a68.5Iba 10.14, 10.18, 146.9
b68.61 Sml 2.5, Iba 107.10, 107.34, Ab 12.6
c68.8Har 19.18
d68.10Man 26.5, 26.9, Iba 74.19
e68.18Eb 4.8
f68.19Iba 55.22, 65.5, Ais 46.4
g68.20Man 32.39, Iba 49.15, 56.13, 106.43

Psalms 68

Isaraele wali agali ti Ngode Datagaliwabehanda biamogo biyagonaga turu halu iba gana lenego ogo

Ngode Datagaliwabe ibuni abale heyalu ibunaga waitigi bu karu talia togo laragoni.
Ibuhondo handabe manga haga karu ti ibida piai haragoni.
Puyabume hagua pulo yalu purogo lagadagua dege
Ngode Datagaliwabehanda waitigi bu karu bo taliatogo lai haragoni.
Wagaya ira dene hondowa elalu ereba hagadagua
wali agali ko karu Ngode Datagaliwabenaga deni howa mo ko hai haga.
Wali agali mini tigabi karu ti dege turubiore howa
Ngode Datagaliwabenaga deni miniha dungulo halu ti turu timbuni ho haga.

Ngode Datagaliwabehondo iba gana ladaba.
Ibunaga mini yaraga halu iba ganaru lalu holene nga.
Ibu hari beralibani biralu piaga kago ibilo
hariga mo tiga bia holene nga.
Ibunaga mini Anduane Homogo ka.
Iname ibunaga deni howa turu hami̱ya.

Ngode Datagaliwabe ibu ibuni andagaha howa a 
ibugua waneigini aba ai̱yala homene karubi
wali dalo agalini homene bedarubi
ti bibahende handayaho haga ka.
Wali agali tini hangu haga karu b 
ti anda mo migi bialu bayale berelaga ka.
Wali agali garabaya bu helene karu ti golope howa
ibugua tini daluha haru dai bialu ti turu ho helo helaga biaga.
Agali doga haga bu karu ti dindi ko yobi iba dalu naibaga ngagoha
pu haabobo bu holebira.

Ngode Datagaliwabe-o bamba í̠na í̠naga wali agali haru tagira ibalu
ti dindi ko wali agali nahaga wiagoha haru halu ibirigoni.
Horo ogoningi Ngode Datagaliwabe ibu Hari Sainai ala íbu hariligoria áyu íbu kegoni. c 
Isaraele wali agalinaga Ngode Datagaliwabe í̠ni ibirigola dindi dumbirumbi bialu
hari daligaha howa iba dalu timbuniore ibiniya.
Ngode Datagaliwabe í̠nime í̠naga dindini iba dalu timbuniore ibilarigola
dindi ala ko wiyago lone mo bayale harigoni.
10 Í̠naga wali agali ti dindi ogoni karulayagoni. d 
Í̠ baya gibiore kegome
wali agali burupale hearuhondo tomo dabudaburubi migi birigoni.

11 Anduane Homogohanda bi layagola
wali dewa biru wiarume bi te uruni lamima piyagoni.
12 Bi te lamima piyadagoni ogodagua,
Kini karu heba tinaga ami bu karubi bibahende ibida piai haragoni.
Agali tigua wai labuha howa mbirale mo yalu ibiyaru
wali andaga berearu baba talebu ta haga biya.
13 Ega malibu ale silibame wabiniru babagane ngolome hoai laradaguabi wiaru
tigua mo tale bigi bini.
Ainde irane agome agali maru wai nape
pabeha nogo sibi heba hayabe, laga biya.
14 Ngode Datagaliwabe Hongo Haiheore kagome
Hari Salamono ogoniha kini hearu bo taliatagi halu purogo lelowa
ibugua dalu dindi guni timbuni hari ogoniha ibilaya.

15 Hari Basananaga ibu hari timbuniore weda.
Hari ogoninaga hombene bolebolene dalidali bigi bida.
16 Hari timbuni hombene dewa bolebolene hagahagabi kego-o
í̠na hari emene Ngode Datagaliwabe ibuni birulenaga dabo heledago de hondowa
irane aginaga henge larebe.
Anduane Homogo ibu hari ibuni dabenego ogoniha haabobo bu holebira.

17 Anduane Homogo ibuni Hari Sainai wahalu
ibuni anda loma bia hene biagoha íbu kagoni ndobe.
Ibunaga ami agaliru wai biaga garo ale nogo hosime gililo yalu piaga mini karisiru
daosini dagalabe nahe dewaoreni hagahaga bialu ti haru ibiyagoni.
18 Ngode Datagaliwabe ibu ibunaga hari daligaore wiagoria iraga halu e 
agali dewaore minalu haru halu piya.
Agali dogahe wai biaga hearume
ibu mo turu halu mbirale migi biyaru mo yaya.
Anduane Homogo Ngode Datagaliwabe ibuni hari daligaore ogoniha haabo holebira.

19 Iname Anduane Homogonaga mini yaraga hami̱ya. f 
Ibugua inanaga genda ngelo kamaru
horo bibahendengi ya haga kagoni.
Ina pele ngialu mo wiaga Ngode Datagaliwabe ibuni hanguore kagoni ndobe.
20 Inanaga Ngode Datagaliwabe ibunime ina pele ngialu haabo kagome g 
ina bayale kamagoni.
Anduane Homogo ibu inanaga Anduane Homogo kago
ibugua ina homa nabi bayale holoma̱yanaga pele ngiaga kagoni.

21 Ngode Datagaliwabehanda ibula waitigi haga karubi
mana ko ngaru hangu mo tene haga karubi
ti bibahende bo wahai holebira.
22 Anduane Homogohanda lalu,
Tínaga waitigi amu Basana dindini bu karu minu yudai bulebero.
Ti unuraore iba solowara timbuni bedago andanehaore heaguabi
harugo lowa i̱na minu yudaiore bulebero.
23 Tínaga waitigi uruni baiore howa tí bu miniha dungulo halimulo
tínaga biango bu karume waitigi uruninaga darama na dege bialu no karulapelobi
i̱na ani minu yudai bulebero, laya.

24 I̱naga Ngode Datagaliwabe-o í̠na wai bialu wayali harigo de hondowa
manda bu kama.
Ngode Datagaliwabe i̱naga kini kego
í̠ninaga anda loma bia heneha turu halu anda porego
ina bibahendeme de handai ho kama.
25 Iba gana lagarume bamba halu
ngida ale lagaru ti maha ibiragoni.
Wandarime irabitele ale maru yuwa tigua bama dombeni ibiragoni.
26 Tigua iba gana laraga halu howa lalu,
Wali agali íbu ngoaiho kamarume
inanaga Ngode Datagaliwabenaga mini yaraga hama.
Ina Isaraele wali agali bu kamarume
Anduane Homogonaga mini mo yaraga hama, lama ibiragoni.
27 Beniyamini hameigini emene hayaru tigua mo bamba hara.
Yuda hameigininaga agali haguane bu hearu
tigua Beniyamini hameigini erembiraha pora.
Sebulunu hameiginibi Nabadali hameigini tinaga haguane bu hearubi
tigua o piyaru mama talima poragoni.

28 Ngode Datagaliwabe-o í̠ninaga hongo inahondo mo walia habe.
Bamba í̠naga hongo ogonime ina mo wirigonigo áyu walia habe.
29 Í̠ni anda Yarusalemeha kagoria
kini tara tara bu hearume í̠ mo turu hole
mbirale mbirale bame í̠hondo ngule mo yalu ibiragoha howa
í̠na í̠naga hongo walia habe.
30 Nogo gabua timbuni iba puguaha haga biago hongo howa talibe.
(68.30)Agali marume mitangibu handalu hearia nogo gabua iba puguaha haga layadagoni Iyibi dindihondo lene bada lomanda biya.

Nogo bulumaga wangaberu bulumaga igini heba haradagua helaga karubi
hongo howa talibe.
Tinaga muni siliba yu karu í̠hondo ngialu í̠ni kegoha ibalu
bulupalialu ge duli hanga helonagaore
í̠na hongo howa talibe.
Hameigini tara tara wai bule hamelo karu
ibida bilibulu purogo lelo bo taliatagi hai habe.
31 Iyibinaga kinime ibunaga agali haguane bu karu ti
í̠naga bi larego hale helo Yarusalemeni ibilaga bulebira.
Idiobialirume gi yaragaho howa í̠hondo bi lolebira.

32 Wali agali dindi tara tarani bu kamiru aibe.
Tígua Ngode Datagaliwabehondo iba ganaru lagalaga bidaba.
Anduane Homogonaga mini yaraga halu iba gana ladaba.
33 Mbirali ibu hari daligaha beralibani ge halu piaga kago
ibunaga mini yaraga hadaba.
Ibunaga bi hongo howa hari kulu laradagua biaruago hale hadaba.
34 Wali agali bu kamiruni bibahendeme
Ngode Datagaliwabenaga hongo timbuni kago lalu latagi halu hadaba.
Isaraele wali agalirunaga kini daligaore ibu kagoni.
Ibunaga hongo taraore hari daligani walia harane de hondo kama.
35 Ngode Datagaliwabe-o í̠ tara baya burugule gibiore howa
í̠ninaga anda loma bia heneha kegoni.
Isaraele wali agalirunaga Ngode Datagaliwabe ibugua
ibunaga wali agali bu karuhondo hongo miaga ka ndobe.
Ina Ngode Datagaliwabe mini yaraga hai hami̱ya.
Copyright information for `HUI