a94.1Ais 35.4, Nah 1.2, Lm 12.19
b94.3Yob 20.5, Iba 13.2
c94.9Har 4.11, Min 20.12
d94.10Yob 35.11, Iba 44.2, Ais 28.26
e94.11Yob 11.11, 1 Ko 3.20
f94.12Yob 5.17, Min 3.11, 1 Ko 11.32, Hi 12.5
g94.141 Sml 12.22, Lm 11.1-2
h94.18Iba 38.16
i94.22Iba 59.9, 62.2, 62.6

Psalms 94

Anduane Homogohanda wali agali ko biagabi bayale biagabi tigatiga dabolebirago ogo

Anduane Homogo í̠ Ngode Datagaliwabeore howa a 
wali agali mana ko biaga karume biyarunaga pani nelo mirili.
Áyu í̠naga lembo holene ngego tihondo mo walia habe.
Wali agali bibahende í̠naga deni íbu hai helolebere.
Wali agali mine haga karume mana ko biyarunaga pani nelo abale mule ibabe.
Mana ko biaga bu karume mana ko bialu turuho helo henge agua agima muleberebe. b 
Anduane Homogo-o tinaga henge agira ngabe.
Agali ko biaga karume mana ko biyagonaga turu haga bialu
mine ho helo horo agiru heloleberebe.

Anduane Homogo-o uruni tigua í̠naga wali agali bo hengedape halu
genda timbuni mo mialu kagoni ndobe.
Wali dalo berearubi waneigini ai̱ya abala homene karubi
tigua bo wahai haga ka.
Wali agali dindi taraha howa inanaga dindini íbu hene karu
homelo bo wahai halu biaga.
Tigua lalu, Anduane Homogohanda ina de nahendeda.
Isaraele wali agalinaga Ngode Datagaliwabehanda iname bialu kamarunaga manda nabi
bame kago waha, laga ka.

I̱naga wali agaliru-o tígua mana ko dege biaabo halu kamigo agua beremibe.
Tí wali agali mini nawi lulu ale kamigo angi mini wiadai buleberemibe.
Ngode Datagaliwabehanda inanaga hale wabu helenego
ibu bi hale habe nahe kabe. c 
Ibugua inanaga de wabinigo
ai ibu de handabe nahedabe.
10 Hameigini tara tara dindi bibahendeha karume ko biragola d 
ibugua ti mo tiga bialu pani namulebirabe.
Ibugua wali agali lawai haga kago ibuha manda mbira nawi kabe.
11 Anduane Homogo ibugua wali agalinaga miniha bibahende ngaru manda biaiho ka. e 
Tigua ogoale bule lomanda manda bu kago hondowa
ibugua mbirale uruni bibahende tagira napolebira mandabu ka.

12 Anduane Homogo-o í̠na wali agali mo tiga biriru ti turuho ka. f 
Í̠naga mana lowini ngego lawai hene karu tibi turuho ka.
13 Í̠na ogonidagua bini karu ti miniha dungulo kane dege
agali ko biaga karu ti homai halu homaliha piai helo
í̠ maliaho haga ke.
14 Anduane Homogohanda ibunaga wali agali yu wa nahaga ka. g 
Heneneore ibugua ibunaga wali agali bu karu
erembira mialu yu wanahagaore ka.
15 Mani howa agali godi lararume tigatiga dege lolebira.
Ani laragola hale howa wali agali tigabi karume
bi ogoni talialu bialu holebira.

16 Mbiralime i̱ biamogo bialu agali ko hearu bope hayago aibe.
Mbirali i̱la mandagi howa agali ko biaga hearu ko nabilonaga
i̱ biamogo biyago aiwabe.
17 Anduane Homogohanda i̱ biamogo nabinidale
nde i̱ homene dininiru piagagoha abale pu kole.
18 I̱na lomanda bialu koria i̱ ge harogoria gondo lalu i̱ pilarogonigo laru. h 
Ai Anduane Homogo-o í̠naga gubalini haabo hariligome
í̠naga gime yania harigola i̱ pi nale bayale kogoni.
19 Horo i̱ genda ho kongi howabi ko ngarunaga mini dege dindiho hewagolabi
í̠nime i̱naga mini mo palia halu i̱ turuho helarigoni.

20 Agali haguane tigabi ndo ko dabaga karu baba
í̠ biabe mandagi nabiaga kegoni.
Agali ko uruni tigua wali agalime mana ko biraru hondowa
karulape dege bira lalu ani bialu helo wahaga ka.
21 Tigua wali agali ko nabi bayale biaga karu mo ko hole ndinde laga ka.
Wali agali tiha ko nawi karu homelo bo wahole
ko biaga urunime manani helalu kagua dabaga ka.
22 Anigo Anduane Homogohanda hongoheore howa i̱ biamogo biaga ka. i 
I̱naga Ngode Datagaliwabehanda i̱ baya hanguore handayaho haga kagoni.
23 Tigua mana ko dewaore biyagonaga ibugua emena ko ngaru tihondo mo mulebira.
Tinaga ko biyaru mitangi bialu tini homelo ibugua ti bo wahai holebira.
Anduane Homogo inanaga Ngode Datagaliwabehanda ti bo wahaiore holebira.
Copyright information for `HUI