a90.1Man 33.27
b90.2Min 8.25-26
c90.42 Pi 3.8
d90.12Iba 39.4
e90.13Har 32.12-13
f90.17Iba 27.4, Ais 26.12

Psalms 90

Mbiralime Ngode Datagaliwabehondo bi lenego ogo

Anduane Homogo-o í̠ inanaga andaore haradagua bidegoni. a 
Inanaga mamali heneyaru tibi í̠ha dege howa heneyago
ai áyu inabi í̠ha dege howa bu kamagoni.
Dindini hari wedarubi nawe howa mbirale bibahende dindini ngarubi nawabi howa b 
Ngode Datagaliwabe í̠niore ala haabo heneyago
áyubi haabo kego manibi haho wiaaboore hole kegoni.

Wali agali bu kamaruni homalu lone dindi tagobi lelariligoni.
Í̠na inahondo, Dindi wali agali bu kamiruni tí dindime wabinigo homalu
lone dindiho dai bilimu, lalu kegoni.
Iname mali daosini (1,000) mbira bolangua hayago lu laramaligo c 
í̠na ogoni lu ndo bame abe harimago handaradagua birili.
Mbiraga agalime mamage ho ariari bialu
mbiraoregome mamage tigimandi haraligobi tigimandidane handaga kegoni.
Iba li ibalu wali agali hiliyalu poragola iba nalu homagadagua
í̠na wali agali hiliyalu pirili.
Ina emene tigimandi hanguni emaga handaradagua bialu halu homaramali.
Ina egerebagi tani mbira áyu dege delatagi howa
ala anda haga bialu lini dalu
ni handaragola yo bialu
alendo gaulo daga hagadagua ina ani bialu kamagoni.

Í̠na inahondo handabe mangaho kegonaga
iname í̠ hondowa gi timbuniore ho kamagoni.
Í̠naga keba holeneme ina handayaho kegome
ina bibahende do ereba hai haramagoni.
Inanaga mana ko tara tara beramaliruni
bibahendeore í̠ de handaiho kegoni.
Mana ko maru ohowa bia do hene birimarubi
bibahendeore í̠ deni panigi mo ngelowa kegoni.

Ina wali agali dindini lu holenego í̠naga keba holeneme mo tubagi halu
inanaga bu̱he bame halu mbira hangu laradagua abaleore lalu bolangua haragoni.
10 Ina wali agali dindini mali pira karia hangu haramali.
Hongohe harimayagua nde mali pira halira haramali.
Anigo áyu o haramadagoniha genda bulene erekui biabe bulenela dege ngaria handalu haramali.
Mali podo nginidadagua hai halu bialu
inane abaleore pu ereba haramali.

11 Í̠naga keba holenenaga hongo gibi ngegoni de handai hene ai kabe.
Wali agalime mana ko biraru hondowa í̠na handabe mangaho kegola
wali agalinaga bu miniha gi timbuni bulene tagira ibaganego aiwa manda bidabe.
12 Ina dindini lu ndo emene tigimandi hangu hole harimada manda buluma̱ya d 
í̠na lawaiha biawaiha bibe.
Inanaga horo dagalo wia heneni harimada manda bialu
miniwi holoma̱ya í̠naga mini dingi dangia lolenego inanaga bu habaneha wia habe.

13 Anduane Homogo-o í̠na inahondo kebaho haabo kegoni agoangi hairi hole kebe. e 
Ina í̠naga biabe biahaga kamaru hondowa dara habe.
14 Ina horo bibahendengi dindini hama poramangi
miniha turu halu dungu lowa iba gana lalu haabo holoma̱ya
í̠na egerebagi bibahendengi í̠naga gubalini haho wiaabo holeneme inaha to̱lotagiho helaga bibe.
15 Í̠na mali dewani ina genda yu dindihaore warapeho helarigonigo
ai áyu ina lone mo turuho helabe.
Ina genda yu hemane mali piyago daga lowa
mali o biagoni taheni turuho hama poloma̱ya ina mo turu habe.
16 Í̠na biabe hongohe gibi beredaru í̠naga biabe biahaga kamaru ina hondoloma̱ya walia habe.
Inanaga waneigini maha hararu tibi í̠naga hongo holene baya tara tara ngeru hendelo mo walia habe.
17 Anduane Homogo inanaga Ngode Datagaliwabe-o
iname í̠ duniniore ke mitangi bialu haramaligo f 
í̠na inahondo dara halu baya turubini bigi bibe.
Iname mbirale bigi beramaru bayale haga bialu
lini daga bilo buluma̱ya mo hongo habe.
Copyright information for `HUI