a50.6Iba 75.7, 97.6
b50.12Iba 24.1, 1 Ko 10.26
c50.15Iba 91.15, 107.6, 107.13, 107.19, Seg 13.9
d50.17Neh 9.26, Lm 2.21-22
e50.21Iba 90.8, Ais 55.8-9, 57.11, Lm 2.4
f50.23Iba 27.6

Psalms 50

Ngode Datagaliwabehanda wali agali dabaki bulebirago ogo

Ngode Datagaliwabe Hongo Haiheore Anduane Homogo kago
ibugua bi laragoni.
Wali agali ni tagira ibiragohayagi karubi
ni paliragohayagi karubi dindi bibahendeha
ibugua ti olalu kagoni.
Ngode Datagaliwabe ibu Saiono tano dunini dindi bayaleoreni howa
ibugua ibunaga wá holene taraore biago
wá haame halu kagoni.

Inanaga Ngode Datagaliwabe o ibaruagoni.
Ibu ebero lalu panigi ibaruagoni.
Mbirale ngaru dai helonaga ira dene ala bamba halu
puyabu timbuni iba dalu dindi guni heba
ibuha ho mabu bialu ibarua.
Ibugua dindibi hari daligabi olowa
libuhondo lamialu lalu,
I̱naga wali agalime bialu hayarunaga dabaki berogo
hondole ibidaba, laruagoni.
Ngode Datagaliwabehanda lalu,
I̱naga wali agali i̱nihondo mini mbiraorewi karu
tigua i̱hondo nogo bo lomabu delalu howa
i̱nila habo nalolene bi lo wiyaru
ti i̱ni heba mandagi holoma̱ya mo mogo bialu ibidaba, laruagoni.
Hari daligame latagi halu lalu, a 
Ngode Datagaliwabe ibu tigabiore ka.
Ibugua tigatiga dabaki biaga ka leda.

Ngode Datagaliwabehanda lalu,

I̱naga wali agali bu kamiru-o
bi loleberogo bayuwa hale halimu.
Isaraele wali agaliru-o
i̱na tíhondo bi lolene yidogo
tígua ko birimiru latagi holebero.
I̱ni hangu Ngode Datagaliwabe howa
tínaga Ngode Datagaliwabeore kogoni.
I̱na tígua lomabu yalu ibirimigonaga ndo dago bero.
Horo bibahendengi tígua loma irani dai helaga bialu kamigoni
i̱nime de hondo kogoni.
I̱na tínaga nogo pabeha nogo bulumaga memeru wangabe kago
i̱ yamulenego burupalia nabi kogoni.
10 Nogo gabua irabuha haga karubi
dindi hari daosini dewaore daga labe nahe ngaruha nogo bulumaga karubi
bibahendeore i̱ninaga kago ndobe.
11 Ega gabua bedaru bibahendebi
dindi bibahendeni ema bialu piaga bedarubi
uruni bibahende ininagaore beda.

12 I̱ tomo garibilo koyagua b 
tíhondo mbira ngi nalolebero.
Dindi bibahende ngagobi ogoniha wini ngarubi
bibahende i̱ninagaore wiai ka.
13 I̱ bulumaga wangabenaga mbirini naga kobe
be nogo memenaga darama naga kobe.
Uruni ale i̱ nanagaore ndobe.
14 Tígua i̱hondo ka̱i̱ore lalu lolene nga.
Uruniale tígua i̱nihondo lomabu ngulene karulape nga.
Ngode Datagaliwabe Daligaorene Daliga kogo
i̱nihondo mbirale mbira ngule lalubi lo wirimigo damene
nguleneore ngagoni.
15 Tígua tíniha genda tagira ibirangi c 
i̱ni abale olalimu.
Olaramigola i̱na hale halu tí biamogo bulebero.
I̱na tí biamogo berogola
tígua i̱naga mini yaraga halu holeberemi, lalu layagoni.

16 Ngode Datagaliwabehanda wali agali mana ko biaga karuhondo bi ogodagua laragoni.
Tígua i̱naga mana lo wini ngoru bame lo payapaya bialu
habo nalolene bi lo ngagonaga tebi lalu kamigo aginaga laramibe.
17 I̱na tí mo tiga buliya ha nabi d 
tígua i̱naga bi mo wahalu haabo kamigoni.
18 Tígua agali page biaga karu lola howa
abale mo nenege haga kami.
Wali agali kayu yama ibaga biaga karu baba
mandagi ibagabu haga kami.

19 Tígua ne harigaha howa ke̱ holene lalu
bi ko dege lalu haabo haga kamigoni ndobe.
20 Tí damene bu karu baba godi lalu
tí ai̱ya igini bameore mege bialu kamigoni.
21 Tígua anidagua bialu kamigonaga e 
i̱na bi mbira nale harugoni ndobe.
I̱ ani hewagola tígua mandabu handalu hemiria
i̱ nde tí ale dege kabe toba harimi.
Ani birimigonaga i̱na tí dago berogoni.
I̱na tí panigi handalimulo ko birimiru latagi holebero.

22 Wali agali i̱hondo erembira ngiaga kamiru
tí bi o larogo hale hadaba.
Tígua hale naharimiyagua nde tíha mo ko holene anda ibiragola
tí biamogo bulene mbirali naholebiraore.
23 Mbiralime i̱hondo ka̱i̱ lalu lomabu ngialu kago f 
ibugua i̱naga mini yaraga halu haga kagoni.
Wali agali i̱naga bi hale halu i̱ andaneha haga karu
ti i̱na pele mulebero, laragoni.
Copyright information for `HUI