a51.1-192 Sml 12.1-15
b51.1Iba 109.26, Ais 43.25, Ab 3.19, Kl 2.14
c51.2Ais 1.16, Yar 4.14, Hi 9.14
d51.3Ais 59.12
e51.42 Sml 12.13, Lg 15.21, Lm 3.4
f51.5Yob 15.14, Eb 2.3
g51.6Iba 15.2, Min 2.6, Ya 1.5
h51.7Dag 19.18, Ais 1.18, Hi 9.19
i51.8Iba 35.10, Ais 35.10, Yol 1.16
j51.9Yar 16.17
k51.10Iba 78.37, Md 5.8, Ab 15.9, Eb 2.10
l51.112 Kin 13.23, Ais 63.10-11, Yar 7.15
m51.12Iba 13.5
n51.13Iba 22.27, Ab 9.21-22
o51.142 Sml 12.9, Iba 35.28, 71.15
p51.15Har 4.15, Iba 9.14
q51.16Iba 40.6
r51.17Iba 34.18

Psalms 51

Ko binigo domo wahelonaga Ngode Datagaliwabehondo bi lenego ogo

Ngode Datagaliwabe-o gubalini haho wiaabo haga kego a, b 
í̠na i̱ore dara howa biamogo bibe.
Í̠na wali agali dara nahabeheorego dara hagayagodago
i̱ dara halu ko biruru domo wahabe.
I̱na ko biruru bibahende domo wahalu c 
i̱ dodo nahe helabe.

Ko ngubiore birulo manda bialu d 
miniha tagaore biaabo haragola haruli.
I̱na ko biruruni í̠hondo birugoni. e 
Mendealihondo biru lole ndo í̠hondoore birugoni.
Í̠naga deni ko ngubiore birugoni.
Ani birugonaga í̠na i̱hondo i̱ mana pugualu
ko birigo pani nolene nga larego nde
tigatiga labehedaguaore larego
i̱ balolene henge nawiore manda bido.
I̱ pigane i̱ ai̱yahanda taba hanayangi howa f 
ko hangu bialu haho winigo áyubi bialu dege kogoni.
I̱ ai̱yanaga tombeha biruwabi mini kowi dege biraru.

Í̠na henene hangu lagabi
miniha ko do nahebi kago hondowa turu haga kegoni. g 
Ani biaga kego í̠naga mini giga buleneme
i̱naga miniha to̱lotagi helabe.
Dodo nahe holiya ko biruru domo wahabe. h 
Bu miniha peweleore holiya i̱ wayawaya bia habe.
Bi baya turubiru halu mbira hale holiyanaga henge ngialu i 
i̱na ko biruru domo wahabe.
Í̠na i̱ hengedo mbaralo wahalu
i̱naga kuniru minu bu̱ larigoyu
i̱ lone heyalu turuho holebero.
I̱na ko ngubi biruruni í̠ de handa tara howa j 
í̠na bibahendeore domo wahai habe.

10 Ngode Datagaliwabe-o i̱naga bu habaneha mini gahenge wabu wia habe. k 
Í̠naga bi larego hale halu bua holenego gahenge i̱ha wabu wia habe.
11 Í̠na i̱ kodago wahalu pu lowa bo batagi holeni. l 
Í̠naga Dinini tigabi i̱ha heledego tagira peloleni.
12 Pele ngini kogoni manda buwa turu ho haruligo m 
turu biagoni ereba hayago lone ngiadai bibe.
Bi larego hale halu biaga holiya biamogo bibe.
13 Ani beregola i̱na ko biaga karuhondo n 
í̠naga bi lo ngedagua tihondo lawai holiya.
Lawai harogola hale halu
tigua í̠ni keria dai bulebirago bilo.

14 I̱na ko birurunaga homolenego hame naledogo o 
Ngode Datagaliwabe-o i̱ pele ngibe.
Ani beregola i̱na turu halu
í̠ tigabi biaga ke lalu wali agali bi mana lamuliya.
15 I̱na í̠naga bi mana loliyabi
Anduane Homogo í̠nime lamogo bibe. p 
Ani berego handalu i̱na í̠naga mini mo yaraga holebero.

16 Í̠na mbirale bo lomabu ngilo hame lagadale
i̱na bo lomabu ngidolego q 
ai í̠ hame nalagayago.
Mbirale ngabi í̠ nga habelo lowa
bo lomabu delaga dabuni delarogomebi
í̠ mo turu nahagaya.
Aniyagodago i̱na í̠hondo loma ngiradagua i̱ni í̠hondo ngerogoni.
17 Ngode Datagaliwabe-o í̠naga bi larego hale halu biaore bule lalu r 
i̱ni áyu ngerogoni.
I̱ni mo yadindi halu bu mini henene beregedalu i̱ni ngerogola
í̠na nayamia nabulebere manda buwa áyu ngerogoni.

18 Ngode Datagaliwabe-o Saiono tano podope hayadago
wali agali karu dara halu biamogo bibe.
Yarusaleme wai pabe biago podo bagabu ibira ho ngago
waitigi anda ibuligo
í̠na ege pabe ogoni lone biadai bibe.
19 Anidagua bu howa mbirale bo lomabu ngulene ngadagua ngirimayaguabi
mbirale bo lomabu delaga dabuni delarimayaguabi
í̠ turu holebere.
Nogo bulumaga wangaberubi í̠naga bo lomabu delaga dabuni bo deloleberema.
Copyright information for `HUI