a66.1Iba 100.1
b66.4Iba 67.3, 96.1-2, 117.1
c66.5Iba 46.8
d66.6Har 14.21, Yos 3.14-17
e66.9Iba 121.3
f66.10Iba 17.3, Ais 48.10, Seg 13.9, 1 Pi 1.6-7
g66.18Ais 1.15, Yo 9.31, Ya 4.3
h66.19Iba 116.1-2

Psalms 66

Ngode Datagaliwabehondo turu howa ka̱i̱ lalu iba gana lenego ogo

Wali agali dindi bibahendeni bu kamiru-o
tí turu halu hongo howa ladaga halu a 
Ngode Datagaliwabenaga mini yaraga halimu.
Iba ganaru lalu ibu mini leneore kago lalu
latagi holene nga.
Ibunaga mini timbuni ngago mo yaragaore holene nga.
Tígua Ngode Datagaliwabehondo lamialu lalu,
Mbirale í̠na biagago damene bibahende
dunini hangu biai haga kegoni.
Í̠ hongo timbuni daligaore kego hondowa
í̠naga waitigi bu karume mogo lalu
í̠ wanakuihayagi ibalu bulupaligi bialu haga ka.
Wali agali dindi bibahendeha bu karume b 
í̠ mitangi bialu lotu lalu ka.
Tigua í̠hondo iba ganaru lalu
í̠naga mini yaraga halu ka, lalu lamilimu.

Ngode Datagaliwabehanda biyadaru tí de hondole ibidaba. c 
Wali agali bu hearu dombeneha howa
tarale timbuni biyadaru de handadaba.
Ibugua iba solowara timbuni bereago hundiai helalu d 
dindi mo yobia haya.
Dindi yobialu pani helayagola
inanaga mamaliru ti geni dindi dindi ibiyagoni.
Ibugua biyagonaga iname ogoriani ibuhondo turu timbuni hene.
Ngode Datagaliwabe ibu hongo gibihe howa
ibu kini haluhe haabo haga ka.
Ibugua hameigini tara tara hama pedaru bibahende
ibunaga deme de handa amu haga ka.
Wali agali maru ibunaga mana hale howa doga haga karu
ti mini timbuni bolanguahe kama loligo henge namilimu.
Wali agali hameigini tara tarani palima pedemiru
tí bibahendeme inanaga Ngode Datagaliwabe kagonaga mini yaraga hadaba.
Wali agali bibahendeme hale hai helo
tígua ibunaga mini mo yaraga hai hadaba.
Ina koha pi naloloma̱ya
ibunimeore baya hangu handayaho hayagome e 
ina homa nabi bayale kamagoni.

10 Ngode Datagaliwabe í̠nime ina ba handarigoni. f 
Agalime siliba dodo para kago do taulo wahelonaga
irani deledagola baya tara wiagadagua
í̠na ina kamaruhondo ani biridagoni.
11 Í̠nime ina wena nu aleha minu hanarigoni.
Inanaga erembirani genda timbuni mo ya harigoni.
12 Waitigi bu hearume ina bo hengedelo waharigoni.
Ina ira deagoriabi iba li timbuni peagohabi
ibagabu harimagoni.
Í̠na ani birigoyu ai ina dindi bayale ngagoria
haru íbu heledegoni.

13 Bamba genda i̱ha tagira ibiyangi
i̱na í̠hondo loma mbira irani dai helo bo delole lalu bi lo wirugoni.
I̱na bi ogoni larugo mitangi bialu
ai loma uruni bu yalu ibulebero.
I̱na nogoru í̠naga andaha haru ibalu
irani bo delolebero.
15 Nogo sibi habatigiru i̱na í̠nihondo lomabu ngialu irani bo delolebero.
I̱na bulumaga wangabe karubi meme wangabe karubi
í̠hondo loma bialu irani bo delolebero.
Uruni delarogola nga bayale birago í̠ nga ho holebere.

16 Wali agali Ngode Datagaliwabe andaneha haga bu kamiru-o
tí i̱na bi larogo hale hole ibidaba.
Ngode Datagaliwabehanda i̱ biamogo biyaru bibahende
langiai holiya ibidaba.
17 I̱na ibuhondo i̱ biamogo bia lalu olalu harugoni.
Ibunaga mini yaraga halu i̱na iba ganarubi larugoni.
18 Mana ko birugo bu donge ho kole nde g 
Anduane Homogohanda i̱naga bi larugo hale nakale.
19 Ngode Datagaliwabehanda i̱na ibuhondo bi larugo haleore haya. h 
Ibugua i̱naga bi larugo heneneore hale howa ladai biya.

20 Ngode Datagaliwabehanda i̱ erembira nangi.
Ibugua i̱naga bi larugo hale halu
i̱ gubalini hayago wanahe haabo hayagonaga
i̱na ibu mini yaraga harogoni.
Copyright information for `HUI