a54.1-71 Sml 23.19, 26.1
b54.7Iba 59.10

Psalms 54

Mbiralime Ngode Datagaliwabehanda biamogo bilonaga bi lenego ogo

Ngode Datagaliwabe-o í̠naga hongome a 
i̱ pele ngialu gi mibe.
Í̠naga hongo timbunihe kegome
i̱ golope hene holiya golope habe.
Ngode Datagaliwabe-o í̠na i̱naga bi larogo hale habe.
I̱na bi larogo hale habelo hame ledogoni.
Agali minehe karu tigua i̱la wai bule íbu kagoni ndobe.
Agali uruni ti wali agali maru bo wahole hamelo kagoni.
Agali ko biaga uruni tigua Ngode Datagaliwabe
í̠ nagalonedalo manda biaga kagoni.

Ngode Datagaliwabe ibunime i̱ biamogo biagaore kagoni ndobe.
Anduane Homogo ibunime i̱ mo wialu
hotali wiagane humbi ale haradagua biaga kagoni.
Ngode Datagaliwabehanda i̱naga waitigirume mana ko i̱hondo bialu hayaru
tiniha daibu wiai helo.
Ngode Datagaliwabe í̠ mini bilinahe kegome
i̱naga waitigi karuni bo wahai habe.

Anduane Homogo-o i̱na í̠hondo turu howa
mbirale ngoru lomabu ngule kogoni.
Í̠ bayaleore kegonaga i̱na ka̱i̱ timbuniore larogoni.
I̱ha genda timbuni anda ibiyagola b 
í̠na i̱ biamogo bialu harigoni.
Í̠na i̱naga waitigi hearu bo waharigo
i̱ de handarugoni.
Copyright information for `HUI