a8.1Iba 113.4, 148.13
b8.2Iba 44.16, Md 21.16, 1 Ko 1.27
c8.3Iba 111.2
d8.4Yob 7.17-18, Iba 144.3, Hi 2.6-8
e8.6Pig 1.26-28, 1 Ko 15.27, Eb 1.22, Hi 2.8

Psalms 8

Ngode Datagaliwabe ibuni daligaore gibi howa wali agalibi daliga dege helo wabinigo ogo

Anduane Homogo inanaga Anduane-o a 
wali agali dindi bibahendeni bu karume
í̠ hongohe gibiore panigi ke lowa manda biai kagoni ndobe.
Mbirale í̠nime wabiriru bibahendeme í̠naga mini mo yaraga haragoni ibalu
dahuliya andaga í̠ni kegoria anda ibirane hale ho kegoni.
Wandari igiri emenemebi gali andu nalu karumebi heba b 
í̠naga mini dege yaraga halu iba gana lo ngialu kagoni.
Í̠naga waitigi karu í̠ kegoria naanda ibilonaga
wai pabe ndo gibiorego payatagi howa í̠ni handatagi ho kegoni.
Mbirali mbirame í̠na bigi berego ha hangai halu
í̠la waitigi hole manda biyagua ogoni bulilono hapai haga kegoni.

I̱na hari daliga í̠na wabini li kagoni de handadaga howa handarogola c 
egebi yakundibi li bu karubi helo
í̠nime helenedagoriaore li bu karia hendedogoni.
Ani hondowa nde mitangi bialu koria d 
ai ina wali agali nde emene ko bameore handini o bu kamarunidago
í̠na mitangi halu handayaho habe nahego
nde agiorenaga ina mitangiho haruadabe lo manda bigi biruli.
Nde abule emene bame ogonibiore kamagoni manda buwa dege
ina wali agali í̠ni ale degegoyu
ina emeneore nira holoma̱ya wabu heledegoni.
Ani wabu helowa í̠ninaga wá holenemebi mini yaraga holenemebi
í̠nani manda karulo haradagua karulaho heledegoni.
Ina wali agalime í̠na mbirale bibahende wabini dameneru e 
hondo halu ina haguane holoma̱ya heledegoni.
Nogo sibi bulumagabi hinini damenego bibahendebi
gabua tagiraha haga damene bibahendebi
ega damene bibahendebi wenabi ibaha biraga damene bibahendeorebi
uruni bibahendeore wali agalime hondo hai helo heledegoni.

Nde aniore bidegome Anduane Homogo inanaga Anduane-o í̠naga hongo holene gibiorehe panigi ke lowa
wali agali dindi bibahendeni karume manda biaho kagoni ndobe.
Copyright information for `HUI