a59.1-17 Het1 Sml 19.11
b59.9Iba 9.9, 18.17
c59.162 Sml 22.3, Iba 46.1, 88.13
d59.17Iba 59.9-10

Psalms 59

Waitigime mo ko nahelonaga Ngode Datagaliwabehondo bi lenego ogo

I̱naga Ngode Datagaliwabe-o waitigi karunaga giha howa a 
i̱ mo wialu biamogo bibe.
Tigua i̱ bo wanahelo
í̠na i̱ baya hangu handayaho habe.
Agali ko karume i̱hondo ko nabilo
í̠na i̱ biamogo bialu mo wibe.
Ti darama hangu noa haga karunaga giha howa
i̱ gingila mialu mo wibe.

Agali uruni tigua i̱ bo wahole bira do haga bidagoni de handa.
I̱na ko mbira birugonaga ndo tigua i̱la bame wai bule kagoni.
Anduane Homogo-o i̱na ko mbira nabi biako henebi nawi kogoyu
tigua i̱la wai bialu bo waholeore abale íbu hapara ho kagoni.

Anduane Homogo Hongo Haiheore Ngode Datagaliwabe-o
í̠na i̱ biamogo bule abale ibabe.
Í̠ Isaraele wali agalirunaga Ngode Datagaliwabeore kego
í̠na agali o karu de handabe.
Í̠ni abale ibalu agali bu karuni pani mibe.
Í̠na ti dara holeni nahabe.
Wali agali mana bayale bule kama lalu ha howa
tigua mana ko bule mitangi bialu kago manda bibe.

Mbiraga agali uruni tigua tanoha dai bialu
wai pabe gibuni gibuni ibagabu howa
biangome gi̱gau̱ laradagua lama ibagabu ka.
Uruni tigua bi ko lalu mege biraru hale habe.
Tinaga bi nehe howa wai biaga ayu tibu ale laga ka.
Tigua bi ko laga bialu,
Iname bi laramago aiwa hale holebirabe, lalu ka.

Anigo Anduane Homogo-o í̠na ti hondowa oba haga ke.
Dindi tara taranaga hameigini bibahende karu
í̠na ti mege biai haga kegoni.
Í̠na hangu i̱ mo hongo halu handayaho haga kegoni. b 
Ngode Datagaliwabe-o í̠ni kegoha ibalu i̱ bira do haruli.
10 I̱naga Ngode Datagaliwabe ibunime i̱ gubalini timbuni ho howa
ibugua i̱ biamogo bule ibulebira.
Ibugua i̱naga waitigi karu bope halu howa
i̱ni de hondoliya walia holebira.

11 Ngode Datagaliwabe-o i̱naga wali agalirume mbirale uruni embedaho waholigo
waitigi biaru homelo bo waholene nakarulapeda.
Anduane Homogo-o í̠ ina wali agali haru haga kego
í̠naga hongome waitigi bu karu bo waratagi halu bope hai habe.
12 Tigua mana ko bulene hangu mo tene halu
tinaga ne hambuni howa bi ko dege lalu haabo haga kagoni ndobe.
Tigua í̠naga mini mo ko howa bi ko ngaru lalu
ke̱ howa bi dewa lalu haga kagonaga
í̠na ti mine halu kagoria tini pani nelo ngelabe.
13 Í̠na bi ko laga karunihondo keba howa
ti bo waholene karulape nga.
Agali ko uruni bo wahaiore habe.
Anidagua beregola wali agali bu karu bibahendeme manda bialu
Ngode Datagaliwabe í̠nioreme Isaraele wali agalirunaga haru haga kegoni manda bulebira.
Wali agali dindi bibahendeha karubi í̠na dindi bibahendeni haru kegonigo
tigua manda biai helo lo yanga lolebira.

14 Mbiraga i̱naga waitigi tigua tanoha dai bialu
wai pabe gibuni gibuni ibagabu howa
biangome gi̱gau̱ laradagua lama ibagabu ka.
15 Tigua puíbu bialu nolene taya bialu haabo howa
tinaga tombeha tomo noa biaabo hayagua nde ti ngiriningerene lalu haga ka.

16 Ti ani biagagoyu i̱na í̠naga hongo timbuni ngegonaga iba gana lalu holebero. c 
I̱na egerebagi bibahendengi
í̠na i̱hondo gubalini ho haabo haga kego mitangi bialu
iba gana hongo howa lalu holebero.
Abale i̱ha genda tara tara ibiyagola
í̠na i̱ handayaho haabo howa i̱naga wai pabe ale harigonaga
i̱na iba gana ani lolebero.
17 I̱naga hongo holene í̠niore kegoni ndobe. d 
Í̠ ani kegonaga i̱na í̠naga mini yaraga halu iba gana lolebero.
Ngode Datagaliwabe-o i̱naga wai pabe hongoheore í̠ni howa
í̠na i̱ gubalini ho haabo haga kegoniore laro.
Copyright information for `HUI