a16.1Iba 69.24, Ais 66.6, Yar 10.25, Ese 22.31, Seb 3.8, Mo 14.10, 15.1, 15.7, 16.17
b16.2Har 9.10, Man 28.35, Mo 8.7, 13.12-17
c16.3Har 7.17-21, Mo 8.8-9
d16.4Har 7.17-21, Iba 78.44, Mo 8.10
e16.5Iba 119.137, Mo 1.4, 1.8, 11.17, 15.3
f16.6Iba 79.3, Ais 49.26, Md 23.34-35, Mo 11.18, 13.15, 18.20
g16.7Iba 19.9, Mo 13.10, 15.3, 16.14, 19.2
h16.8Mo 8.12, 14.18
i16.9Dan 5.22-23, Mo 9.20-21, 11.13, 14.7, 16.21
j16.10Har 10.21-22, Ais 8.22, Mo 9.2, 11.10, 13.2
k16.11Mo 9.20-21, 16.21
l16.12Ais 11.15, 41.2, 41.25, Yar 50.38, Mo 9.14
m16.131 Yo 4.1-3, Mo 12.3, 12.9, 19.20, 20.10
n16.142 Te 2.9, 1 Ti 4.1, Ya 3.15, Mo 16.7, 17.14, 19.6, 19.15, 19.19-20
o16.15Md 24.43-44, Lg 12.39-40, 2 Ko 5.3, 1 Te 5.2, 2 Pi 3.10, Mo 3.3, 3.18
p16.16Hgn 5.19, Seg 12.11, Mo 19.19
q16.17Mo 16.1
r16.18Dan 12.1, Mo 4.5, 8.5, 11.13, 11.19
s16.19Ais 51.17, Yar 25.15-16, Mo 14.8-10, 17.18, 18.5
t16.20Mo 6.14
u16.21Har 9.23-24, Mo 11.19, 16.9-11

Revelation of John 16

Ngode Datagaliwabenaga keba holene ndisi beha winigonaga te ogo

Ogoni hondowa hale halu hewaria Ngode Datagaliwabenaga anda biagoha howa dahuliyali kariali biaruhondo bi mbira dalimuore layuago hale haru. Hale halu hewaria ogodagua layua. Ngode Datagaliwabenaga keba holene ndisi be kariaha ngaru dindini odope hole pudaba, lalu layuago hale haru. a 

Ani layagola dahuliyali mbirago ibugua puwa ibunaga ndisi beha yayago dindini odope haya. Ani biyagola wali agali nogo taranaga magi ho hayarubi nogo tara ogoni ibuni kagobiore wabu wiyagohondo bi pupu wiyarubi uruni ti bibahendeni dere ti̱wa̱ ale tandaga timbuni bialu bia pani haya. b 

Dahuliyali mendego ibugua ibunaga ndisi beha yayago iba solowarani odope haya. Ani biyagola iba solowara biago mbirali homenenaga darama ale bu hinalu iba solowaraha berelene biru wiaru bibahende homai haya. c 

Dahuliyali tebonego ibugua ibunaga ndisi beha yayago iba piyaruriabi iba duguayaruriabi odope hayagola iba uruni darama bu hinaya. d  Ani biyagola hale halu hewaria dahuliyali iba damene bibahende hondo heagome lalu, Ngode Datagaliwabe í̠ Baya Buruguleore ala henegobi áyu kegoni. Í̠na daba ki birigo tiga tiga hangu dabarigoni. e  Tigua Ngode Datagaliwabenaga wali agali henerubi Ngode Datagaliwabe manalatagi haga henerubi ti balu darama pelayagonaga í̠na ti darama nelo mo miri. Ani mirigo ti mulene wiadaguaore miri, lalu layuagola hale haru. f  Ogoni hale howa hale halu hewaria mbirale lomabu delagane dabu heagoria howa bi mbira layuagome lalu ogodagua layua. Anduane Homogo Ngode Datagaliwabe Hongo Haiheore kego í̠naga daba ki bulene henene ngagoriabi tiga tiga ngagoriabi hangu daba ki birili, lalu layuagola hale haru. g 

Dahuliyali manego ibugua ibunaga ndisi beha yayago nini odope haya. Ani biyagola ni poboyogo gibiore dayagome wali agali delo henge miya. h  Wali agali uruni ni poboyogobi dayagome dayagola tigua bolene hongo uruninaga haru haga Ngode Datagaliwabe kago ibunaga mini ha haya. Ani biyago tigua tinaga ko biyaru wahalu mini beregedowa Ngode Datagaliwabe gibiore kagonaga mini yaraga nahaya. i 

10 Dahuliyali daunigo ibugua ibunaga ndisi beha yayago nogo ko tara biagonaga haru howa biragane dagiani odope haya. Ani biyagola nogo tara biagonaga haru holene wiagoria aruma haame hayagola wali agalime tandaga nalu tininaga hége neme pugu naya. j  11 Ani bialu tigua tandaga nayagonagabi dere bu hayagonagabi dahuliya andaganaga Ngode Datagaliwabe ha halu haya. Ani bialu hayago howa tigua tinaga mana ko bialu hayaru wahalu mini beregeda nabiya. k 

12 Dahuliyali waraganego ibugua ibunaga ndisi beha yayago iba timbuni mini Yuberedisi piyagoria odope haya. Ani biyagola ni tagira ibiragohayagi howa kini hearu ibilonaga hariga wilo iba o biago hundiai haya. l  13 Ani biyagola handalu hewaria dama tebira yago handalehe hearia handaru. Dama tebira uruni tiabagua ale biagonaga ne harigaha howabi nogo tara biagonaga ne harigaha howabi mana henene ngadagua ndolatagi haga mbira heagonaga ne harigaha howabi tagira ibalu hearia handaru. m  14 Dama uruni ti dama koore agalime nabiagane ale bialu hagagonaga dama hea. Dama tebira urunime dindi tara taranaga kini bibahende karu karia piagago pialu kini uruni bibahende Ngode Datagaliwabe Hongo Haiheore kagonaga Horo timbuni harangi wai bilonaga haru íbu mogo bule piaga. n 

15 Anduane Homogo ibugua lalu, Ai hale hadaba. I̱ pageali ohowa ibagadagua ibulebero. Ani buleberogo mbirali ibu wali agali bu kagoria ti babe napolebi taga naholebi ibunaga aga mamage halu palia nabi dengala ho kagome turu ho holebira, lalu laya. o 

16 Dama tebira biarume kini biaru dindi mbira Hiburu bi lalu mini Amagedono wiagoria haru íbu mogo biya. p 

17 Dahuliyali kanego ibugua ibunaga ndisi beha yayago daliga lira odope haya. Ani odope heagola Ngode Datagaliwabenaga andaha handame ho biragane dagia wiagoria howa bi mbira dalimu laraga halu lalu, Ai biaiore ogoni, layuago hale haru. q  18 Uruniore biai heagola hari dababi hari kilikulubi hari kulu timbunibi dumbirumbi gibiorebi biya. Dumbirumbi o biyadagonibiore mbira wali agali wabiniyangi howa biyariabi nahendenego áyu o biyadagoni maru biraliru bagi hene lowa gibiore biya. r  19 Tano timbuni wiago bu̱la tebo bialu dindi bibahendenaga tano wiaru poda holobiya. Ani biyagola Ngode Datagaliwabehanda Babilono tano mini lene timbuni biago mitangi bu dai bialu ibunaga beha howawaini iba ibunaga keba gibiore holene nelo mo na haya. s  20 Dindi iba dege dombeneha wiaru bibahende pu ereba halu hari wearubi bibahende ligua piyabe nigua piyabe toba halu nahandabehe haya. t  21 Dalu dindi guni timbuniore genda to̱le̱ timbuni genda magi kilogarama pira duria (50) ale hari daligaha howa wali agalini ibira haya. O ibira hayadagoni bolene hongo gibioreyago wali agali Ngode Datagaliwabe ha hayaru biarume tini ibira haya. u 

Copyright information for `HUI