a22.12Pig 50.10, Yud 16.24

Sir 22

Wali agali lulu mangaheme biagago ogo

Wali agali mangahe bu karu ti ege to̱le̱ni ti to ngagola wali agalime ngu hagagobi ka. Wali agalime handa nabi howa ege to̱le̱ ogoni ela hayagua ti keba timbuni haga.

Waneigini mbira mine halu haga heagua ogonime aba kago mo taga haga. Anigo ainde waneigini ogoni ibu wandariyagua nde aba ibu taga timbuniore haga. Wanene bedago ibu bayale bereagua nde biralu agali polebirago ainde mine haga bereagua ibu aba kago genda mo mulebira. Wanene bedago ibu mine haga bereagua nde ibu ababi ibu agalinibi mo taga haragola libugua wandaridago mo ko halu mo ngubia haga.

Waneigini aba ibugua waneiginime ko mbira nabi karia bame keba hayagua ogoni bayale ndo, ko bira. Anidagua birago manane homa duguanda dara ho biruwa ai daweanda iba gana turu howa laradagua bulebira. Anigo abame waneigini mana lalu tibume bayagua karulape ogoni.

Wali agali mini nawi lulu ale bu karu lawai haregola manda nabulebira lenego ogo

Í̠na wali agali lulu mini nawi karu lawai hale manda biriyagua nde í̠ agalime todobene be pambu lenego mo gimbubu dai biradagua mendeali paliahondo kago mo barila haradaguabi bulebere. Heneneore mbirali de umu lalu palua ho bedago lawai haradagua bulebere. Erekuibi lawai kegola mini pu tara ho biruwa í̠hondo lone hale halu, Í̠ agi larebe lolebira.

11 Wali agali homararu tigua ni kago lone de nahondolebirago manda bialu ti dara howa dugu bulene nga. Anidagua dege wali agali mbirale manda bibe nahe karu ti nde ogonibi dege manda bibe naheore kago dara halu dugu bulene nga. Wali agali homayaru ti ayu ha̱lo kago tinaga dara howa dugu dewa bulene nawi. Anigo wali agali mini nawi lulu bu karu tinaga holene ko darabiore kagonaga dara halu dugu bia holene nga. 12 Wali agali mbirago homaragola dara howa dugu bialu horo karu duguanda haramalidagua wiyago. Wali agali mini nawi lulu ale karuhondobi wali agali mine haga bu karubi dara holene nga. a 

13 Í̠na wali agali mini nawi lulu ale karu baba bi te nale wahalu wali agali mbirale manda nabi karu bedaria polene nawigo. Í̠ha mo ko holene anda ibuligo de handalu mamage ho habe. Ani hariyagua nde tigua í̠hondo bi ko larangi í̠ha mo ko holene anda naibulebira. Ti helalu í̠ pubagi halu poregola tinaga bi ko larago hale howa í̠ manga nahe halu í̠ bayale holebere. 14 Ege to̱le̱ mini aeane tigi hope hene ngagonaga genda agileme bolangua holebirabe. Wali agali mini nawi lulu ogoni ale ti ka. 15 Iba mu ngagobi ibi ngago nuha hanaga bu ngela aeanebi ngela buwa yaraga ho handalu keria ti gendabi dege dege nga. Anigo wali agali mini nawi lulu bu karume genda timbuniore mo ngiaga nga.

16 Ira kambu lene mbirago anda bialu anda haini bapara heagua nde dindi dumbidumbi birangi gialope naholebira. Anidagua dege wali agalime mana tigabi bialu holenenaga galone baya hangu lo manda bu heagua nde tiha ba hondolene anda ibirangi ti hongohe ogonibi holebira. 17 Wali agali mini gigabi wulene hongo howa yu haga karu ti agali irani bage giligili bayaru wabu helaga bini ngaligobi ka. 18 Hari bare ngagoha agalime ira dibuwa hagira bidago puyabu timbuni pu larangi hongo nahe hagagobi dege wali agali mini gigabi nawi lulu bu karuni ti ogonibiore ka. Mo gi holene tiha anda ibirangi ti hongo ho habe naheore ka.

Nenege bu karume hagane ngago ogo

19 Wali agalinaga de nogoba hariyagua nde deiba abale ibaga nga. Í̠na bime wali agalinaga bu miniha nogoba hene lariyagua nde miniha ngago panaga tagira ibai helaga nga. 20 Ega bedagoha to̱le̱ bariyagua nde egame gi halu ibida polebira. Anidagua dege í̠naga nenegehondo nabini ngago biri lalu ke̱ howa bime mo baede hariyagua nde í̠naga nenege ibugua í̠ wahalu pu waholebira. 21 Ainde ayu tibume í̠naga nenege biago nogoba holebiriyagua nde haru dege. Mani bime libu mo tiga bulene karulape nga. 22 Í̠naga nenege lai lalu bi dewa lariyaguabi nde mani bi lalu libu mo tiga bialu gi tigani bulene hariga wiadege bida. Anigo ainde í̠na ibuhondo bi ko bialu hege lalu ibu mege bialu biriyaguabi ani bialu bi libuni hangu ohowa lenego ína latagi halubi í̠na ibu mo hondo halubi uruni alego biriyagua nde í̠naga nenege ibugua í̠ wahalu pu wahelo talia pelolebere.

23 Í̠na í̠naga nenege kebigo ibu mbirale dewa nawi tubagiho kebingi ibu wahalu pubagi ho howa ibu mbirale dewa wu kangi ibu heba mandagi turu ho nahabe. Ibu mani bayale kangi ibunaga mbirale ngago tubagi howa maru í̠ mo yulene wulebirago ai ibu mbirale nawi ko kangi libu haru mandagi holene nga.

24 Ira hibunaregola ngu haguala ala bialu ira mani daga. Anidagua dege wali agalime pigane keba ala howa mani wali agali mbirago homelo bo wahaga.

25 I̱naga nenege mbira kago i̱na haru holene taga nahe handaya ho holebero. Ani bialu i̱ ibunaga deni hado naholebero. 26 Anigo ai i̱naga nenege ibugua bia ko hene ngagome i̱ha mo ko holene ngago anda ibiragola wali agali maru bu karume hale hayagua nde tigua ibuhondo gi ho hai holebira.

Bi ko ngaru hogorale bulenaga Anduane Homogohondo bi lolene ngago ogo

27 Ainde ayu i̱naga ne harigoha howa bi mbira la ko harogome i̱niha bi lolene ngago i̱naga hegeme i̱ni mo ko hene wuligo ai i̱naga ne harigoha bi larogo haru habe lalu i̱naga haru haga mbira kagohondo bi laro.

Copyright information for `HUI