a78.2Md 13.35
b78.12Har 7.8—12.32
c78.13Har 14.21-22
d78.14Har 13.21-22
e78.15-16Har 17.1-7, Dag 20.2-13
f78.18-31Har 16.2-15, Dag 11.4-23, 11.31-35
g78.24Yo 6.31
h78.35Har 15.13, Man 7.8, Ais 41.14, 63.9
i78.37Ab 8.21
j78.39Iba 103.14-16, Yo 3.6-8, Ya 4.14
k78.44Har 7.17-21
l78.45Har 8.1-6, 8.20-24
m78.46Har 10.12-15
n78.47-48Har 9.22-25
o78.51Har 12.29
p78.52Har 13.17-22
q78.53Har 14.26-28
r78.54Har 15.17, Yos 3.14-17
s78.55Yos 11.16-23
t78.56Hgn 2.11-15
u78.60Yos 18.1, Yar 7.12-14, 26.6
v78.611 Sml 4.4-22
w78.70-711 Sml 16.11-12, 2 Sml 7.8, 1 Bit 17.7
x78.721 Kin 9.4

Psalms 78

Ngode Datagaliwabe ibunaga wali agaliru baba bi lenego ogo

I̱naga wali agaliru-o i̱na tíhondo bi lawai harogo
tígua bayuwa hale haiore halimu.
I̱na bi larogo hale dugua halu baya hangu hale halimu.
I̱na bi yobageru hangu lolebero. a 
Mbirale nahendene ale tara tara bamba wia do ho winiru
i̱na áyu garea lalu manane walia halu langulebero.
Bamba ina mamalirume te uruni inahondo langiyagola
iname hale howa mandabu harima.
Iname nde bi uruni ina waneiginiruhondo lamia nabi ya do holene nakarulapeore.
Anduane Homogonaga hongo timbuniorehe kagonagabi
biabe hongohe damene binigonagabi agalime nabiaga ale bigi binigonagabi
iname ina waneigini aguanene mani holebiraru lamuleberema.

Ibugua ibunaga bi mana lowinigo
Isaraele wali agaliruhondo lamigi bini.
Ibunaga mana bulene winigo Yagaba aguanenerume taluwa bialu helo lamini.
Ibugua bamba ina mamaliruhondo lalu,
Tígua tínaga waneiginihondo i̱naga bi mana ogoni lawai halimu, lalu lamini.
Tí waneigini aguaneru mani holobadarume hale halu lo manda bilo.
Tigua ti waneiginiru maniore hama polobadaru lawai hama puabo haragola ti manda biai helobi lawai halimu, lene.
Tigua anidagua lawai hama puabo hayagua nde
mani holobadaru tigua Ngode Datagaliwabehondo mini mbiraore wu halu
ibugua biabe hongohe bialu henedaru embeda nahe yu haabo holebira.
Yu haabo howa tigua ibunaga mana bulene ngaru taluwa bialu haabo holebira.
Tinaga mamalime ala bialu henedagua naholebira.
Tinaga mamalime doga haga howa Ngode Datagaliwabenaga bi mo wahalu
ibuhondo mini mbiraore hongo howa nawi halu
mini bilina nahe hene.

Bamba Eberaimi hameigini tigua danda timu yandarerume
wai hongo howa bule pialu hearia baya handala ibida piai hene.
10 Ngode Datagaliwabehanda habo nalolene bi lowinigo tigua habo lalu
ibunaga bi mana bulene winirubi talialu bia nabi hene.
11 Ibugua tininaga deniore howa mbirale biyaru damenebi
agalime nabiagane ale biyaru bibahendebi
tigua embeda hai heneya.
12 Tinaga mamaliru Iyibi dindiha dindi emene mbira mini Soana wiagoria heagola b 
ti de hendeaore dege Ngode Datagaliwabehanda agalime nabiagane ale dewa biniya.
13 Ibugua iba solowara timbuni bereago mo bira li ni bilowa c 
Isaraele wali agaliru dombeni haru pene.
Iba bira li ni biyagola iba ibuni bira amu nana bialu pabe ale hene.
14 Horombe ibuni hari beraliba mbiraha howa ti haru bamba halu d 
mbiraga ibuni ira hungu mbiraha howa ti haru halu pu bamba haga biniya.
15 Ibugua dindi ko iba naibaga wiagoria howa ege to̱le̱ bayagola e 
iba duguatagi helayagola wali agali ti iba ogoni nalu hene.
16 Ibugua ege to̱le̱ha howa iba ibilayagola
iba timbuni piagagobi pupe halu piya.

17 Ibugua ani biyagolabi tigua Ngode Datagaliwabe kagohondo mana ko hangu bialu haabo haya.
Dindi ko iba dalu naibaga wiagoha howa
tigua Daligaorene Daliga kagohondo mine halu doga haabo haya.
18 Tigua Ngode Datagaliwabe ba handalu f 
tomo ti hame timbuni layaru ibuhondo hongo howa ngi lalu haya.
19 Tigua Ngode Datagaliwabe mege bialu lalu,
Ngode Datagaliwabehanda ina dindi ko ogoria kamagoha
tomo dewa ngia ngulebadabe, lalu heneya.
20 Ibugua abale heneneore ege to̱le̱ bayagola
iba bayale timbuni tagira ibilayagodago
ai dindi ko ogoriabi nogo ega mberediru ngulene karulapedabe, laga bialu hene.

21 Tigua bi ogoni lalu heago hale howa
Anduane Homogo ibu keba ho hene.
Ibugua keba halu Yagaba aguane biaru bu heagoha ira hedope hene.
Ani buwa ibugua keba ala hayago timbuniore ho hene.
22 Keba henedagoni irane tigua ibuhondo mini mbiraore nawiyagonaga ibu keba hene.
Ti bayale holenaga ibuhondo ina pele ngi lalubi
mini mbiraorebi nawiore hene.
23 Uruni biyadaruni waha lowa ibugua hari li kagohondo bi layagola
hari haedene bialu henge winiya.
24 Ibugua hariha howa tomo ibira helayagola g 
tomo ogoni dahuliya andaga tawe minimena ti nelo mini.
25 Tigua dahuliyalinaga tomo ogoni mialu nene.
Ngode Datagaliwabehanda tihondo tomo dewaore miyagola
ti nalu no karula pene.
26 Mani ibugua puyabu hongohe ni tagira ibiragohayagi howa puloyu ibilene.
Ibunaga hongome dege puyabu dindi abene unurahayagi howa puloyu ibilene.
27 Ibugua ega dewaore be abalu dugupe haradagua bialu
iba angeni iba mu wiradagua bialu
ti heagoria odo ibira ibira bilene.
28 Ngode Datagaliwabehanda ega uruni ti heagoria ibira helalu
ti balai anda bu hemigoha manda manda tagira wiaru bibahendeha biru mabu bilene.
29 Wali agali tigua tomo uruni nalu no karula pene.
Mbirale uruni ngi lalu wali agalime dugu bialu hayaruni
Ngode Datagaliwabehanda mini.
30 Tigua tomo uruni na nalu hayagoyu
tinaga noa holene hame ereba nahe tomo na dege bialu heaore
31 Ngode Datagaliwabehanda tihondo keba timbuniore ho howa
Isaraeleali miniwi hongohe bu hearubi
igiri daliahe hearubi bibahende bo wahaiore hene.

32 Ngode Datagaliwabehanda tihondo agalime nabiagane ale uruni biyago hondowa
wali agali bu hearume mana ko dege bialu haya.
Tigua ibuhondo mini mbiraore nawi dege haya.
33 Tigua ani bialu heagola ibugua ti abaleore ne harigaha howa
buhe̱ latagi haradagua bialu bo wahaiore hene.
Ibugua ti heagoria ko gibi anda ibilayagome
ti dindini holene winigo abaleore mo ereba ho wahai hene.
34 Ngode Datagaliwabehanda maru ani bo wahai hayago de hondowa
maru hearume ibu mitangibu dai bialu tinaga mini beregedalu
mini mbiraore wiai halu ibuhondo bi hongo howaore lalu hene.
35 Ngode Datagaliwabe ibunime ti haru hagaore howa h 
tigua ibu tinaga humbi ale ka lo mandabu hene.
Ibu Daligaorene Daliga kago ibugua ti biamogo biagaore kalo
manda bu hai hene.
36 Tigua ani manda biyagoyu
tinaga ne harigaha howa ibuhondo bi henene ndo bame bi degeme lalu hene.
37 Tinaga bu miniha ibula mini hana haga nabi hene. i 
Tigua ibunaga habo nalolene bi lo wiyaru
pugualu ha dege bini.

38 Ani biyago bialu helowa Ngode Datagaliwabe ibugua ti dara howa
tinaga ko wiago domo wahai halu ti bo wa nahe helene.
Tigua ko biyago hondowa ibugua keba ho donge howa
ibunaga mini haru haga bialu wahaga bini.
39 Ibugua mitangi budai bialu ti wali agali ha kagonigo j 
ti bame puyabu mbira abaleore ibalu pu bolangua hagagobi dege kagonidalo mitangi bini.

40 Horo bibahendengi tigua dindi ko iba dalu naibaga wiagoha howa
ibunaga bi mo wahalu ti doga haga hene.
Tigua halu dewaore ibu mo genda haga bialu hene.
41 Tigua Ngode Datagaliwabe ba handalu haabo haga hene.
Isaraelealinaga Ngode Datagaliwabe mini tigabi baya burugule kago
tigua mo genda haga bini.
42 Tigua ibu hongo gibihe kago embeda halu
ibugua ti waitigi giha hearia haru dai biyagobi mitangi nabi hene.
43 Ogoningi ibugua Iyibi dindiha dindi emene mini Soana wiagoria
agalime nabiagane ale dewaore bialu hayagobi ti embeda hene.
44 Iba bibahende peago ibugua mo darama bume hai helayagola k 
Iyibi wali agali hearume iba nolene nawini.
45 Bunguna tawalina dewa ibilayarume ti hayaga bini. l 
Yago dewabi ibilayagola yago biarume
tinaga mabuha tomo hengearu mo ko hai hene.
46 Ngode Datagaliwabehanda pagaya ale tara dewa ti hearia ibilayagola m 
Iyibi wali agalirunaga mabuni tomo hengearu damene nai hene.
47 Ibugua dalu dindiguni timbuni ibilayagome n 
tinaga pu mbira lini daga minigerebi hearu
bibahende bo gindulo wahaiore helene.
Ira poge ale bu hearubi kewaro ibirahayagome
bo gilo wahai helene.
48 Dalu dindiguni timbuni ibilayagome tinaga nogo bulumaga bo homelalu
hari daba ibilalu nogo sibi damenerubi bo wahaiore helene.
49 Ibugua Iyibi wali agali biaruhondo keba timbuniore ha ho wiaabo halu
dahuliyalirume ti mo ko holene tara tara ibilaga bini.
50 Ibugua ibunaga keba holene wanahe
tiha warago timbuni mbira ibilayagome
wali agali homa dege dindi hene.
51 Iyibi wali agalinaga igiri wahene damene bibahende bu hearu o 
ibugua homelo bo wahai hene.

52 Mani ibugua ibuni nogo sibi haru haga ale howa p 
ibunaga wali agali biaru haru tagira pialu
dindi ko iba dalu naibaga wiagoha howa ibuni bamba halu
hariga walia hama pene.
53 Ibugua ti haru halu piyagola q 
tiha gi holene mbira nawi howa bayaleore hene.
Ti waitigi biaru dege iba solowarame bo nai helene.
54 Ibugua ti ibunaga dindi loma biaho wiagoha haru halu ibini. r 
Dindi ogoni dindi hari ibuninaga hongomeore mo wini.
55 Ibunaga wali agaliru haru ibalu howa s 
wali agali tara tara dindi ogoriani hene bu hearu bo talia togolene.
Dindi ogoni Isaraele hameigini bibahendehondo tu wa tahalu
ibugua dindi andabi ti helo mo migi bini.

56 Ibugua ogoni biai hayagola t 
Isaraele wali agali tigua Ngode Datagaliwabe Daligaorene Daliga kagohondo doga howa
ibu ba hendene.
Tigua ibunaga mana bulene winigo talia nabi dege hene.
57 Tinaga mamalirume bamba bialu henedagua tiguabi nde doga howa
ibunaga bi mo wahaga bialu hene.
Wali agali uruni ti tiga nabiore timu yole ngaligobi hene.
58 Dama mitangi bialu mbirale gime wabini wiaruhondo bi pupu wulenaga anda bu helaga biyagome
Ngode Datagaliwabe mo keba haya.
Tigua dama mitangi bialu mbirale bi pupu wulenaga gime wabigi biyagome
Ngode Datagaliwabe mo keba ha haya.
59 Ngode Datagaliwabehanda tigua mana bialu hearu hondowa
ibu keba timbuniore ho howa
Isaraele wali agali erembira mialu wahene.
60 Ibugua ibunagaBalai Anda Silo tanoni heagobi wahene. u 
Anda ogoniha howa ibu wali agali dege dombeneha haabo haga henego
wa dege hene.
61 Ina baba waitigi hearume ibunaga Habo Nalolene Bi lo winigonaga Mbogoyi biago v 
mo yalu pelo wahene.
Mbogoyi ogoriani howa ibunaga hongo holenebi wá holenebi timbuniore
tihondo walia haga wini.
62 Ibunaga wali agaliru baba keba timbuniho howa
ti waitigime ibalu bo wahai helo yupe ho hene.
63 Igiri daliahe hearu waime bo wahai hayagola
wandari mabuage berearu ti dabu bulene igiri mbira nahene.
64 Agaliloma binigo mo miaga hearu bo wahai hayagola
ti oneme dara howa dugu bialu birulene henge nawini.

65 Aniore biagola Anduane Homogo ibu agali dagiani palene heyaradagua bialu
agali hongohemewaini iba dewa nalu bi hongo howa lagadagua lalu biya.
66 Ibugua waitigi hearu baba wai bialu ti bo talia dai bini.
Ti bopeore hayagola tigua taga timbuni halu
wai lone bibe nahe hene.
67 Yosebe aguanene bu hearu erembira mialu
ibugua Eberaimi hameigini hearu ariabi mbira dabo hela nabi wahene.
68 Ti wahalu ibugua Yuda hameigini aria dabo helalu
hari ibuniore gubalini ho haga Saiono biagobi dabene.
69 Hari hombene ogoriani ibugua ibunaga anda Dahuliya andagaha kagobi bini.
Ibunaga anda ogoni hongohe
dindi ogo hongohe ngagobi haabo helo
ibugua bu helene.

70 Ngode Datagaliwabehanda ibunaga biabe biahaga helo Debidi dabaya. w 
Ibugua Debidi nogo sibiru haru haga hearia dabo helayiya.
71 Ngode Datagaliwabehanda Debidi ibu Isaraele wali agaliru haru haga kini helo dabo helayiya.
72 Debidi ibu mini tigabi howa wali agaliru haru haga hene. x 
Ibugua haru holene mugube yu howa
ti baya hangu haru halu handayaho hayiya.
Copyright information for `HUI