a26.17Har 25.31-40
b26.18Har 26.32

Sir 26

Wali bayale bedagome mana bayale biagago ogo

Agalime wali bayale bedago dabu biyagua ibu bayale turu ho halu dindini luore howa ho dagua halu mali dewaore holebira. Wali ogonibi bedagome ibu agalini kago mo turu haragola agali ibu turu dege ho howa miniha mo palia holene karu lo haabo halu homalebira. Anduane Homogohanda agali ibu andaneha haabo haga karu mo turu halu wali bayale bedago hado miaga ka. Agali ogoniale kago ibu turu ho haabo holebira. Ibu muni mbirale dewawi homogo heaguabi mbirale mbira nawiore howa yagibano heaguabi ta nabi howa ibu bayale turu ho haabo holebira.

Wali ko bedaru de hondowa mamage howa ohalu holene nga lenego ogo

I̱ore mo gi hagane irane maria ngago ai mbiragome i̱naga miniha mo duru la hagane nga. Ai homolenego ko mangabiore mbira ngagoni ina bibahende manda biai kema. Anigo tebira wiaruago koorene ko nga. Wali agali bu karunaga mege biaga mana ngagobi wali agali keba timbuni haga tinaga mo ngoai haga ngagobi godi lalu howa bi ke̱ howa laganebi nga. Anigo irane mane ngagome mini burugu timbuni mo ngialu genda timbuniore mo wia hagane nga. Ogoni wali mbirame wali mende bedago dimagoli holeneme mo wiaga.

Nogo bulumaga biabe bilo irame mani daribaho magamaga bu heledaria irame nogonaga mani kedaragola tandaga hagagobi wali ko bedagome ibu agalini bime hayalu biraga nga. Í̠na wali ogoni ale bedago mo tiga bule bi lalu keria ibugua í̠ moneme hayaradagua bulebira. Walime lulu iba nowa ibuni taga nahe karia wali agalime ibuhondo keba haga nga. Bayanda wali bedagome ibuha mini dimagoli ngago miniha ogoale wu bedo lalu deme hendene panaga mo walia holebira. Í̠na ibu denguini handaede halu ibunaga hame ngago panaga handa walia holebere.

10 Í̠ wane bedago baya hangu handaya ho habe. Ibu mine holigo í̠na ibuhondo bialu helo wanahabe. 11 Ibugua de dimagoli hama ibaga bialu biruwa í̠ mo taga holigo í̠na ibu baya hangu mamage ho habe. 12 Wali ogoniale bedago ibu mbirali iba noa timbuniore howa iba emene ge mugu ibabi iba emene bedago ta nabi nai damene holene bidaligobi beda. Wali ogoniale bedagome agali bu kago damene hai yadege bule taya bialu biraabo haga beda.

Agali one wali bayale bedago mo turu halu bi lenego ogo

13 Mana bayale agali one bedago ibugua biagagome ibu agalini mo turu halu tomo dendebi ibugua dawaragome agali mo hongo haga. 14 Wali agali one bedago ibu bi nale ne hariga ndibulo biragago mugube baya tara mbirago Anduane Homogohanda mini yu beda. Wali bi dewa nalagane bedago bolangua hene daliga mbirale mbira nawiore. 15 Wali agali one bedagome ibunaga hame ngago damene baya hangu haru hai haga bedago mana bayale duniniore biaga beda. Mana ogonibi bulenaga mbirale mbirame yolo bu yulene nawiore ndobe. 16 Agali tigua nde ti oneme waneigini baya hangu handaya ho bedago de hondowa ti turu haga. Agalime ibu one turu timbuniore hari nene ngagoria egerebagi ni bayale daba harago hondowa wali agalime turu hagagobi kagane ka. 17 Walinaga dengui baya kago Ngode Datagaliwabe andagaha hale hongohe dedagome wá timbuni hagagobi ka. a  18 Tinaga ge bayale kago anda gene hongohe ngolome para hadambi howa silibame mbogoyi wabuwa ogoniha mo karu ledagola hongohe kagobi ka. b 

19 Waneigini-o í̠ daliahe keangi howa í̠naga tingini baya hangu handaya ho habe. Í̠na mana tara tara ngago bima ibaga bialu keria í̠naga hongo ereba holigo de hondowa habe. 20 Dindi ngago baya hangu deme handama ibaga ala buwa bayaleore ngago í̠ninaga dindi mo wibe. Ani bialu tomo eganeru dindi mabu ogoniha hengedegola í̠ damene lenego hongohe bayale holebira. 21 Ani beregola í̠ waneigini aguane mani holebiraru ti dindi holene mo ko naholebira. Ani bulebirago irane í̠ damene kago ti hongo timbunihe bayale holebira. 22 Bayanda wali agali kayu yama ibaga biaga bedaru ti hamiaga to̱lo wahene dindini ngaligobi beda. Ani bialu agali oneme ibu agalini kago wahalu agali mende kayu biagagome ibuninaga homolene mo yu anda ibaga. 23 Wali ko biaga bedaru agali mana ko biaga karu tinaga yolo beda. Wali ko nabiaga bedaru ti agali Anduane Homogo andaneha haga bu karunaga yolo bayale bame mo turu halu mini beda. 24 Wali taga nahaga bedaru ti tinaga mini mo ko holobadago mitangi nahaga beda. Anigo wali bayale bedagome ibu agalini andaga mandagi biruwabi taga ho biraabo hagane nga. 25 Wali mine haga bedaru ti biango ko kilayubi hagagobi bedago ai wali taga haga bedago ibugua Anduane Homogo gi halu ibu andaneha biraga beda. 26 Wali agalime bi lalu, Wali ogome ibu agalini baya hanguore handaya ho biraga ibu mini bayalewi beda laga. Anigo wali ibu agalini nahandaya ho haga bedago wali agalime lalu, Wali ogoni ko ngubiore beda laga. Agalini one bayale dabubi kago ibu turu ho howa mali dewaore holebira. 27 Wali mbira ibugua bame laiore laabo halu bi nagolone ngago hongo howa latagitagi bialu bedago ibu nagaloneore bame wai bialu howa agalime waitigi bu karu gi howa mogo lalu ibida piai helonaga pilipe biguli hongo howa pu lagagobi beda. Wali ogonibi agalini kago wai bialu karia abale timula ngola halu homolebira.
(26.19-27)Agali mandabi bu hearu dewaoreme manda bu handalu hearia hobane yakundi kira kago dombeneha gilibu ngago mbuga alatawe bambaore winidagoha nawinigo ayure dege agali marume gilibu wiatago hene ngabe tobaheda leda.


Genda maru ngago ogo

28 Irane tebiranaga i̱ genda timbuniore ho kogo ai mbiragome i̱ mo keba timbuniore haga. Ainde agali mbira ibu mbirale nawi buru pale howa ayu ibu yagibano heaguabi wali agali manda timbuniwi maru bu karume erembira miyaguabi wali agalime hariga tigabi ngago wahalu puwa mana ko ngago bialu hayaguabi uruni ko tiga nabiore nga. Wali agali ko urunibi karu ti Anduane Homogo giha homo ya holebira.

Biyanaya biabeme wali agali mo luluya habehe holebirabada lenego ogo

29 Agali biyanaya biaga karume tigabi bulene ngadagua bialu habe naheore ndobe. Wali agali tidugu anda handaya ho haga kagome mana ko bulene ngagoria hogorale bialu pobe nahe nga.

Copyright information for `HUI