a62.1Iba 37.39, 59.9
b62.2Iba 62.6, 89.26
c62.5Iba 62.1
d62.7Iba 46.1, 85.9
e62.81 Sml 1.15, Iba 52.8, Ais 26.4
f62.10Ais 61.8, Ese 22.29, Lg 12.15, 1 Ti 6.10
g62.12Yob 34.11, Iba 103.8, Yar 17.10, Md 16.27, Lm 2.6, 1 Ko 3.8, Mo 2.23

Psalms 62

Ngode Datagaliwabe ibugua ina handayaho haabo ka lenego ogo

I̱naga Ngode Datagaliwabe mbiraore kago a 
ibugua i̱ pele ngilo hondo ko.
I̱na ibu hanguniore hanaho haga kogoni.
I̱ haru hagabi pele ngiagabi ibuni hanguore kagoni. b 
Ibu hangu i̱naga wai pabe ale hongohe kagoni.
I̱na wai bialu koria waitigirume i̱ bope habe naheore holebero.

Tígua i̱ mo ko halu bo waholenaga
horo agiru wai bialu holeberemibe.
Paberu gialohole bialu dindini podo ibiraho wiagadagua
i̱ mo ko helo hamelo kamibe.
I̱ mini leneore kogodago
tígua i̱naga mini mo ko hole bialu kamigoni.
Tígua ke̱ halu mo hondo holene mana hamelo kami.
Tínaga ne harigaha howa bi lalu Ngode Datagaliwabehanda i̱ mo bayale helo lalu kamigoyu
tínaga bu miniha Ngode Datagaliwabehanda i̱ mo ko hayagua karulapeoreda
lo mitangi bialu kamigoni ndobe.

I̱naga Ngode Datagaliwabe mbiraore kago c 
i̱na ibuni hanguni hanaho howa
mini dunubia ho kogoni.
I̱ haru hagabi pele ngiagabi ibuni hanguore kagoni.
Ibu hangu i̱naga wai pabe ale hongohe kagoni.
I̱na wai bialu koria waitigirume i̱ bope habe naheore holebero.
I̱ pele ngiagabi i̱ mini lene ka lelobi
Ngode Datagaliwabe ibuni hanguha hanaho haruli.
Ibu i̱naga haru haga hongohe ka.
Ibuni i̱naga wai pabe ale hongohe kagola
waitigirume ibalu i̱ babe nahe holebira. d 

I̱naga wali agali bu kamiru tígua Ngode Datagaliwabehondo mini mbiraore wu haabo halimu. e 
Genda howa tí mini dege dindi ho kamiru bibahende
ibuhondo lamiai halimu.
Ibu inanaga ha do haga kago
ina ibuha howa bayale haabo holeberema.

Wali agali bibahende bu karuni
ne harigaha howa buhe̱ bame latagi hagagobi hangu bu kagoni.
Wali agali mini lene bu karubi emene karubi
habane nabulene bame dege bu ka.
Wali agaliru ti holenenaga galone mbira ngabe nawi hondole magi handarimayagua
tinaga galone nawi bame dege ka.
Ti bibahendenaga galone magi handalu
genda magi emeneore ne harigaha buhe̱ laraligobi bameore nagalone dege ka.
10 Tígua mitangi bialu howa
wai beremagome ina biamogo biaga lalu f 
mbirale mo page bini ngamaru urunimebi ina mo homogo holobadalo
mitangi nabilimu.
Tínaga muni dabudaburu dewaore wu hemiyagua nde
urunime tí hongo karulape ngulubadalo
ogoriani mini hanaho nahalimu.

11 Ngode Datagaliwabehanda lalu,
I̱ hongo daligahe i̱ ale mende nahe i̱ni hanguore kogoni,
lenego hale haabo harugoni.
12 Ibugua lalu, I̱naga wali agali karu gubalini haabo haga kogoni, g 
lalu hayuago i̱ hale haabo haru.
Anduane Homogo-o wali agali bibahendeme biabe bialu harimadagua
í̠na ina hangu hanguhondo emena karulape ngiadai biaga kegoni.
Copyright information for `HUI