a70.1Iba 40.17, 141.1

Psalms 70

Ngode Datagaliwabehanda biamogo bilonaga bi lenego ogo

(Iba Gana 40.13-17)

Ngode Datagaliwabe-o ainde i̱ore pele ngibe. a 
Anduane Homogo-o í̠na áyu ogoni i̱ biamogo bule íbu.
Agali marume i̱ homelo bo wahole karu tiore taga halu pelo
í̠na ti bope halu mo luluya habe.
Agali marume i̱ genda yu kogonaga turuho karu
í̠na ti taliai halu tinaga mini bope halu mo dindiha ho helabe.
Agali i̱ mege bima ibaga bialu karuni
mana tinime bialu karu nagalone bialu harimada lowa mogolo hendelo
í̠na ti mo taga habe.

Wali agali í̠ keria ibaga karu
ti dege turubi howa í̠niha mini hanaho helo.
Wali agali í̠nime pele mirigonaga turu haga karu
uruni tigua bibahendengi laabo halu lalu,
Ngode Datagaliwabe ibu duniniore ka, lalu helo.

Ngode Datagaliwabe-o i̱ninaga hongo nakarulape kogonigo
i̱ koria abale ibabe.
I̱naga Anduane Homogobi Pele Ngiagabi í̠niore kego
i̱ biamogo bule emene handayaha nabi abaleore ibabe.
Copyright information for `HUI