a3.8Har 20.12
c3.18-19Pb 2.3
d3.22Man 29.29

Sir 3

Ai̱ya abalahondo mana bayale bulene nga lenego ogo

Waneigini bu kemirume tí aba ai̱yalanaga bi baya hangu hale halimu. Ani bialu harimiyagua tí baya karulape holeberemi. Irane Anduane Homogohanda tínaga aba ibu waneigini bolangua howa ibu daliga heleda. Ani bialu ai̱ya ibu nde ibunaga waneiginiru handaya ho haga helo mo hongo howa bereleda. Waneigini ti aba andaneha haga karu tinaga ko domo waholebira. Ani bialu waneigini ti ai̱yanaga mini mo yaraga haga karu ibuha mbirale bayaleru dewaore wu to̱le kagobi ka. Waneiginime aba andaneha baya hangu hayagua nde mani ibuni waneigini holobadarume ibu mo turu holebira. Ani bialu Anduane Homogohanda ibunaga bi laragobi hale holebira. Waneigini ibu abanaga mini yaraga haga kago ibu dindini luore holebira.Waneigini Anduane Homogonaga bi hale haga kagome ibu ai̱ya mo turu haga ka. Aba ai̱yala libugua libu waneigini handaya ho haga kago mana bialu waneigini tigua aba ai̱yalanaga bi larago hale holene nga. Waneigini kemiru tí abanaga mo turu holene ngago tíha wia helo tígua bi laremigomebi biabe beremigome tí abanaga mini yaraga halu halimu. a  Anidagua bulebirago irane abanaga mo turu holeneme waneigininaga anda kago mo hongo haga. Anigo ti ai̱yanaga keba holeneme anda gene bibahende dugu wahai haga.

10 Í̠ aba andaneha nahariyagua Í̠ aba ibu dindiha halu í̠ daliga haruda lo manda nabibe. Anidagua biriyagua í̠ aba mo taga haregome í̠ mini lene naholebere. 11 Heneneore waneiginime ti abanaga mini yaraga halu ti aba andaneha haga hayagua nde mani ti timbuni mini lene mbira holebira. Anigo ti ai̱yanaga mini mo dindiha hayagua tinaga mini mo ko hene holebira. 12 Waneigini tígua ti aba waheore bedangi baya hangu handaya ho halimu. Ibu homa nabi wene bedaore ibuha genda yulene namilimu. 13 Ai aba ibu lolongo yayagua tígua ibu dara holene nga. Í̠ni hongohe ha kegonigo ani howa ibuhondo mege bulene nawiore. 14 Anduane Homogo ibugua í̠na dara halu biamogo bulene mana í̠ abahondo biriruni embeda naholebira. Ibugua í̠naga ko domo wahelu í̠ andaga mo hongo holebira. 15 Í̠ha mo ko holene ibu ngangi Anduane Homogohanda í̠ mitangi holebira. Ni hongohe daragome dagare bulene ngago mo wahagadagua í̠naga ko ngago Anduane Homogohanda domo waholebira. 16 Waneigini ti aba mo embedaho haga heagua nde ti wali agali Anduane Homogo mege biaga holebira. Waneigini ti ai̱yahondo lai laga karu ti genda yu holebirago irane Anduane Homogohanda tihondo keba haragola genda yu holebira.

Í̠ni mo dindiha ho howa maru karu dara halu biamogo bulene nga lenego ogo

17 Waneigini tígua biabe tara tara bialu kemiru bialu howa tíni mo dindiha howa bialu halimu. Ani beremigola wali agali tigabi bayale karume tíhondo gubalini ho holebira. 18 Í̠naga mini timbuni mini lene hariyagua nde í̠ni mo dindiha holenebi anda halu timbuniore haragola í̠ mo turu holene Anduane Homogo ibu deni yu holebere.
(3.18-19)Mbuga alatawe gilibu wini ngagohabi nde hobane ogoniha bi marubi gilibu wini nga. Bi ogoni ogodagua nga. Wali agali dewaoreme mini lene karuhondo Anduane Homogohanda ibunaga mini tihondo mo wála nahagane ka. Anigo wali agali tini mo dindiha hagane mana yu kagohondi mbirale wali agali deni doho ngaru mo walia haga ka.
,
c 
20 Ngode Datagaliwabenaga hongo daligaore kagola wali agali tini mo dindiha ho haga karume ibunaga mini yaraga haga ka. 21 Ainde mbirale í̠naga manda ngegola karulanape wiarunaga í̠na manda buleore lowa wiaede nahabe. Ani bialu mbirale í̠na baya hangu goaru handabe nahe ngaru goaru hondolene manda nabibe. 22 Tigua biabe í̠na bibelo mo ngirago hangu mitangi bialu mbirale í̠naga deme handabe nahe mo do ho ngarunaga mini burugu nalabe. d  23 Biabe í̠na bulene nakarulape ngago bule mitangi bulene nawiore. Biabe í̠ni bialu kego karulape ogonigo bialu habe. 24 Wali agali dewaore luluyu hagago irane tininaga mini ngago hangu talialu karia biaga. Tinaga embone mini kome wu to̱latagi hene ka.
(3.24-25)Mbuga alatawe gili bu wini ngagohabi nde hobane ogoniha bi marubi gili bu wini nga. Bi ogoni ogodagua gilibu nga. Wali agali de nahe karu tigua deme mbirale handabe naheore ka. Ani bialu mbirali manda nabi heagua nde bi ogoninaga lolene nawi.


26 Wali agali mine harago ibu mbirale ko ngaru mo yulebira. Ani bialu wali agali ko hame laga karu tini ogoniha homanda holebira. 27 Wali agali mine hagane bu karunaga genda ngago damene ereba naholebira. Anidagua dege wali agali ko mine hagane bu karunaga ko ngaru timbuni holebira. 28 Wali agali lai lalu bi poboyogobi laga karunaga genda mo yu anda ibirago mo ereba holene marasini mbira nawiorego irane dindiha ira pini hongohe piagadagua konaga pini tiha hongohe anda peda. 29 Wali agali mini bayalewi karu tigua manda bayale bulene ngago abale yamiaga ka. Ani bialu mini bayalewi karu ti lawai haga karume lawai harago turu howa hale hagane ka.

Wali agali yagibano karuhondo dara habe lenego ogo

30 Wali agali yagibano bu karu dara ho halimu. Anidagua buleberemigo irane ibame ira dedago ba hundia hagadagua dara holeneme wali agali tiniha ko ngago domo wahaga nga. 31 Wali agalime mendealihondo dara holene walia haga karu ti mani tini pilarangi mendealime abale biamogo bule kago handa walia haga ka.

Copyright information for `HUI