a9.3Har 32.32
b9.4Har 4.22, 9.4, Man 7.6, 14.1-2, Ab 3.25, 13.22, Eb 2.12, Hi 8.8-10, 9.1
c9.5Md 1.1-16, Yo 1.1, Lm 1.25
d9.6Dag 23.19, Yo 8.39, Lm 2.28, 3.3, Ga 6.16
e9.7Pig 21.12, Ga 4.23, Hi 11.18
f9.8Ga 4.23
g9.9Pig 18.10, 18.14
h9.10Pig 25.21
i9.12Pig 25.23
j9.13Man 21.15, Mal 1.2-3, Lg 14.26
k9.142 Bit 19.7, Yob 8.3, 34.10, Iba 92.15
l9.15Har 33.19
m9.16Eb 2.8
n9.17Har 9.16, Ga 3.8, 3.22
o9.18Har 4.21, 9.12, 14.4
p9.192 Bit 20.6, Yob 23.13, Dan 4.35
q9.20Ais 29.16, 45.9, 64.8
r9.21Yar 18.6, 2 Ti 2.20
s9.23Lm 8.28-30, Eb 1.3-12, Kl 1.27
t9.25Hos 2.23, 1 Pi 2.10
u9.26Hos 1.10
v9.27Lm 11.5
w9.27-28Ais 10.22-23
x9.29Ais 1.9, 13.19, Yar 50.40
y9.30Lm 1.17, 4.11, 10.20
z9.31Lm 10.2-3, 11.7, Ga 5.4
aa9.32Ais 8.14, Lg 2.34, 1 Ko 1.23
ab9.33Iba 118.22, Ais 8.14, 28.16, Md 21.42, Lm 10.11, 1 Pi 2.6-8

Romans 9

Polohanda Isaraele wali agali mitangi bialu genda henego ogo

Bi áyu larogo heneneore laro. I̱ Kerisoha ho gimbu bini kogo lalu ke̱ ndo haro. i̱naga mini Ngode Datagaliwabe Dinini ibugua haru kago mini ogonime i̱hondo heneneore lare lalu langiaga. I̱ aria i̱naga Yu wali agali bibahende karu ti mitangi bialu i̱na genda timbuni handalu gubaliniha tandaga naabo halu ko. Ti Kerisohondo mini mbiraore wilonaga Ngode Datagaliwabehanda i̱ Kerisonaga kogonigo wahalu hariga koha polene ngale i̱na Ngode Datagaliwabehondo, Í̠na i̱nihondo ani bia, labehe kole. a  Ngode Datagaliwabehanda ti ibunaga helo dabo helene. Ibugua ti mo ibunaga waneigini helowa ibunaga wá taraore holene tihondo walia hene. Ibugua tihondo ibunaga bi habo naloleneru laluMana lo wuwa tihondo mini. Tigua Ngode Datagaliwabehondo henene mitangi bialu ibunaga lotu lalu holene manda bu ka. Ibugua, Bulebero, lalubi, Ngulebero, lalubi lo ngago ti hale hene. b  Ti Hiburu agali mini leneore henerunaga aguanene ka. Keriso ibubi agali hole daluwa ti ariaha hene. Ngode Datagaliwabehanda mbirale bibahende handame ho kago ibunaga mini yaraga haabobo helo hamelo ko. Ani bialu helo laro. c 

I̱na bi o larogoni Ngode Datagaliwabehanda, Bulebero, lalu lo ngago habo laya lalunaga ndo laro. Ibugua, Bulebero, lalu lo ngadagua bini. Irane Isaraele wali agali ti bibahende ndo maru dege Ngode Datagaliwabenaga wali agali ka. d  Abarahamanaga aguaneneru ti bibahende ndo maru dege ibunaga waneigini ka. Ngode Datagaliwabehanda Abarahamahondo lalu, Aisaganaga aguaneneru dege í̠naga aguaneneru holebira, lalu lene. e  Ani lenego dindi walime waneigini taba hanagadagua Isaraele aria taba henene karu ti Ngode Datagaliwabenaga waneigini ndo ka. Ibugua bi lalu lo ngadagua lola halu Abarahama aguaneneme taba henene karu ti Ngode Datagaliwabenaga waneigini ka. f  Ogonigo ibuguabi lalu lo ngago ogo, Dai bulene tu harangi i̱ dai bulebero. Dai berogola Sara ibu igiri gali taba honolebira, lalu lo wini. g 

10 Ogoni hangu ndo bi mendebi laro. Lebeganaga igini kira henego libubi aba mbiraore ina mamali Aisaga dege hene. h  11 Anigo Ngode Datagaliwabehanda manda bu henegodagua igiri mende dabenegome bilo ibugua Lebegahondo lalu, Igiri wahenegome igiri heyogonenaga biabe bia holebira, lene. Ngode Datagaliwabehanda bi ogoni igiri biago labo taba naheneha libugua ko bayalebi mbira nabiha howa lene. Anigo libugua biabe biyago hondowa ndo Ngode Datagaliwabehanda mende dabenegome ibugua ani bini. i  13 Anduane Homogonagambugani lo ngago ogo, I̱na Yagaba gubalini halu Iso gubalini nahe haru, lalu gilibu nga. j 

14 Ani binidago manda buwa iname agi manda bibehe kamabe. Ngode Datagaliwabe ibu tigabi ndo harua manda bibehebe. Ani bibe naheore. k  15 Ngode Datagaliwabehanda Mosesehondo lalu, I̱na biamogo bua biragohondo biamogo bialu dara holene walia hoa biragohondo dara halu haruli, lenego gilibu nga. l  16 Ani biagago tene wali agalime hame laragomebi biragomebi ndo Ngode Datagaliwabe ibunaga dara howa biamogo buleneme ani biaga ka. m  17 Irane Anduane Homogonaga mbugani Ngode Datagaliwabehanda Iyibinaga kinihondo bi lene ngago ogo, i̱naga hongo holene walia habelobi wali agali dindi bibahendeni karume i̱ manda bilobi i̱na í̠ kini habelo helaru, lenego gilibu nga. n  18 Anigo Ngode Datagaliwabe ibunime dara howa biamogo bua birago biamogo bialu mini mo giambe hoa biragohondo mo giambe haga ka. o 

Ngode Datagaliwabenaga keba holenebi dara holenebi ogo

19 Ani larogo manda buwa tí mbiralime i̱hondo lalu, Ngode Datagaliwabehanda wali agalihondo, Í̠ ko biri, lalu agua labehe kabe. Ibugua hame ledadagua nabule aiwa labehe kabe, lolebira. p  20 Tí mbiralime Ngode Datagaliwabehondo mangaba lalu ladai bule manda biriyagua í̠ ai kebe. Iba be dindime wabini ngagome ibu wabiaga biagohondo, Í̠na i̱ o ngogobi wabiridago irane aginagabe, nalagane. q  21 Anigo be wabiaga biagome ibu hame laradagua be tara tara wabibehe ka ndobe. Dindi mbiraoregome dege budalu be mende debene galone timbuniorego bule wabialu be mende horo bibahende ta nabinaga wabialu ibuni hame laradagua bibehe kagoni. r 

22 Ngode Datagaliwabehanda binigo ogonidaguaore bini. Wali agalime manda bilo ibugua kohondo ibunaga keba holenebi ibunaga hongo holenebi walia hoa ho hene. Anigo Ngode Datagaliwabehanda ko biagaruhondo ibunaga keba holene walia habeheore wiagola walia nahe pani mibeheore wiagolabi pani nami ibu ema nabi howa hibu lalu hondo haabo hene. 23 Ani buwa Ngode Datagaliwabehanda ibunaga bayale taraore holene gibiore walia hoa ho hene. Ibunaga bayale taraore holene ogoni inaha to̱lai holoma̱ya ngule mo manda manda bu helenego kamaru ina ibugua dara howa biamogo biyagome ogoni walia hene. s  24 Ogonigo Ngode Datagaliwabehanda Yu wali agali hangu olene ndo wali agali tara tara karu ariabi oleneru ina kamagoni.

25 Ogonidagua lalu Ngode Datagaliwabehanda Hoseanaga mbugani bi lo ngago ogo, t 

Wali agali ala i̱naga ndo heneruhondo,
i̱naga wali agaliore kami, lolebero.
Hameigini tara heneru i̱na ala gubalini nahe harugohondo,
i̱naga gubaliniore kami, lolebero.
26 Dindi mbiraha, Tí i̱naga wali agali ndo kami, lenego u 
dindi ogoniha howa, Ngode Datagaliwabe haluhe kagonaga waneigini kami, lolebira,
lalu gilibu nga.
27 Aisaiahanda Isaraele wali agali mitangi bialu mogo lowa lalu, Isaraele wali agali dewaore iba solowara angeni iba mu ale kayaguabi ti mbira mbira hangume pele mulene yulebira. v, w  28 Wali agali bibahendeore baba Anduane Homogohanda godi larangi abaleore bi mbira hangu lalu lo waholebira, lene. 29 Ogonidagua Aisaiahanda bi ala lene lo ngago ogo, Anduane Homogo Hongo Haiheore kagome ina hameigini maru yu wa nahelenedale Sodomo wali agalibi Gomora wali agalibi ti homai henedagua inabi homai kamale, lalu gilibu nga. x 

Isaraele wali agalibi Bi Mana Debenebi te ogo

30 Anidago iname agua manda bimabe. Agua manda bulene nga. Yu wali agali ndo tara tara hearume Ngode Datagaliwabehanda, Tí mini tigabiwi kami, lelonaga biabe bialu henegome ndo ti ibuhondo mini mbiraore wiyagola ibugua, Tí mini tigabiwi kami, lene. y  31 Anigo Isaraele wali agalirume Ngode Datagaliwabehanda, Tí mini tigabiwi kami, lelonaga mana mbira bule hai bialu hearia handa walia naheore hene. z  32 handa walia nahenego irane agimebe. Irane ogome tigua Ngode Datagaliwabehondo mini mbiraore wulene mo tene howa ndo tininaga bulene mana mo tene howa binigome ti handa walia nahe hene. Ani hai bialu hearia to̱le̱ mbira ge bidi lagane wiagome tinaga ge bo bidi lowa pilene. aa  33 Bi ogoninaga lalu Anduane Homogonagambugani lo ngago ogo, ab 

Hale hadaba. I̱na to̱le̱ mbira Saiono dindini ngeledo.
O ngeledogome wali agalinaga ge bo bidi lolebira.
To̱le̱ ogonime wali agali mo pila holebira.
Anidagua ndo mbiralime ibuhondo mini mbiraore wiyagua ibu mini burugulo naholebiraore,
lalu gilibu nga.

Copyright information for `HUI