Sir 37

Í̠naga nenege bu karu tinaga mana baya hangu mo tale bu handabe lenego ogo

Wali agali dewalime í̠hondo ti í̠naga nenege kema lolebirago ai marume ke̱ howa lolebira. Ainde í̠naga nenege bayale mbira kebigome í̠ wahalu piyagua nde í̠naga bu miniha genda timbuni yu holebere. Aiore nde darabago irane aginaga mbirale uruniale tagira ibalu dindi mo ko harabe. Ke̱ halu nenege tingi ho kago howa bayalengi í̠ heba mandagi haabo howa genda yu kengi í̠ erembira ngu holebira. Ke̱ howa nenege ogoni ale kagome dawe halu tomo bayaleru dewa nalu birulene horo ngangi libu haru mandagi tomoru nalu biruleberebigo ai wai porengi libu haru mandagi nape ibu birado holebira. Í̠ nenege heneneore mbira heagua nde ogoni mitangi ho haabo holebere. Í̠ mbirale dewa wu kengi ibu embedaho wanahabe.

Wali agalime í̠ mini talebu ngirago baya hangu mo tale bulene ngago ogo

Wali agali dewame í̠ biamogo bialu mini maru tale bu ngulebirago ai dewa uruni marume í̠ mitangi halu ndo bame dege lalu holebira. Ti tininaga mitangi howa lolebira. Wali agali uruniale bu kagoha mamage ho habe. Tigua mini agua wu howa lenedabe hondole baya hangu daba handabe. Tigua í̠ biamogo bulenaga lenedabe bame lenedabe handabe. Tigua í̠ bope holenaga ohowa lalu holigo baya hangu handabe. Wali agali urunibi kagome ke̱ howa í̠hondo lalu, Í̠naga biabe karulapeda, loligo handabe. Ani lalu í̠ha mo ko holene ngagoria ti bame de dege hondo holene wuligo manda bibe.

10 Wali agali í̠ heba biabe bua nahe kagohondo í̠ biamogo bia lolene nawigo nalabe. Wali agali í̠naga mbirale ngego dimagoli ho kagohondo í̠naga mini ngego hada walia nahabe.

11 Heneneore larogo wali mbira wali mendela hongo haga haga bialu bedagohondo wali mendedagonaga te í̠ langi nalabe. Ani bialu agali mbira wai napiaga dule kagohondo wai ogodagua biagane lalu í̠ lawai helo hale nahabe. Agali biyinaya biaga kagohondo í̠naga mbirale ngeru ibu yolo bilonaga ina lone ibuhondo agira mibehedabe lalu hale nahabe. Ani bialu agali í̠naga mbirale yolo bulebiragohondo muni agirame yolo bulebe lalu hale nahabe. Agali í̠na ibu ka̱i̱ labelonaga lawai haga kago bi nalamibe. Ani bialu wali agali dara nahaga howa dara holene mendeali mo walia nahaga kago baba bi nalabe. Agali mangahe kagohondo biabe biagane lawai ha lalu hale nahabe. Ani bialu wali agalime biabe abale biai holenaga abale biai nabi hendore bigi bialu kagohondo bi hale nahabe. Agali biabe biaga mangahe kagohondo biabe timbuni ngago mo muleni namibe.Agali uruni ale biaga kagonaga bi hale holeni nahabe.

12 Horo bibahendengi wali agali tigabi karu baba dege ibaga bu holene nga. Ani buleberego irane í̠ni manda bidegoni ti wali agali Anduane Homogonaga bi mana hale howa talialu hagane howabi tigua í̠ baba mini mbiraoreho howabi í̠ pi lolene kaware kegola tigua miniha í̠naga genda ha halu hagabi ka ndobe. 13 Ainde í̠ í̠ninaga mini gigabi ngego talialu bialu holene ngago irane í̠naga manda bayale bidego ibu í̠la mandagi haabo holene bayale mbira bu kego manda bialu anidagua bulene nga. 14 Mbirungi nde agali mini gigabi timbuni bi laga bu karu í̠na bolangua howa kego ani bu helowa mbirale mbira í̠ hangume mo tiga bulene wulebirago bulebere. 15 Anigo dunini timbuniore mbira ngago Anduane Homogo Daligaore kago ibugua í̠ hariga henene ngago mo walia ha lolene nga.

Mini gigabi ngego mo tale bulene ngago ogo

16 Biabe mbira bule ngego bame bupe nahabe. Baya hangu manda ala buwa bi lolene nga. 17 Wali agalinaga miniha howa irane maria tagira ibaga mbirago bayale bulene mendego ko bulene 18 tebonego homolenenaga manego holenenaga. Ai hege ibugua irane maria uruni haru hagane ka.

19 Wali agali maru mini bayaleru wu howa mendeali kago baya hangu lawai hagago ainde tininaga biabe bayale bibe nahe haga. 20 Wali agali maru bi bayaleru lalu holebirago garime tini homa handalu wiaga. Ani birago hondowa wali agalime tinaga bi larago hale holene manga haga. 21 Wali agali uruninaga mini ngago Anduane Homogohanda mini ndo wu howa tinaga bi laragoha lini bayale mbira tagira naibaga. 22 Wali agali maru mandabi kagome tini biamogo bialu howa bi bayale dege laga ka. 23 Wali agali maru ti mandabi howa tigua wali agali maru biamogo biaga. Wali agali ogoni ale kagonaga mana bayale ngagome lini bayale tagira piagane nga. 24 Wali agali maru kagome wali agali mini gigabiwi uruninaga mini yaraga hagane nga. Wali agali mandabi kagome ibu ngola halu howa tigua lalu, Í̠ bolangua heneore kegoni, laga ka. 25 Wali agali dindini lu haabo nahaga nga ndobe. 26 Anigo wali agali maru karume tinaga manda bayale biago mo galone ho kagome tinaga mini ereba nahe wiaho wiaabo haga.

Tomo dewaore nolene nawigo ogo

27 Waneigini-o mana í̠na bialu kego baya hangu handaya ho holene nga. Ani bialu deme baya hangu hondolene nga. Mbirale mbira í̠ni mo ko holene ngago mo yulene nawi. 28 Wali agali bibahendenaga hame mbiraoregobi ndo nga. Anidagua ngagome mbirale tara tara ngago wali agali mbiraoreli ibu hangu karulape ndo nga. 29 Tomo dendebiore ngago miniha bolangua timbuni ho biruwa dewaore nagimbu bulene nawigo 30 irane tomo dewaore nariyagua í̠naga tiniha mo ko halu mini burugu lalu magu taguadai bulebere. 31 Wali agali dewaore homenego irane tomo dewaore nalu hearia homene. Anigo wali agali tomo nolene karulape ngadagua nalu heagua nde ti bayale howa lu dindini holebira.

Copyright information for `HUI