a81.3Dag 10.10
b81.7Har 17.7, Dag 20.13
c81.9Har 20.2-3, Man 5.6-7, 32.12, Iba 44.20, Ais 43.12
d81.10Har 20.2, Iba 37.4, 107.9
e81.12Yob 8.4, Ab 7.42, Lm 1.24-26

Psalms 81

Turu halu mandagi ngoai howa lotu lolene horongi iba gana lenego ogo

Ina mo hongo haga Ngode Datagaliwabe kagohondo turu howa bi dalimu lama.
Yagabanaga Ngode Datagaliwabe kagonaga mini yaraga halu
iba gana lami̱ya.
Irabitele kilingele lalu bayuwa bami̱ya.
Ga̱wa̱ ale yugulelerubi baya hangu hibu howa mo bila hama.
Ege pigane ngabu laragolabi ege do hanuni haragolabi a 
turu halu mandagi ngoai howa lotu lolene horo tagira ibiragonaga
biguliru pu lolene nga.
Ina Isaraele wali agalime mana bulene ngago ogoni.
Yagabanaga Ngode Datagaliwabe ibunime mana ogoni bulene inahondo nginigo
anidagua bulene nga.
Horo mbiru Ngode Datagaliwabe ibugua Iyibiali baba wai bu piyangi mana ogoni tehinuwa
ina Isaraele wali agali kamaruhondo ngiya.

Mbiralime bi mbira laruago hale kogo aiwa laruabe i̱ manda nabi ko.
Bi laruagome lalu,
Tínaga payani mbirale gendabi yu harimiruni i̱na mo wahai haru.
Tígua erekui biabe timbuni biaga kamiru
dindini ibiraho ngeladaba laru.
Tígua genda yu howa i̱ olarimingi i̱na tí biamogo birugoni. b 
Hari kilikulu larago dombeneha howa
i̱na tínaga bi larimigo hale haru.
Bamba tí Meriba iba bereagoria hemingi
i̱na tí ba handarugoni.
I̱naga wali agaliru-o i̱na tíhondo bi hongohe mbira langerogo hale halimu.
Isaraele wali agaliru-o tígua i̱naga bi larogo hale halimulo hamelo kogoni.
Wali agali tara tara bu karunaga dama mitangi bialu mbirale gime wabini ngaru c 
tígua talima napilimu.
Mbirale uruni alehondo bi pupubi nawilimu larogoni.
10 Anduane Homogo tínaga Ngode Datagaliwabe i̱ni hangu kogoni. d 
Tí Iyibi dindiha hemiria i̱nioreme haru tagira ibirugoni.
Tínaga ne harigaha tomo yaanda haga buliya ai ne ha̱ladaba larugoni.

11 I̱na bi larugola i̱naga wali agalime hale habe manga haya.
Isaraele wali agali tigua i̱na bi larugo talialu bia nabi haya.
12 Tigua ani bialu heagola e 
i̱na ti mini giambe haabo hayagola helo waharu.
Wali agali urunime tini hameleago ale bialu helo
yupe ho waharugoni.
13 I̱naga wali agali bu karume i̱naga bi hale helo i̱ hameore ledo.
Isaraele wali agali tigua i̱na hameledogo talialu bilo hamelo kogoni.
14 Tigua anidagua bidale nde i̱na ti waitigi karu abaleore bope hai kole.
Ti waitigi bibahende karu baba wai bialu bopeore hai kole.
15 Wali agali i̱ handabe manga haga karume i̱hondo gi timbuni howa
i̱naga buha ibalu bulu palialu ge duli hanga ho bedale.
Tigua ko biyarunaga pani nelo mirugoni nalu haabo kale.
16 I̱na tíhondo ladi ale mini widi bayaleore nalu halimulo ngialu
irabuha mone tara dedarunaga ibanerubi nalu halimulo ngia dege berogola
tígua karulapeore nalu kamile,
lalu layuane hale haru.

Copyright information for `HUI