a99.1Har 25.22
b99.7Har 33.9
c99.8Dag 14.20, Man 9.20, Yar 46.28, Seb 3.7

Psalms 99

Anduane Homogo ibu kini duniniore kago ogo

Anduane Homogo ibu kiniore howa handame ho ka. a 
Wali agalirume ibuhondo gi howa duru lalu haga.
Dahuliyali babaganehe kirali kago labo dindiha helowa
ibu de handape howa handayaho kagola
dindi dumbirumbi bialu haga.
Anduane Homogo ibu Saiononi howa hongo timbunihe kagoni.
Ibugua hameigini tara tara dindi bibahendeha karu
handame howa haru hai ka.
Wali agali bibahendeme ibu kini duniniore howa mini lene ka lalu
ibunaga mini yaraga holebira.
Ibu mini tigabi baya buruguleore kagoni.

Kini hongo haiheore-o í̠ mana bayale tigabi ngago dege hame laga kegoni.
Í̠na mana bayale tigabi lo ngegoni
ina Isaraele wali agalirume bialu haabo holoma̱ya ngirigoni.
Wali agali tara karume biraru hondowa
iname tigatiga mo tale bialu holoma̱ya mo walia hari.
Anduane Homogo inanaga Ngode Datagaliwabe kagonaga mini yaraga holene nga.
Ibuni kagoha hapara howa ibu mitangi bialu lotu lalimu.
Ibu mini tigabi baya buruguleore kagoni.

Mosese Aronola libu Anduane Homogonagaloma binigo mo miaga agali hene.
Samuele ibugua ibuhondo bi laga hene.
Uruni tigua Anduane Homogo olayagola
ibugua tinaga bi hale haga hene.
Ibuni hari beraliba timbuni heagoha howa b 
ibugua tihondo bi lamigi bini.
Ibugua ibunaga mana bulene winiru ti lamigi biyagola
tigua hale halu biai haga hene.

Anduane Homogo inanaga Ngode Datagaliwabe-o c 
í̠naga wali agalirume í̠hondo bi layaru hale halu ladai birigoni.
Tigua mana ko birarunaga pani nelo miaga kego howa dege
í̠ni Ngode Datagaliwabeore howa ko uruni domo wahai haga kego ti walia harigoni.
Anduane Homogo inanaga Ngode Datagaliwabe kagonaga mini yaraga hama.
Ibunaga hari loma bini kagoria howa ibu mitangi bialu lotu lama.
Anduane Homogo inanaga Ngode Datagaliwabe ibu tigabi howa baya buruguleore kagoni.
Copyright information for `HUI