Sir 19

Wali agali lulu iba dewa nalu lulu yaga bu karume mbirale bayale ngaru dewa nayulebira. Ani bialu wali agali mbirale emene ngago baya hangu handaya ho nahaga karu tinaga biabe bialu karu bayale naholebira. Ani ndo bibahendeore mo ko haiore holebira. Wali bedarumebi lulu iba hongohe ngagomebi agali manda bayalewi kago mo luluyaho helolebira. Agali mbira ibu bayanda wali bedago nenege ho hayagua nde wali ogonime mana lehe tara tara ngago ibuhondo bialu holebira. Mana ogonibi biragome ibu mo ko holebira. Ani bialu ibu homolebira ibunaga tingini homaliha ngagola himi ngoerume handaya ho birulebira.

Wali agali mendeali kagonaga bi larago mo henene haga karu tinaga miniha tiga nabiore ka. Mana ko í̠na biriyagua nde í̠ni mo ko holebere. Mana ko bulene ngago turu ho hariyagua nde Anduane Homogohanda í̠ godini haru pu helowa mana ko birida lolebira.

Bi larago haleho page buwa dibudibu nalabe ledago ogo

Bi larago hale ho kayu nabiaga hariyagua nde í̠ha mo ko holene timbuni nawulebira. Bi mbira larane hale hariyagua mendeali kagohondo dibudibu nalabe. Ani beregome í̠ miniha mini dege dindi nahe holebere. Í̠naga nenege heaguabi waitigi heaguabi dibudibu lalu lamulene nawigo nalabe. Anigo bi ogonime í̠ mana ko bulene ngagoha mo pila hayagua nde harugo latagi holene karulape nga. Bi dibudibu hale howa mende kago lamiriyagua nde mbira kago ibu hale halu í̠na lalu kego de hondoligo ohowa labe. Handayagua nde í̠ mo ko holene henge tagira ibilo hondo holebira. 10 Bi dibudibu mbira larane halu hariyagua í̠ha halu bibahe helabe. Latagi bi nahabe. Bi ogoni latagi nahariyagua nde í̠ mo ko holene nawulebirago hongo ho habe. 11 Walime gali taba honole tu haragola tandaga nalu biraga wini nga ndobe. Agali mini nawi lehe bu karu ti nde bi dibudibu hale hayagome tinaga miniha andanda biragola habe nahelo haga kago ndobe. 12 Bi ogonime ibunaga miniha bilina halu agali geni timu bilina hagagobi ho hagane ka.

13 Wali agali mbiragome í̠naga nenege biagome ogodagua laya lalu dibudibu í̠hondo langiyagua nde í̠nime puwa ibuhondo hale holene nga. Ani beregola bi ogoni henene ndo holebira. Anigo ainde í̠naga nenege biagome bi ko leneyagua nde mani halu mende nalole lalu ibuni mini wiadai bulebira. 14 Bi dibudibu lalu bi laribe lalu í̠naga damene kagohondo hale habe. Ibugua leneyagua nde ai lone halu mendengi naloliya lo manda bulebira. 15 Bi dibudibu wali agalime í̠na ogodagua lari laya lalu í̠naga nenege biago ibunihondo hale habe Wali agalinaga bi dibudibu ogoniale henene ndo dewaore laga ngago. Ani naleyagua nde wali agalime bi dewa layago mo henene naholebere. 16 Wali agali dewaoreme mini nawi howa bi bame lo paya biaga ngago ndobe. Mbirali ogonidagua nabiaga ai kabe. 17 Í̠na í̠ damene hayadagohondo ko larida lalu keba holeyagua nde ibunila bi ala labe. Ani lalu Anduane Homogo Daligaore kago ibunaga godi tigabi ngagome tiga bilo wahabe.
(19.17-19)Mbuga maru alatawe ngagoha bi maru hobane ogoniha gilibu wini nga. Bi ogoni ogodagua gilibu nga. Anduane Homogonaga bi ledago hale habe. Ani beregola ibugua í̠ handaya ho holebira. Ani bialu í̠ha mini bayale wiagua nde ibugua í̠ gubalini holebira. Anduane Homogonaga bi mana lo wini ngaru baya hangu lo manda bu yabe. Í̠na baya hangu lo manda biriyagua nde í̠ha holene mo yu holebere. Wali agali Anduane Homogonaga hame ngago talialu haga karu ti tomo bayale ngaru mialu hole turu timbuni haga ka. Tomo ogoni haabobo holene ira kagoha howa miaga nga, leda.


Mbirali mini gigabiwi ai kabe lenego ogo

20 Wali agali Anduane Homogonaga bi hale halu talialu karu ti dege mini gigabiwi ka.
(19.20-21)Mbuga maru alatawe ngagoha hobane ogoha bi maru gilibu wini wia dege bida. Bi ogoni ogodagua leda. Biabe bia hagane kagome ibunaga agali haguane kagonaga bi hale nahayagua nde ibunaga agali haguane kagome ibuhondo keba holebira. Agali biabe bia haga bi mo wahaga biago ibugua mini beregedayaguabi ibunaga agali haguane biago ibuha keba hayago ereba nahe haabo ho holebira, leda.
22 Wali agalime mana ko tara tara ngaru bulene manda tara tara wu heagua manda urunime tini mini gigabi wilo biamogo nabulebira. Wali agali mana ko biaga karunaga mini ngago talialu holene bayale ndo. 23 Wali agali mini bayalewi howa ai mana ko bialu heagua nde wali agali ko orene ko ti kagoni ndobe. Ai wali agali mana lehe ngago bialu karu tiha mini tigabi nawiore ka. 24 Wali agali manda timbuni nawi howa ti Anduane Homogonaga bi hale halu heagua nde tigua mbirali manda timbuniwime Anduane Homogonaga bi mana pugualu karu bolangua hene ka. 25 Wali agali maru nde mini gigabiwi kago howa tinaga mana bialu kago ko biaga ka. Wali agali marume nde tini godi deni howa pora bialu polenaga bime baya hangu ladebodebo biaga ka.

26 Wali agali maru ko bu karume dara nahagaore ka. Tigua ke̱ hangu haga ka. Tigua í̠ mo hondo holene dege manda bida. 27 Tigua ma ema biragola í̠naga bi larigo hale nahe kabe toba holebere. Í̠ni baya hangu mamage nahe hariyagua nde tigua í̠ mo hondo timbuni halu mo luluya holebira. 28 Tigua mana ko ayu nabi hayagua nde yawi ko bule taya bialu holebira. 29 Í̠na wali agali bu karu baya hangu mo tale bu handaya haga beregola ti ogobiore heneda lo panaga handa walia haga bulebere. Ai wali agali mbirago ngola haga bialu tiha mini gigabi ngabe nawidabe hondole baya hangu daba handaga bibe. 30 Wali agali mbirago ibu abidabe hondolene manda biriyagua nde ibugua yari mo karu ledarubi bi oba hararubi ibuni ibagabu karubi baya hangu mo tale bialu handabe.

Copyright information for `HUI