a6.1Iba 38.1, Yar 10.24
b6.2Iba 41.4, Hos 6.1
c6.3Iba 90.13
d6.5Iba 88.11, 118.17, Ais 38.18
e6.7Yob 17.7, Iba 38.10, Dug 5.17
f6.8Iba 119.115, Md 7.23, Lg 13.27

Psalms 6

Genda íbu wiagola biamogo bilo Anduane Homogohondo bi lenego ogo

Anduane Homogo-o í̠naga keba ho kegome a 
i̱hondo keba nahabe.
Í̠ miniha keba ho kegonigo
i̱ pani nolene na mo ngibe.
Anduane Homogo-o i̱ hongo nahe kogo b 
í̠na i̱ dara howa biamogo bibe.
I̱naga hongo biba halu ereba hayago
í̠nime i̱ lone mo hongo habe.
I̱ miniha genda timbuniore ho kogo
Anduane Homogo-o ai agua bidebe.
I̱ genda yu agiru holiya karulapedabe. c 

Anduane Homogo-o í̠na i̱ biamogo bialu gi mibe.
I̱ nahomoliya í̠na dara howa abale pele ngibe.
Homene dindiha karume í̠ mitangi nabiagaya d 
Tini haga haga bidagoha howa
í̠naga mini yaraga nahagaya.

I̱na olalu haabo kogola
i̱naga hongo biba hai haya.
Mbiraga bibahendengi i̱naga de ibame dagia goba ho wiaga.
I̱na dugu bialu haabo kogola
i̱naga haguanda de ibame goba ka.
I̱naga waitigi dewaore bu kagola e 
i̱na dugu bialu haabo kogome
i̱naga de to howa mbirale mbira bayuwa handabe nahe kogoni.

Anduane Homogo ibugua i̱na dugu berogo hale ho kagoni. f 
Wali agali mana ko biaga kamiru
tí i̱ kogoria hapara nahe purogo ladaba.
I̱na Anduane Homogo olalu i̱ biamogo bia larogola
ibugua hale halu i̱ biamogo biaga ka.
10 I̱naga waitigi bu karu
ti genda timbuni yu holebira.
Gi timbuniore howa ti taga timbuni ho holebira.
Tigua i̱ abale yu wahalu puwa
tini pu luluya hama ibaga bulebira.
Copyright information for `HUI