a14.1Ese 9.4, Mo 3.12, 5.6, 7.3-4, 13.16
b14.2Ese 1.24, 43.2, Mo 1.15, 5.8, 19.6
c14.3Iba 149.1, Ais 42.10, Mo 5.9, 7.4, 15.3
e14.42 Ko 11.2, Eb 5.27, Ya 1.18, Mo 3.4, 5.9
f14.5Iba 32.2, Seb 3.13, Eb 5.27
g14.6Eb 3.9-11, Mo 8.13, 13.7
h14.7Neh 9.6, Iba 124.8, Ab 17.24, Mo 10.6, 15.4
i14.8Ais 21.9, Yar 51.8, Mo 17.2, 18.2-3, 18.21, 19.2
j14.9Mo 13.12-17
k14.10Pig 19.24, Iba 11.6, 75.8, Ais 51.17, Yar 25.15, Ese 38.22, Mo 15.7, 16.19, 18.6, 19.20, 20.10, 21.8
l14.11Ais 34.10, Mo 13.12-17, 19.3
m14.12Mo 12.17, 13.10
n14.131 Ko 15.23, 15.58, 1 Te 4.16, 2 Te 1.7, Hi 4.10, Mo 20.6
o14.14Ese 1.26, Dan 7.13, Mo 6.2
p14.15Yar 51.33, Yol 3.13, Mo 14.18, 16.17
q14.18Yol 3.13, Mo 16.8
r14.19Mo 19.15
s14.20Ais 63.3, Dug 1.15, Hi 13.12, Mo 11.8, 19.14-15

Revelation of John 14

Nogo Sibi Igini biagobi ibunaga wali agalibi te ogo

I̱na lone handalu hewaria Nogo Sibi Igini biago Hari Saiononi heyu hearia handaru. Nogo Sibi Igini ogoni baba mandagi wali agali daosini handari mbirani pira mariani maria (144,000) ti wanakuini ibunaga minibi ibu Abanaga minibi gilibu wu hearia handaru. a  Ogoni hondowa hale halu hewaria dahuliya andagaha howa bi mbira iba pora bialu ue laradagua bialubi hari kilikulu dalimuore laradagua bialubi layuagola hale haru. Bi ogoni agali dewame ga̱wa̱ ale timbuniru laradagua layuagola hale haru. b  Wali agali daosini handari mbirani pira mariani maria (144,000) biaru ti Ngode Datagaliwabenaga handame ho biragane dagiabi holenehe mariali helene biarubi dahuliyali haru haga biarubi uruni buhayagi heyu hea handaru. Tigua iba gana gahenge tini hangume labehe wiaru lalu hea. Wali agali bibahende bu hearuni aria tini dege Ngode Datagaliwabehanda pele mialu haru dai biya. c  Agali uruni ti wali baba mandagi nahaga miniha ko mbira para naheore ka. Nogo Sibi Igini biago poradagua talima piaga ka. Ti wali agali bibahende bu hearuha howa Ngode Datagaliwabehanda pele mialu ibuhondobi Nogo Sibi Igini biagohondobi ti piganeore lomabu mini ka.
(14.4)Bi ogoni gilibu ngago marume mitangi bialu bi yobage gilibu nga mitangi biaga. Agali biaruni ti Ngode Datagaliwabehondo mini mbiraore wialu mini kira nawiagabi ko nabiagabi hene.
,
e 
Tigua ke̱ mbira hayaria nahende tiha ko mbira nawiore. f 

Dahuliyali tebiranaga te ogo

I̱na handa ho dege wiwaria dahuliyali mbira hari daligani yagalo yalu piyaria handaru. Ibugua wali agali dindi bibahendeha tingini tara tara karubi hameigini tara tara karubi bi tara tara laga karubi wali agali dindi tara tarani karubi bibahendehondo haabobo holene Bi Mana Debene lope hole yagalo yalu piyaria handaru. g  Dahuliyali ogoni ibugua bi hongo howa laraga halu lalu, Ngode Datagaliwabe mini lene ka lowa ibu timbuniore kagonaga mini yaraga hadaba. Ibugua wali agali bibahende daba ki bulene áyu íbu nga. Ngode Datagaliwabe ibunioreme hari daligabi dindibi iba solowarabi iba duguararubi wabinigo ibuhondo ge duli hangaho biruwa ibu mini yaraga hadaba, lalu layuane hale haru. h 

Ai i̱na handa ho dege wiwaria dahuliyali biago piyadagua dahuliyali mendebi talima pialu hearia handaru. Ibugua pialu howa lalu, Babilono mini lene timbuni podo ibira haya. Ibu podo bagabu ibiraore haya. Ibugua wali agali bibahende hearu ibunagawaini iba nelo mo na haya. Ibunaga waini iba ogoni wali agalime dimagoli tara halu kayu bilonaga mo na haya, lalu layago hale haru. i 

I̱na handa ho dege wiwaria ai dahuliyali kira pigane ma bambala piyago piyadagua dahuliyali tebonego pialu bi hongo howa laraga halu lalu, Mbiralime nogo tara biagohondobi ibuni heagobiore wabu wini biagohondobi bi pupu wialu wanakuiniyaguabi giniyaguabi magi biago helayago j  10 ogoni ibuni Ngode Datagaliwabenaga waini iba nolebira. Waini iba ogoni Ngode Datagaliwabenaga keba holene gibiore hada nabi howa beha odo bereleda. Ani bidago wali agali nogo tara biagohondo bi pupu wialu magi biago karule karu ti dahuliyali loma bia hene hearubi Nogo Sibi Igini biagobi wanakuihayagi ira timbuni ege to̱le̱ ale mini saloba heba da ho wiagoriani dalu tandaga taraore nalu holebira. k  11 Ti tandaga taraore helo ira daragonaga hagua iraga ha dege bialu kane iraga ha ho wulebira. Ani buwa wali agali nogo tara biagohondobi ibuni heagobiore wabu wini biagohondobi bi pupu wialu nogo ogoninaga mini magihe karu ti mini íbu holene horombe mbiragabi nawulebira, lalu layago hale haru. l 

12 Ani bulebiragonaga Ngode Datagaliwabenaga wali agali ibugua, Bilimu, lo wiyadagua bialu Yasuhondo mini bilinahe ho haabo karu ti hibu lalu hongo ha ho wiaabo holene nga. m 

13 Ani hondowa hale ha dege bialu hewaria bi mbira dahuliya andagaha howa ladali halu lalu, Bi o larogo gili bia. Wali agali áyu ogoni howa Anduane Homogonaga biabe bialu kaore homararu ti turu ho holebira, lene. n 

Ani layagola Ngode Datagaliwabe Dinini ibugua ladai bialu lalu, E̱ aniore bulebira. Tigua biabe erekuibi bialu hayago yolo ereba nahe tinaga wiaabo halu ha̱lo birulene karulowa turu howa mini íbu birulebira, lalu layago hale haru.

Dindini tomo ngaru mo mogo bulene ogo

14 I̱na handa ho dege wiwaria hari beraliba pele mbira handaru. Beraliba pele ogoriani mbirali agali handalehe berea. Ogoni ibugua ibunaga haguaneni haru haga manda ngolome wabini karulo halu ibunaga gime ayu tibu widi gandulaga garayabi mbira ne gadele yu hearia handaru. o  15 Handa dege bialu hewaria dahuliyali mende Ngode Datagaliwabenaga andaha howa tagira ibalu ibugua agali handalehe beralibani birayagohondo bi dalimu olaraga halu lalu, Dindini widi boga biai halu gandu lolene tu áyu íbu ngagonigo í̠naga ayu tibu garayabi yidegome widi gandula, laya. p  16 Ani layagola mbirali beralibani birayago ibugua ibunaga ayu tibu garayabi biago yarali halu dindini widi hearu gandu laya.

17 Handa ho wia dege biwaria dahuliyali mendego dahuliya andaga Ngode Datagaliwabenaga andaha howa tagira ibalu ibuguabi ayu tibu garayabi ne gadele yalu ibiyago handaru.

18 Ani bialu dahuliyali mendebi ibugua lomabu delagane dabuni ira deago handaya ho haga heago ibu o heagoria howa tagira ibiya. Tagira ibuwa ibugua dahuliyali ayu tibu garayabi ne gadele yu hayagohondo laraga halu lalu, Pu mbira lini daga minigerebi dedaru ibirayadago í̠naga ayu tibu garayabi yidegome dindinaga mabuni howa gandula, laya. q  19 Ani layagola dahuliyali ayu tibu garayabi yu hayagome dindini ya dali halu gerebi mini dearu gandu laya. Gandu lowa ibugua gerebi lini biaru Ngode Datagaliwabenaga keba holenenaga pingidagane wiagoha mo bape haya. r  20 Ani biyagola tano timbuni tagirahayagi gerebi lini biaru pingidagane wiagoria pingida tagi haya. Ani biyagola gerebi lini pingidagane timbuniore ege to̱le̱ wiagoha howa darama tagira ibiyago iba li timbuni magi lu kilomida handari tebira (300) alebi ulinaga magi mida kira alebi ibiyaria handaru. s 

Copyright information for `HUI