ibu inanagaore kagoni.
Ibu inanaga Ngode Datagaliwabeore haluhe haabo holebira.
Horo bibahendengi ibugua bamba halu
ina hariga poloma̱yago walia halu
haaboboore holebira, lalu lamilimu.
Copyright information for `HUI