a49.5-6Yob 31.24, Iba 52.7, Mg 10.24
b49.7Yob 36.18-19
c49.8-9Iba 16.10, 22.29, 89.48
d49.15Iba 16.10-11, 73.24, Hos 13.14
e49.17Iba 17.14, 1 Ti 6.7

Psalms 49

Wali agali munihabi dabudabuhabi minipe karu ti mini nawi kago ogo

Wali agali bibahendeme bi o larogo hale halimu.
Tí wali agali dindini bu kamiru bibahendeoreme
i̱na bi larogo hale hole hale miaho halimu.
Wali agali timbuni mini lenebi mini nalenebi
homogobi yagibanobi tí bibahendeme
i̱na bi o larogo baya hanguore hale halimu.
I̱naga bu miniha mitangi bulene bayale hangu palu to̱ledago.
I̱na mini gigabiwi holenenaga bi loleberogo
ogoni tí wále helonaga lolebero.
I̱na pigane bi yobage lowa ala lolebero.
Lalu howa ngida balu iba ganabi lalu
bi yobage larugonaga irane mo walia halu langulebero.

Mbirale gibi hiriribi wigi bidangi a 
i̱ gi naharuli.
Waitigime i̱ bole lowa hoyu mabu biyaguabi
i̱ gi naharuli.
Agali ko biaga karume dindi dabudabu dewa wuwa mine halu lalu,
Ai homogo karulapeore kogoda, lowa
dindi dabudabu urunini hanaho howa
tininaga mini mo yaraga haga karume
i̱ bole manda biaga ka.
Ti ani bialu kago helowa i̱ ti hondowa gi naharuli.
Mbirali mbirame ibuninaga holenego munime yolo bibe nahe ngagoni manda bidama. b 
Ibugua muni wiyadagome Ngode Datagaliwabehondo
i̱ nahome holego í̠ muni ngerogo
labe nahe ka manda bidama.
Ani nabibeheore nga.
Ani bibe nahedagoni irane c 
wali agalinaga holene buhe̱naga yolo gibi daligaorene daligago
yolo bibe naheore nga.
Ibugua Ngode Datagaliwabe yolo mule manda bulubadagoni nakarulapeore holebira.
Ibu homa nabi dére haaboore holego lalu
Ngode Datagaliwabe munime yolo nabibeheore holebira.

10 Wali agali mbirale mandabi mini gigabiwi karubi
homaga birane hendedama.
Mini nawibi lulu alebi bibahende homa dege birane hendedama.
Tigua mbirale dindini howa ilu wialu hayaruni
tinaga aguanene holebiraru ti helo ngelalu
tini homaga birane hendedamagoni.
11 Ala dindini hayangi tininaga dindini hayagonigo
ai homalu pialu howa tinaga dindi anda tene homali biago bu hinalu
homali biagoniha haaboore holebira.
12 Mbirali mini lene timbuni heneyaguabi
homa anda ibidangi yo pialu pobe nahe holebira.
Ani nabibeheore nga.
Homa anda ibidangi nogo biango homagadagua homolebira.

13 Wali agali tini hangu howa karulape kama manda bialu karu
tihondo agi birabe handami̱ya.
Tininaga mbirale ngagoria mini hanaho karu homolebirago de handami̱ya.
14 Wali agali urunibi karu ti nogo sibi homagadagua homalu
Homa ibu tinaga haru haga haguane holebira.
Ti homaragola tinaga tingini abale togo bialu
tinaga dindi haraligo yu wahalu
tinaga dinini kaundiaore humbirini andaha polebira.
Anidagua bigi birago hondowa
wali agali mini tigabiwi karu ti turu halu holene nga.
15 Anigo Ngode Datagaliwabehanda i̱ gini mulebira. d 
Ibugua homolenenaga hongome i̱ yani nahelo
pele ngulebira.

16 Wali agali mbirali ibunaga dabudabu dewa wiatago halu ibu homogo hayagua
ogonidagua biragonaga í̠ mini dege dindi ho nahabe.
17 Ibu homalu ibunaga mbirale wiyadaruni e 
ibuni yalu napolebira.
Dabudabu ilu wiyadarume
tinaga anduane homaliha anda poradagua
tibi homaliha dege anda porama nalolebira.
18 Ibu dindini kangi ibu turu howa dungulo kayaguabi
ibu erekui biabe bialu mbirale dewa mo wiragola
marume ibunaga mini yaraga halu ibu bayaore awadaga handalu kayaguabi
19 mbirali homogo ogoni ibubi homalu
ibunaga mama mamali ala homalu peneru aruma haho wiaabo hagaha kadagua
ibunibi ogoniha dege pu holebira.
20 Mbirali mini lene timbuni heneyaguabi
homa anda ibidangi yo pialu ibida pobe nahe holebira.
Ani nabibeheore nga.
Homa anda ibidangi nogo biango homagadagua dege homolebira.
Copyright information for `HUI