a58.8Yob 3.16
b58.11Iba 67.4, 92.7

Psalms 58

Ko biaga karu pani mibe lalu Ngode Datagaliwabehondo bi lenego ogo

Agali haguane bu kamiru-o tígua godi hale halu howa
bi tigabi lolene ngadagua laramilibe.
Tígua wali agali bibahende tigatiga dabaki biaga kamibe.
Ani ndoore. Tínaga miniha ko bulene hangu wu to̱latagi ho kamigoni ndobe.
Tígua dindi bibahendeha wali agali bu karu homelo
bo wahaga biaga kamigoni.

Mini kowi karume dindini ibagabu kangi
ko dege biaabo haga kagoni.
Ti ai̱yahanda ti taba hanayangi howa
ke̱ dege halu henego áyubi anidagua dege bialu haabo ka.
Tinaga bi larago damene bibahende nogombi taranaga tomia ale ka.
Tinaga hale tuluho wahene nogombi ale howa
bi larago mbira hale habe nahe ka.
Agali maru manda timbunibi karume
nogombi heyalu mali lilonaga iba gana laragola
nogombime hale nahagadagua ko biaga uruni ti hale nahaga ka.
Agali manda timbunibirume nogombi heyalu mali lilonaga pilipe laragola hale nahagdagua
agali uruni ti hale nahagaore ka.

Ngode Datagaliwabe-o agali ko uruni bo wahai habe.
Anduane Homogo-o agali uruni ti laiono gabua kebahe agali hayaga ale kago
tinaga ne bo gingirulo baga bialu ne bibahende dugu wahai habe.
Iba dindini ibira haragola abale yo bialu ereba hagadagua
agali ko uruni ereba hai helabe.
Datani gahenge harigani anda harago geme hengedaragola gaulai hagadagua
agali ko uruni bo hengedai habe.
Gangade dindiha biralu homaragola ngu biagadaguabi a 
waneigini gali ai̱ya tombeha bedaore homenego
taba hanaragola wá nahende
arumaha dege biralu homaraligobi
agali ko uruni homai helabe.
Agalime ira emene karu dibu waharadagua
Ngode Datagaliwabehanda agali ko uruni abale bo wahai holebira.
Ti homa nabi kaore
Ngode Datagaliwabehanda tihondo keba timbuni halu
durumbu hilo waharadagua bulebira.

10 Ngode Datagaliwabehanda ko biaga karu bo waharangi
mini tigabi karume turu timbuniore ho holebira.
Turu howa tigua ko biaga uruninaga daramame
tininaga ge wayawaya bulebira.
11 Wali agali bu karume lalu, b 
Heneneore Ngode Datagaliwabehanda
wali agali mini tigabi howa bayale biaga karuhondo bayale dege biaga ka.
Heneneore Ngode Datagaliwabe kago ibuguaore
wali agali godini howa manani tigatiga dabaga ka, lolebira.
Copyright information for `HUI