a12.1Iba 50.13-14, Yo 4.24, Lm 6.11-13, 1 Ko 6.13, 6.20, Hi 10.20, 1 Pi 2.5
b12.2Eb 1.18, 4.23, 5.10, 5.17, Kl 1.21, 1 Pi 1.14, 1 Yo 2.15
c12.31 Ko 3.10, 12.7, 12.11, Ga 2.9, Eb 4.7
d12.4Eb 4.16
e12.4-51 Ko 12.12
f12.51 Ko 12.27, Eb 4.25
g12.61 Ko 12.28, 13.2, 1 Pi 4.10-11
h12.6-81 Ko 12.4-11
i12.7Ab 13.1, Ga 6.6, 1 Ti 5.17
j12.8Ab 15.32, 20.28, 2 Ko 9.7, 1 Pi 5.2
k12.9Iba 34.14, Amo 5.15, 1 Ti 1.5, 1 Pi 1.22
l12.10Pb 2.3, Hi 13.1, 1 Pi 1.22, 2 Pi 1.7
m12.11Ab 18.25, Mo 3.15
n12.12Ab 2.42, Pb 3.1, 1 Te 5.16-17, Hi 3.6, 10.36, Ya 1.4
o12.131 Ko 16.1, 2 Ko 9.1, 9.12, Hi 13.2, 13.16, 1 Pi 4.9
p12.14Md 5.44, Lg 6.28, Ab 7.60, 1 Ko 4.12, 1 Pi 3.9
q12.15Iba 35.13
r12.16Iba 131.1-2, Min 3.7, Ais 5.21, Yar 45.5, Lm 11.20, 15.5
s12.17Md 5.39, Lm 14.16, 2 Ko 8.21, 1 Te 5.15
t12.18Mg 9.50, Lm 14.19, Hi 12.14
u12.19Man 32.35, Min 24.29, Md 5.39, Lm 12.17, 13.4, 1 Te 1.6-7, Hi 10.30
v12.20Har 23.4-5, Min 25.21-22, Md 5.44

Romans 12

Iname Ngode Datagaliwabenaga howa bulene ngago ogo

I̱ hamene mbaliniru-o Ngode Datagaliwabehanda inahondo dara howa biamogo timbuni biyago mitangi bialu i̱na tíhondo bi hongo howa laro. Ngode Datagaliwabe turu helo tígua ibuhondo tínaga bulenerubi tínibi loma bia ho helalimu. Tígua Ngode Datagaliwabe mitangi bialu tíninaga bu miniha ani birimiyagua lotu henene lolenego ogoni. a  Dindi wali agali karume mana biagadagua bule ndo. Tí minibi mandabi gahenge helo Ngode Datagaliwabehanda tí mo tara helo halimu. Ani bialu howa ibugua hame ledago bayalebi ibu turu helo bulenebi baya buruguleore bulenebi manda bialu holeberami. b 

Ngode Datagaliwabehanda i̱ biamogo bulene nawi howa biamogo bialu i̱hondo mugube ngiyago mitangi bialu tíhondo bi laro. Tígua, Ina karulape kama, mitangi nabilimu. Mine holene nawi manda bialu tí hangu hangu howa, Ngode Datagaliwabehanda mini mbiraore wulene i̱hondo ngiyadagua dege kogoni, mitangi bialu halimu. c  Ina tingini homane mbiraore kamago degeni howa aria tara tarame biabe tara tara beremali. d, e  Ogonidagua ina tingini dewa kamagoni howa Kerisoha ho gimbu buwa homane mbiraore kama. Tingini mbiraoreni hene dege aria tara tara howa gimbu bu kadagua ina Kerisoha ho gimbu bu kamagoni. f  Ngode Datagaliwabehanda ina biamogo bialu mugube tara tara ta hayadagua iname biabe bayuwa bulene nga. Ngode Datagaliwabe mana lamulene mugube yu kamayagua iname ibuhondo mini mbiraore ngamadagua ibunaga mana lamialu hami̱ya. g, h  Biamogo bulene mugube yu kamayagua nde biamogo bialu hami̱ya. Lawai holene mugube yu kamayagua nde lawai halu hami̱ya. i  Ina bi laramagome wali agali marunaga mini elahe helo mo hongo holene mugube yu kamayagua nde wali agali marunaga mini elahe helo mo hongo halu hami̱ya. Mbiralime ibunaga mbirale ngago mbuni nabi howa wali agali maruhondo turu halu talebu mulene nga. Mbiralime haru hagane hongo yu kayagua nde wali agali mitangi bialu bayuwaore haru halu ibunibi biabe bulene nga. Mbiralime wali agali hondowa biamogo bulene irane ngago handayagua nde turu howa biamogo bulene nga. j 

Tígua wali agalihondo gubalini hetingi nahe howa heneneore gubalini ho halimu. Ko ngago handabe manga halu bayale ngago yu tiga biaabo halimu. k  10 Tí Kerisoha howa hamene mbalinima kamalo manda bialu turu howa gubalini hagahaga buwa wali agali maru ala mitangi bialu halimu. l  11 Biabe bibe manga nahe hongo howa bialu halimu. Anduane Homogohondo gubalini heneneore howa ibunaga biabe poboyogobi bialu halimu. m  12 Kerisohondo mini dunubia ho kamigome tí mo turu helo halimu. Mo ko holene tara tara tí kamigoria íbu ngagola ema nabi howa hibu lalu haabo halimu. Horo bibahendengi Ngode Datagaliwabehondo bi laabo halu halimu. n  13 Keriso hameigini maru buru pale karuhondo tínaga mbirale ngamigo talebu milimu. Keriso hameigini ala nahendene tí kamiria ibiraruhondo, I̱ andaga palima ma, lalimu. o 

14 Wali agali marume tíhondo ko tara tara biragola tígua o biarunaga mini lalu Ngode Datagaliwabehondo, Biamogo bia habe, lalu tinaga la halimu. Ha halu pani mibe nale, Biamogo bibe, lalu lalimu. p  15 Turu ho karu heba turu ho halimu. Dara howa dugu bialu karu heba dara howa dugu bialu halimu. q  16 Wali agali ta nabi mitangi bialu bibahendehondo mana mbiraore ale dege biaga halimu. Mine nahe howa biabe emene emene bulene ngago ta nabi biai halimu. Tígua, I̱ mini timbuniwi kogo, lo mitangi nabilimu. r 

17 Mbiralime tíhondo ko biyagua tígua ko bia dai nabilimu. Wali agali bibahendeme mini mbiraore howa, Mana ogoni bayaleda, lai hagayagua o laragoni bialu halimu. s  18 Wali agali ta nabi heba howa mo palia holene tene tí halimu. t  19 I̱ hamene mbaliniru-o pani ba dai nabi Ngode Datagaliwabenaga keba holeneme ba dai bilo tí wahalimu. Anduane Homogonagambugani bi lo ngago ogo, Anduane Homogohanda lalu, Pani mulene i̱naga ngago i̱na ba dai bulebero, lenego, gilibu nga. u  20 Anduane Homogonaga mbugani bi mende lo ngago ogo, Í̠la waitigi kago garibilo kayagua tomo nelo mibe. Ibugua iba noa ho kayagua iba nelo mibe. Ani biriyagua ibugua í̠hondo ko biyago mitangi bialu ibuni taga pani nolebira, lalu gilibu nga. v  21 Ko ngagome tí bope holani hondowa tígua bayale beramigome ko ngago bope halu wayali hole halimu.

Copyright information for `HUI