Sir 18

Ngode Datagaliwabe ibu Anduane Homogoore kago ogo

Anduane Homogo ibu haluhe haabo kagome mbirale bibahende karubi ngarubi ibugua wabiai hene. Ani bialu mana bayale tigabi ngago talialu haga ibu hanguore ka. Mbirali ibugua bolangua hole howa ibula pugupugu biaga mbira naheore.
18.2-3.Hobaneogoha mbuga alatawe gilibu wini ngagoha bi marubi gilibu wini nga. Bi ogoni ogodagua leda. Bibahendeore ibunaga gime mo tiga bialu haabo kagola bibahendeme ibuninaga bi hale hai haga. Ibu kini howa ibugua bibahende handaya ho hai haga ka. Anduane Homogo ibugua mbirale bibahendeore wali agalinaga ogo ibuninaga ogo lalu mo dabaki ho haga ka.
Ibunaga biabe biaga ngago damene ogodagua lalu latagi habehe ai kabe. Ani bialu mbirale bibahende ibugua wabini ngaru bibahendenaga tene handa walia habehe ai kabe. Anduane Homogonaga hongo gibi ngago ogobiore ka lolenaga magi manda bule mida yuwa manda bibehe mbirali ai kabe. Ani bialu ibugua dara holene henge nawini dara howa bialu haga ngago damene daga lolene karulape ai kabe. Ainde Anduane Homogo ibugua biabe bini ngagobi mendealime bope holenebi bu bolangua holene mbirali naheore Anduane Homogo ibugua biabe bini ngago damene bibahende wali agali mbiragome baya hangu goaru handabe naheore nga. Wali agalime mitangi bialu tigua daga lai harima layagua nde tigua daga lai nahe wene pigane daga lalu ka. Daga lamaro bule biragoha tinaga de mborere bulebirago daraba.

Wali agali bu karuru agilego kabe.Ani bialu tinaga biabe agigo biaga kabe. Wali agali mo ko holene agigo wialu biamogo bulene agile ngabe. Wali agali dindini mali handari mbira (100) hayagua nde ogoni ibu mali luore hayabada. 10 Anigo tinaga mali ogoni iba solowara timbuni bedagonaga emene gibuni angeha bedagobi hangu halu tini iba angeni iba mu ngagobi dege nga. Ainde haabobo holenenaga lu mida manda beregola tinaga mali lu ndoni bame nagalone holebira. 11 Ani ngagola Anduane Homogohanda ibunaga dara holene dewaore odope halu ti baba hendore dege haga ka. 12 Ibugua ti de handalu mo ko holene timbuni mbirame tiha anda ibulubada lo manda bini. Ani biago manda bialu Anduane Homogohanda mana ko bini wiaru bu yi halu mo wahai hene. 13 Wali agalime tini damene bu karu dara haga. Anigo Anduane Homogohanda wali agali bibahende dara hai haga ka. Ibugua wali agalihondo lai lalu ti mo tiga bialu baya hangu lawai haga ka. Ani bialu nogo sibi haru hagame nogo sibiru haru ibagadagua ibugua wali agali haru dai biaga ka. 14 Tigua ibunaga mana lawai harago talialu bialu howa ibunaga bi mana baya hangu taluwa bialu holeore lowa hongo howa bialu karu dara timbuni ho haga ka.

Burupale kago hondowa biamogo bulene ngago ogo

15 Waneigini-o bi keba howa lolene ngarume í̠naga biabe bulene bayale ngaru mo ko holeni hondowa habe. Ani bialu wali agali mbira kagohondo biamogo bialu howa ibu mo taga halu bi mbira loleni nalabe. 16 Mbiragoha baya gombahe ngago ibu ni dedagome poboyogo bu ngaligo bolanguahe ngagobi dege bi bayale lolene ngagome mbirale mendeali kago biamogo bialu mulene ngago bolangua hene nga. 17 Heneneore bi bayale lolene ogoniale baya mbirale bame biamogo bialu mendeali mulenenego bolangua heneore nga ndobe. Anigo wali agalime dara holene mo walia halu miragome ogoni labo kirabali miagaya. 18 Wali agali lulu bu karume dara nahe lai lo miagaya. Wali agali mendeali kagohondo biamogo bialu mbirale bame mia nabiaga karume mendeali kago mo turu holene ti ha nawi ka.

Í̠ holenenaga mana biagadago baya mitangi bialu mo tale bulene ngago ogo

19 Í̠na bi nagalone ngaru bameore ona lopaya bialu holigo mendealiha howa manda ala mo yabe. Í̠ha warago bolene ngaru anda ibuligo í̠naga tingini baya hangu handaya ho habe. 20 Ainde Anduane Homogohanda í̠ godi lolene ngagoria íbu helowa mana ko birida loligo mana í̠na berego damene mamage howa bayale bulene ngago bialu habe. Godi lolene ngangi ko birida nalelo mana bayale ayu ogoni howa bialu habe. 21 Warago bolene ngagome í̠ ela holigo í̠ni mo dindiha ho habe. Mana ko mbira biriyagua abaleore mini beregedabe. 22 Anduane Homogohondo ogoale mbira bule lalu bi lo wirigo tigabi bule kego mo habo lolene mbira ibu wuligo baya hangu de hondowa mamage ho habe. Ani bialu homa abale í̠ha ibalu bi lo wirigo mo habo loligo bule dege lowa lu ho wanahabe. 23 Miniha tale ala buwa mbirale buleore lalu bi lo wulene karulape nga. Í̠na bule lalu bi lo wirigo nabi wahalu poregola Anduane Homogonaga keba holene ngago mo timbuniore holigo manda bibe. 24 Baya hangu manda ala bia handa. Í̠ni homarengi Anduane Homogohanda í̠hondo keba ho helo hame lo kebe. Ibugua í̠la miniha tandaga timbuni halu í̠ erembira ngilo hame ledebe. 25 Tomo dewa ngelowa nalu kengi mbiru í̠ni tomo nawi harigo mitangi bibe. Muni mbiraleru dewaore wu kengi abale yagibano harigo mitangi bibe. 26 Í̠naga mbirale wu keruni horo mbiru hanguni mo tara halu iriari biaga nga. Anduane Homogohanda ani bilo hame layagua iriari bulene ogoni abaleore anda ibulebira. 27 Í̠ha mini gigabi wu keyagua nde mbirale í̠nime bialu keru mamage howa bialu habe. Wali agali marume mana ko bialu heagua nde tigua bialu kago í̠ talima poligo hondowa hongo howa de hondo habe. 28 Wali agali manda bayalewi karume wali agali mini gigabiwi ogo ibuore kagoda lalu abale handa walia haga. Ani bialu mo turu holene bi abale laede haga. 29 Ani bialu tigua bi bayale í̠ lawai harago baya hangu mo yai hariyagua í̠bi nde mini dingi dangiale dege mbira holebere. Ani howa í̠nabi wali agali maru karu lawai habehe dege holebere.

Í̠naga hame ngego baya hangu haru holene nga lenego ogo

30 Í̠ninaga miniha hame ko ngago natalibe. Í̠nime hame uruni baya hangu haru hai habe. 31 Í̠naga hame ko urunime í̠ haru helo hariyagua waitigi bu karume í̠ hondowa ti oba holebira. 32 Í̠naga hame ngego damene mo karulape lolenaga mbirale bayale ngaru yolobu wiai nahabe. Í̠naga muni ngeru bibahende bameore biba holeberego nabibe. 33 Í̠ muni nawi hariyagua nde í̠ tomo timbuni mbira dawalu nolenaga agali mende kagoha muni dano holene nahabe. Í̠ mo yagibanoore holigo dano nahabe laro.

Copyright information for `HUI