a79.12 Kin 25.8-10, 2 Bit 36.17-19, Yar 52.12-14
b79.5Iba 85.5, Ese 38.19
c79.8Iba 106.6, Ais 64.9
d79.92 Bit 14.11, Iba 25.11, 31.3

Psalms 79

Isaraele wali agali biamogo bilo Ngode Datagaliwabehondo bi la henego ogo

Ngode Datagaliwabe-o wali agali tara tara í̠ mitangi nabiaga karume a 
í̠naga dindi wai bialu karulole íbu ka.
Tigua anda í̠nagaore helo loma biaho helarigoha anda puwa mebia haya.
Yarusalemebi mo ko halu bo gialo wahai haya.
Tigua í̠naga wali agali bo wahalu ega bodo hariawe aleme nelo
tinaga tingini ngelalu pene.
Í̠naga biabe biahaga wali agali hearu bo wahai hayagola
nogo gabua bu hearume tinaga tingini nalu kagoni ndobe.
Waitigi biarume í̠naga wali agali biaru bo wahayagola
uruninaga darama Yarusaleme tanoha iba poradagua pialu kagoni.
Homayaru mo horo holene agali mbira naheoreya.
Hameigini tara tara ina kamagoria kaware bu karume
ina mege buwa hondo oba halu bi koru laga bialu ka.
Anduane Homogo í̠na inahondo keba ho haabo holeberebe. b 
Í̠naga kebago hongohe ira hungu ale dalu hundia nabulene kebe be agua bidebe.
Hameigini tara tara í̠ mitangi bialu lotu nalagabi í̠nihondo bi nalagabi karu
tihondo keba hariyagua nde karulapeda.
Wali agali uruni tigua í̠naga wali agali hearu bo wahai halu
í̠naga dindi andaru mo ko halu mo labu hai haya.

Inanaga mamalirume mana ko bialu hayagonaga pani nolene winigo
inahondo nguleni nangibe.
Ina mini dege dindi ho kamago hondowa dara halu
inanaga mini mbiraore ngamago mo hongo habe. c 
Ngode Datagaliwabe-o ina pele ngiaga í̠ore kegoni. d 
Í̠ mini leneore kegome ina mitangi bialu biamogo bibe.
Iname ko birimaru domo wahalu ina haru dai bibe.
10 Hameigini tara tara bu karume lalu,
Tínaga Ngode Datagaliwabe agoha kabe, laga bialu kago
irane aginaga í̠na ti ani leledebe.
Hameigini tara tara uruni tigua wali agali í̠naga biabe biahaga bu hearu
bo wahai halu tinaga darama piyadagua tininaga darama ani pelo
í̠na tini bo waharego ina hondole hamelo kama.

11 Garabaya andaha bu karume dugu biaruago hale habe.
Waitigi bu karume inanaga wali agali garabaya karu
ti homelo bolene nga layago nahomelo
í̠ninaga hongo timbuni ngegome ti haru dai bibe.
12 Anduane Homogo-o waitigi agali uruni tigua í̠hondo bi ko laabo hayagonaga
í̠na tihondo pani ka halu miadai bibe.
13 Í̠na ani beregola ina nogo sibi ale howa í̠naga wali agali bu kamarume
í̠hondo ka̱i̱ laabo holeberema.
Inanaga waneigini aguaneneru mani hama polobadaru tiguabi
í̠naga mini yaraga halu hadege bulebira.
Copyright information for `HUI