a23.9Md 5.34, Ya 5.12
b23.21LBM 20.10, Man 22.22
c23.24Man 23.2, SMG 3.16-19, 4.3-6

Sir 23

Anduane Homogo-o í̠niore i̱ Ababi i̱naga Haguaneore kego i̱ waholeni wanahabe. I̱ninaga bi latagi harogome i̱ni mo luluya halu mo pila holigo i̱ wanahabe. Mbirale gewa tibu yu kagome i̱naga hame ngogo damene haru hai kagola mini gigabi wulene i̱ lawai haragome i̱ handaya ho helo i̱na bi laro. I̱na mana ko berongi libugua i̱ dara naholebira. Ani bialu i̱na ko bidogo handalu pubagi naholebira. Anidagua biragola i̱naga ko binibi mana lehe binibi timbuni dewa nawiragola i̱ waitigi bu karunaga deni i̱ bi lolene nawulebira. I̱ mo ko haragola ti oba holigo handabe.

Anduane Homogo-o í̠ i̱ Ababi i̱naga Ngode Datagaliwabebi kegonigo i̱na mine holigo i̱ baya hangu handaya ho habe. I̱ha hame ko dimagoli holene ngaru mo wahai habe. I̱naga miniha tomo dewaore nalu holenebi miniha dimagoli holene ngago talialu holenebi hongo holigo hame ko i̱ha howa i̱ni bope holene tagira ibirago mo wahai habe.

Buleore lalu gi lolene ngago ogo

I̱ waneiginiru-o gi dolalu i̱na tíhondo bi tigabi bayale ogodagua lolene nga lalu tí lawai harogo baya hangu hale halimu. Bi i̱na langirogo hale howa tí pu luluya nahalimu. Wali agali mana ko biagane bu karu ti tininaga ne hariga ngagoha howa tini mo ko hagane ka. Ani bialu wali agalime mendeali kago mege bialu mo taga haga kago ti pi lolebira.

Í̠na mbirale mbira buleore lowa gi doladaga halu bi lo wulene nawi. Ani bialu bibahendengi Anduane Homogonaga mini bame laabo holene nawigo nalabe. a  10 Agali í̠naga biabe bia haga kago gewa tibume balu haabo hariyagua nde ibu tingini bibahendeha dere biai holebira. Anidagua dege wali agalime mbirale mbira buleore lalu gi doladaga halu bi dewa lo wiyaguabi Anduane Homogonaga mini bame laabo halu heaguabi tinaga ko ngago ereba nahe wiaabobo bu wulebira. 11 Wali agalime mbirale mbira buleore lalu gi doladaga halu bi dewaore lo wuwa mana pugulu karia ti damene bibahendeore mo ko holene ngago ngola hai holebira. Tinaga bi henene ndo ke̱ howa larago mo hongo howa gi doladaga halu buleore lalu lo wiyagua nde tiha ko ngago timbuniore holebira. Tigua buleore lalu gi dolalu layago bame dege bule tingi howa leneyagua nde ti koore ka lalu mini lene mbira halu tinaga onene waneiginirubi ti bibahende genda tara tara yu holebira.

Bi ko lolene nawiore ngago ogo

12 Bi marubi nde Yagaba hameiginime lolene nawiore. Wali agali mbirame bi ogoni layagua tini homolene hangu lene nga. Wali agali bayale tigabi karu ti bi ogoni ngagoria kaware nahe kaundiaha kagola mbirale bia ko henenaga ko dodohe ngagome tiha pialu bu dambi naholebira. 13 Bi tagabi ngago lolene mana koorego bi tagabi lolene mana ngago mo ya nabibe. 14 Í̠ agali haguane bedaru dombeneha biruwa í̠ aba ai̱yala ala mitangi bibe. Í̠na bi mbira tinaga deni howa la ko haregola tigua í̠ luluda loligo. Ani laragola mani í̠na taga howa lalu, I̱ aiyahanda i̱ aginagaore taba henenedabe loligo, manda bibe. 15 Wali agali bi ko hangu laabo halu haga bu karu ti lone beregedalu bi bayale lolene nawiore.

Wali agali kayu ko tagabi birarume mana ko mo wia haga nga lenego ogo

16 Dimagoli holene ibunaga hongo ira deneale nga. Ibu hundia nabi daho wialu wali agali dalu damaro biaga nga. Dimagoli holene kirame mana ko mo wia halu tebone ngagome Anduane Homogo mo keba timbuniore hagane nga. Dimagoli holene mbirago ibugua wali agali tini tinginime mana ko bulene ngago biaabo halu manga nahole dimagoli ira hungu ale dayago hundira handala wahagane nga. 17 Dimagoli holene mendego bayanda wali agalime kayu biagane nga. Mana ogonigo wali agali kayu biaga karu tigua dendeore howa bialu haabo halu tini homalu wahaga.

18 Ai dimagoli tebonego dabu bini mana puguarago. Wali agali tinaga miniha dimagoli ogoniale ngagome lalu, I̱ mbirali aiwa hendedabe. Arumame i̱ mo ge halu anda hai ho mabubupe kagome mo ge halu bidagome mbiralime i̱ de handabe nahe kagoni. I̱ agihondo gi holobada. Anduane Homogo Daligaore kago ibugua i̱naga ko ogoni mitangi nabulebira ndobe, lagaya. 19 Wali agali mana urunibi bialu haga karume Anduane Homogonaga deme bibahende handai holene hona ni dedago ladali hene wáleore kago helowa tigua wali agali maru kagonaga de gi halu mo ohagaya. Anduane Homogohanda bira do holene ngago baya hanguore wále panaga ngaria handai halu mana wali agalime bialu karu bibahende handai halu bida. 20 Biabe bulene damene ngago Anduane Homogo ibu manda biahe howa ibini ngago bibahende manda bialu bule ogo nga lalu manda biai ho ka. 21 Heneneore wali agali dabu bini mana pugualu piyago ibu wali agali bibahendenaga deni howa pani nolebira. Ti taya bialu handawalia naholebira lo manda bialu bira do karia puwa minu yu tagira polebira. b 

22 Wali mbira ibu agalini helalu puwa agali mende kago baba waneigini hono wialu heneyaguabi nde mana ogonibi dege bulebira. 23 Wali ogonime ko dene tebira biya. Mbiragome Anduane Homogo Daligaore kagonaga mana lo wini ngago puguaya. Mendegome ibu agalinihondo mana lehe biya tebonegome agali kayu yama ibaga biyagome dabu bini mana ngago pugualu agali mendela waneigini hono wialu haya. 24 Tigua wali agali ngoai ho kagoria ibu helowa ko birida lalu ibu wane igini bu karu pani nelo mulebira. c  25 Ani biragola ibu waneigini uruni tinaga holene bayale nawulebira. Ira mbira pini dindiha bayale anda nape howa lini nadaga kagobi waneigini uruni ti holebira. 26 Wali agalime bi ko mbirago lalu howa tigua wali ogoninaga mini lalu lolebira. Ainde ibugua beregedalu ibunaga mini lone mo bayale naholebiraore. Ainde wali agali maniore hama polobadarume Anduane Homogohondo gi holenego timbuni duniniore mbira winida lo manda biaiore holebira. Anidagua bulenego bolangua hende mende nawiore. Ani bialu mana mbira Anduane Homogonaga bi mana lo wini ngago taluwa bialu holenego baya dendebiore nga.

27 

Mendeali baba mandagi bayale holenenaga bi bayale mbira lawai henego nga

(Be 24.1—32.13)

Copyright information for `HUI