a98.1Har 15.6, Iba 33.3, 40.5, Ais 52.10
b98.3Iba 22.27, Lg 1.54, 1.72

Psalms 98

Anduane Homogo ibu wali agali bibahende handame ho haga kago ogo

Anduane Homogohondo iba gana gahenge lama. a 
Ibugua mbirale baya tara tara biai hayagoni.
Ibuninaga hongo timbuni kagomebi ibunaga mana baya burugule ngagomebi
ibugua waitigi bope hai hayagoni.
Anduane Homogohanda wai buwa i̱na wayali haru lalu latagi haya.
Ibugua Isaraele wali agaliru pele mialu haru dai bulenaga
hongo timbuni wali agali tara tara bu hearuhondo walia hayagoni.
Ibugua ibunaga bi lowiniru mitangi bialu b 
Isaraele wali agalihondo gubalini haabo halu ti yu wanaheore heneya.
Inanaga Ngode Datagaliwabehanda ina waitigi bope halu ina haru dai biyago
wali agali dindi bibahendeha bu hearume hale halu manda biaiore haya.

Wali agali dindi bibahendeni kamiru
tígua Anduane Homogohondo turu halu iba gana ladaba.
Bu miniha dungulo holenaga iba gana turu howa dalimu lalu
ibunaga mini yaraga hadaba.
Anduane Homogonaga mini yaraga halu iba gana ladaba.
Ngida aleru baya hangu balu bi bayaleru lelo badaba.
Pilipe biguliru pu lalu bi hongo howa ladaga halu
Anduane Homogo ibuni inanaga kini kago lalu
ibunaga mini yaraga hadaba.

Iba solowara bedego í̠bi ibaha wena tara tara bedamirubi
tígua bi hongo howa ladaga hadaba.
Dindi í̠bi wali agali dindini kamirubi
tí bibahendeme iba gana ladaba.
Iba timbuni poramiru tíguabi nde gi habe badaba.
Dindi hari wedemiru tíguabi nde turu howa
Anduane Homogonaga deni iba ganaru ladaba.
Irane ibugua dindi bibahendeni handameho howa haru hole ibiragonaga ani bidaba.
Ibugua ibunaga mini bayale tigabi ngagome
wali agali bibahende haru haabo holebira.
Copyright information for `HUI