a53.1Iba 10.4, 14.1
b53.1-3Lm 3.10-12
c53.22 Bit 15.2, 19.3, Iba 33.13

Psalms 53

Wali agali mini kowinaga mana ogo

(Iba Gana 14)

Wali agali mitangi yole biaga karume a, b 
tini miniha mandabu donge halu
Ngode Datagaliwabe ogoni nahe laga ka.
Wali agali mini urunibi wu karuni
tini ko ngubi habane nabuleneore howa
ko tara tara ngaru bima polenaga ani lalu ka.
Mana tigabi hangu biaga mbirali naheore.

Ngode Datagaliwabehanda dahuliya andaga howa handadali halu c 
wali agali bibahende bu karu de handai howa
mbirali miniwi galone manda biagabi
Ngode Datagaliwabe kalo manda bu hagabi
au haga bidabe hondole handadali ho ka.
Ani handalu hearia mbirali naheore
ti bibahende ko biai hene ogobi dege dege hoyu pearia hendeda.
Hariga tigatiga polene wiadagua pene mbirali naheore
bibahende putagi halu piai hene dege hearia hendene.
Mana tigabi hangu biaga mbira naheore.
Mbiraorebi mbira naheoreya.

Ngode Datagaliwabehanda lalu,
Wali agali ko biaga uruni ti mini nawidabe.
Ti galone mbira manda nabiagadabe.
Wali agali ko biaga urunime
i̱naga wali agali bameore ti tomo naradagua budu nalu kagoni.
Ani bialu howa tigua i̱hondo bi mbira nalagaore kagoni, laragoni.

Ani bialu ha kagoyu Ngode Datagaliwabe ibugua
ti mo gi timbuni taraore holebira.
Abale ti gi ogonibi nahenedagua gi ho helo
irane ibugua tínaga waitigi karu bo wahai halu
tinaga kuni dindini hora nahe bu payapayabu ngelolebira.
Ibugua wali agali uruni ti erembira miai hayagome
ai ti mo ko howa bo wahai holebira.

I̱na Isaraele wali agali bibahende pele ngialu haru dai biai helo
Ngode Datagaliwabehanda mbirali Saiono howa ibi nalara.
Ngode Datagaliwabe ibugua ibunaga wali agali biamogo biragola
ti bayuwa ho dungulo halu
tigua mbirale bigi biraru bayale hangu haga birago hondowa
tini turuore au holobadabe.
Copyright information for `HUI