a2.1Mo 1.16, 1.20
b2.22 Ko 11.13, 2 Pi 2.1, 1 Yo 4.1, Mo 2.9, 2.13, 2.19, 3.1, 3.8, 3.15
c2.3Ga 6.9, Hi 12.3-5
d2.5Md 21.41-43, Mo 2.16, 2.22, 3.3, 3.19
e2.6Iba 139.21
f2.7Pig 2.9, Ese 28.13, 31.8, Md 11.15, Mo 2.11, 2.17, 2.29, 3.6, 3.13, 3.22, 22.2, 22.14, 22.19
g2.8Ais 44.6, 48.12, Mo 1.17, 22.13
h2.9Lm 2.17, 2 Ko 11.14-15, 1 Ti 6.18, Ya 2.5, Mo 3.9
i2.10Md 10.22, 10.28, 24.13, 2 Ti 4.8, Ya 1.12, Mo 3.11
j2.11Mo 13.9, 20.14, 21.8
k2.12Ais 49.2, Mo 1.16
l2.13Mo 3.8
m2.14Dag 22—24, 25.1-3, 31.16, Man 23.4, Ab 15.29, 1 Ko 6.13, 8.9, 2 Pi 2.15, Yu 11
n2.16Ais 11.4, 2 Te 2.8, Mo 1.16, 3.11, 19.15, 19.21, 22.7, 22.12, 22.20
o2.17Har 16.4, 16.14-15, 16.33-34, Ais 62.2, 65.15, Yo 6.48-50, Mo 2.7, 2.11, 3.12, 19.12
p2.18Mo 1.14-15
q2.201 Kin 16.31, 2 Kin 9.7, Ab 15.20, 15.29, 1 Ko 10.19, Mo 2.14
r2.21Lm 2.4, Mo 9.20
s2.23Iba 7.9, 62.12, Yar 11.20, 17.10, Lm 8.27, 2 Ko 5.10, 2 Ti 4.14, Mo 20.12-13
t2.25Mo 3.11
u2.26Md 19.28, Yo 6.29, 1 Ko 6.3, 1 Yo 3.23, Mo 20.4
v2.26-27Iba 2.8-9
w2.27Dan 7.22, Mo 12.5
x2.28Mo 22.16

Revelation of John 2

Ebesa tanoni Keriso hameigini hearuhondo bi gilibu wia henego ogo

Í̠na Ebesa tanoni Keriso hameigini karunaga dahuliyali kagohondo bi ogo gilibu wia habe.

I̱ mbirali yakundi karia biaru gi tigame yuwa lamu hale irane karia ngolome wabini biaru ngagoha ibaga bialu howa i̱na bi ogo tíhondo lo wia haro. a 
Tígua birimigoni manda bido. I̱na tí erekui biabe birimigobi hongo ho haabo harimigobi manda bido. Tí agali ko biaga karu hame nalaga kamigo i̱ manda bido. Tígua agali maru bi layaru tiabosolo henenedabe hondole ba handarimi. Ba hondowa ti abosolo henene howa ndo ke̱ haga heneyane handa walia harimigoni. b  Tí ema nabi hibu lalubi i̱ hame lewadagua bialu howa genda halu tandaga nalu howabi yu wa nahe haabo harimigoni. c  Tígua ogonidagua bialu ha kamigonigo mbirale mbira i̱ hame naledogo ogo. Ala tígua i̱ gubalini ho harimidagua áyu nahe kamigoni. Ala tí bayale birimigo áyu ko agua birimadabe hondole mitangi bu dai bidaba. Ani mitangi buwa mini beregedalu ala birimidagua bia dai bidaba. Tí ogonidagua nabi ko birimigo wa nahe harimiyagua i̱na tí kamiria ibalu tínaga lamu hale irane biago ngagoria howa i̱ni yamulebero. d  Ani anigo tígua mbira bayale bialu kamigo ogo. Nigolasi talima piagarume biaganego i̱na hame nalarulidagua tíguabi hame nale kamigoni. e 

Tí halehe kamiyagua Ngode Datagaliwabe Dinini ibugua Keriso hameigini kamiru tí bibahendehondo bi larago agi larabe hale haramine. f 

Keriso hameigini wai bialu wayali hararu ti hangu hanguhondo lamialu, Í̠na haabo holene ngiaganenaga ira Ngode Datagaliwabe mabuha kago ira ogoninaga lini do nabe, lolebero.

Simena tanoni Keriso hameigini hearuhondo bi gilibu wia henego ogo

Í̠na Simena tanoni Keriso hameigini karunaga dahuliyali kagohondo bi ogo gilibu wia habe. g 

I̱ mbirali pigane henegobi maha holeberogobi ala homowa ai heyu dai bu kogome i̱na bi ogo tíhondo lo wia haro.
Tígua genda howa tandaga nalu kamigobi tí yagibano kamigobi manda bu kogoni. Ani bia bidamigo tí homogoore kamigoni. Marume, Ina Yu wali agali kama, lalu hetingi howa tigua tí mege bialu bi koore layago manda bido. Uruni ti dama Heyolabe aria ka. h  10 Tí mbirale ngarunaga tandaga noleberemigo gi nahe halimu. Hale hadaba. Dama Heyolabeme tí kamiru aria maru garabaya bu helalu agi beramibe hondole ko mo bia holenaga bulebira. Genda halu tandaga nalu kamine horo pira polebira. Homolene wiyaguabi mini bilinahe howa i̱hondo mini mbiraore wiaabo halimu. Ani wiaabo howa wayali haramigonaga yolo haabo holene ngulebero. i 

11 Tí halehe kamiyagua Ngode Datagaliwabe Dinini ibugua Keriso hameigini kamiru tí bibahendehondo bi larago agi larabe hale haramine. j 

Keriso hameigini wai bialu wayali hararu ti halu mende homolene ngagome ela naholebira.

Pegamamu tanoni Keriso hameigini hearuhondo bi gilibu wia henego ogo

12 Í̠na Pegamamu tanoni Keriso hameigini karunaga dahuliyali kagohondo bi ogo gilibu wia habe. k 

Mbirali i̱ wai biagane ayu tibu ne kiroba gadeleore yidogo i̱na bi ogo tíhondo lo wia haro.
13 Tí dindini kamigo dama Heyolabe ibunaga haru haga biragane dagia ngagoria kamilo manda bido. I̱hondo mini mbiraore wiaabo halu tígua i̱naga mini yu wa nahe hongo howa yani haabo kamigoni. Dama Heyolabe heagoria agali mbira mini bilinahe i̱naga mo walia haga Andibasi heago marume ibu homelo bayagolabi tígua i̱hondo mini mbiraore wiaabo harimigoni. l  14 Anigo mana maru tígua beramiligo i̱ hame nale kogo ogo. Tí kamiru aria marume Balamahanda mana lawai henego bialu ka. Balama ibugua Balaga biawai halu ogodagua bia lalu Isaraele wali agalime ko bilo mo bia hene. Tomo tara tara damahondo bo minigo nelo mo noa halubi wali agali kayu bilo lawai halubi hene. m  15 Anidagua dege wali agali marume Nigolasi arianaga mana ngaru bialu haga tí heba mandagi bu ka. 16 Mana ko uruni bialu kamiru wahalu mini beregedadaba. Ani nabirimiyagua i̱na abale tí kamiria ibuwa i̱naga ne harigaha howa wai biagane ayu tibu tagira ibiragome wali agali uruni baba wai bulebero. n 

17 Tí halehe kamiyagua Ngode Datagaliwabe Dinini ibugua Keriso hameigini kamiru tí bibahendehondo bi larago agi larabe hale haramine. o 

Wai bialu wayali hararu tí hangu hanguhondomena wia do henego nelo mulebero. Ani mialu i̱na ege to̱le̱ pele mbira mbirani mini gahenge gilibu ngago ti hangu hanguhondo mulebero. Mini gahenge gilibu ngago ogoni bibahendeme manda nabi kagola mo yarago ibuni hangume manda bulebira.

Taiadaira tanoni Keriso hameigini hearuhondo bi gilibu wia henego ogo

18 Í̠na Taiadaira tanoni Keriso hameigini karunaga dahuliyali kagohondo bi ogo gilibu wia habe. p 

I̱ Ngode Datagaliwabe Igini i̱naga de ira hungu alebi i̱naga ge ege to̱le̱ boronosi demborerebi ngaligobi kogo i̱na bi ogo lo wia haro.
19 Tígua bialu kamigo i̱ manda bu ko. Tínaga gubalini holenebi mini bilinahe holenebi biabe bialu holenebi ema nabi howa hibu lolenebi tígua pigane bialu harimidagua ndo áyu timbuni bialu kamigo manda bu ko. 20 Anigo mbira nakarulape bialu kamigo ogo. Wali Yasebele ibugua ke̱ howa lalu, I̱ Ngode Datagaliwabe manalatagi haga bedo, larago tígua mo tiga nabi kamigonaga turu nahe ko. Ibugua mana lawai haragome i̱naga biabe bia haga karu wali agali kayu bilobi tomo damahondo bo mini ngaru nelobi haru pu tara haga beda. q  21 I̱na ibu ko bialu kago wahalu mini beregedelo henge mia mirugolabi ibugua kayu bulene ogoni wahoa nahe beda. r  22 Ibu ogonibi bedagonaga ibubi agali ibu baba kayu biyarubi ga̱i̱ bibi timbuni hendelo i̱na ibu paliagane dagiani mo ba amu holebero. Tigua wali biago baba mana kooreru bialu haga wiyaru wahalu mini beregeda nabiyagua i̱na abale ogonidagua bulebero. 23 Wali ogoni haruru piaga karubi homelo bo waholebero. Ani berogola Keriso hameigini tano bibahendeha bu karume i̱na wali agali bibahende hangu hangunaga mitangi bidarubi hame ledarubi manda biaiore ho kogo ti manda bulebira. I̱na tí hangu hangume bialu harimidagua yolo ngia dai bulebero. s 

24 Ani bia buleberogo tí maru Taiadairani kamirume mana ko ogoni haruru napirimi. Marume dama Heyolabenaga mana do ho nga laraligo tígua lo manda nabi harimigo tíhondo gendabi maru yu halimulo mo ngia nabulebero laro. 25 Anigo i̱ dai bule kogo dai nabido tambu tígua mbirale yu kamigo hongo howa yu ununu lo haabo halimu. t  26 Ani bialu howa wali agali wayali halu i̱na hame ledodagua bia ho wialu bia maro biraru tihondo hongo holene i̱ Abahanda i̱hondo ngiyadagua dege mulebero. Ani bialu tigua wali agali dindi tara tarani bu karu hongo taraore holene yu howa haru helobi be dindime wabini ngaru pambulo holobiradagua bilobi tihondo hongo holene mulebero. Yakundi egabi naledaha huririle tagira ibaganego tihondo mulebero. u, v, w, x 

29 Tí halehe kamiyagua Ngode Datagaliwabe Dinini ibugua Keriso hameigini kamiru tí bibahendehondo bi larago agi larabe hale haramine.

Copyright information for `HUI