a39.17Har 14.21-22, Yos 3.16

Sir 39

Mana lo ngago manda biaihe kago ibu duniniore ka lenego ogo

Wali agali biabe erekuibi hongo howaore bialu Anduane Homogo Daligaore kagonaga bi mana lo wini ngago baya hangu lo manda bialu kago ti wali agali maru karu ale ndo mendeale ka. Tigua manda bayale mamaliru tigua wu henedaru hondowa manda bialu mbiwia halu bi lo winidaru baya hangu ogoaleore leneda lalu handalu holebira. Tigua agali haguaneme bi latagi hayaru manda bu halu bi yobage lalu layarunaga galone manda biai halu biaga ka. Bi mbiwia halu layarunaga galone baya hangu taya buwa hondo manda biai halu bi yobage lalu layarunaga irane baya hangu manda biai holebira. Tigua agali haguane karu baba biabe mandagi bialu howa ai wali agali tigua handalu karia ti kini heba mandagi bedaria hondolebira. Tigua dindi tara tara ngaruha ibaga biai halu wali agali mo ko hagane agilemedabe handalu wali agali biamogo biagane agilemedabe hondo manda bulenaga handama ibaga biai holebira. Tigua egerebagiore abale heyalu Anduane Homogo tinaga Abaore kagohondo bi ala lolebira. Tigua Anduane Homogohondo bi lalu tinaga ko ngaru mo wahai habe lalu bi lolebira. Ani laragola Anduane Homogohanda tinaga bi larago hale hayagua manda bayale bulenenaga dinini kago tiha ho to̱laragola wali agali uruni tigua mini gigabi wulene bayale ngaru tigua latagi halu holebira. Ani bialu tigua Anduane Homogohondo bi laragome Anduane Homogo ka̱i̱ lolebira. Ani bialu tigua wali agali bu karu tinaga mini gigabi ngagomebi manda bayale bidagomebi ti bayale helo mo tiga buwa haru bamba halu Anduane Homogonaga bi do ho wini ngaru bigi bege lalu handa walia hagane ka. Tigua manda bayale tíni lo manda bu yayago mo walia halubi tigua Anduane Homogonaga bi mana lo wini ngagobi habo nalolene bi lo wini ngagohondobi ti turu ho hagane ka. Wali agali maru bu karume tinaga manda bayale ogobi wini lowa te lalu howa ti embeda nahe manda biaabo holebira. Ani bialu wali agali abogo hene lalu tinaga mini ereba nahe wiaabo holebira. 10 Wali agali dewaoreme tinaga manda binigonaga te dewa lolebira. Ani bialu wali agali dewa ngoaiho bedagoria ti mo turu halu bi ngaru lolebira. 11 Ainde wali agali uruni ale karu ti dindini lu hayagua nde tinaga mini timbuni halu tigua wali agali maru abale henedaru bolangua hene holebira. Ani howa ti homayagua nde tinaga mini timbuni mini lene howa homarago karulape dege holebira.

Biabe Anduane Homogohanda biaga ngago damene bayale dege ngago ogo

12 Mbirale bulene ngago i̱na manda biai ko. Heneneore larogo ege bayaleore do mbara laraligobi mini bayale wulene tara tara i̱ha wu to̱latagi ko. 13 I̱naga waneigini bayaleru-o baya hangu hale hadaba. Iba angeni yari biagane bayaleoreru dedaligobi tíore bayale andaho hai halimu. 14 Tíha nga baya taraore bulene gabitugu ale howa mabuha yari bulene bayale hangaradagua bilimu. Tínaga nga baya taraore buleneme dindiha piai halu to̱lai helalimu. Tínaga biabe bialu kemigo bibahende bialu howa turu holene iba ganaru lalu Anduane Homogonaga mini mo yaraga halu halimu. 15 Tígua ibunaga mini timbuniore mini lene helalu ibuhondo turu halu hongo howa huaro lalu halimu. Ngita tara tara ngaru bowa iba ganaru lalu ibuhondo ka̱i̱ ogodagua lalimu.

16 Anduane Homogohanda mbirale bibahende karubi ngarubi wabiai henego bibahende bayale nga. Ani bialu mbirale mbira ibilo ibu hame lo kago ogoangi ibilo lalu horo ibunime pongo winidangi tagira ibulebira. Ogoni agiledabe lalu wali agalime hale holene nawiore. Mani howa mbirale bibahende panaga handai hene ibu wiai holebira. Ani ibu ngagola bi hale ho wirigonaga ladai biradagua ogoni hondolebere.

17 Bamba Anduane Homogohanda bi layagola iba ema bialu nape wini. Ibugua bi layagola ibame gana nene haradagua mende mendehala haga haga bu hene. a 

18 Mbirale mbira Anduane Homogo ibu hame layagua ogoni íbu wia dege bulebira. Wali agali bayale helonaga mo bayale holebira. Mo waholene mbirali naheore.

19 Wali agali tigua biagane ngaru Anduane Homogo ibu hondowa kagola ibunaga deni wia do holene ale mbira nawiore.

20 Heneneore bibahendengi Anduane Homogo ibu bibahendeore manda biaihe haabo howa ibu manda nabini gahange mbira nawiore.

21 Wali agali tigua lalu, Mbirale ogo agiledabe nalolebirago irane Anduane Homogohanda wabu wini ngago damene bibahende tinaga biabe wiai ka.

22 Anduane Homogonaga mo turu halu mo gumbila holene timbuniore iba li timbuni dindi ko iba dalu naibaga ngagoha peagagobi nga ndobe.

23 Anigo bamba iba bayale nagane bereago mo kaubia henedagua ibunaga miniha tandaga holene timbuniore wali agali ibuni manda nabiaga bu karu ti kagoha odope holebira.

24 Wali agali tigabi bayale bu kagoha Anduane Homogo ibunaga hariga bayale dege wiai ho ka. Anigo wali agali mana ko biaga karu ti polene hariga ngagoha gundu uli dewaore nga.

25 Bibahendengi Anduane Homogohanda wali agali bayale tigabi karu tihondo mbirale bayale ngaru mialu haabo halu wali agali mana ko biaga bu karu tihondo mbirale ko ngago mo miaga ka.

26 Wali agali ti wu holene ngago ibabi ira delolenebi aeanebi ibibi nogo andubi mone tara mbiranaga ibane gerebi ibane waini ibabi olibe lini ibame wabini welibi tomo nolenebi aga karu lo holenebi bibahende wiai howa holene nga.

27 Mbirale urunime wali agali tigabi bu karu biamogo biaga nga. Anigo wali agali mana ko biaga bu karu tinaga mbirale urunialego ko galone nabiagane ale mbira buhinaga.

28 Anduane Homogohanda marungi puyabu hongohe ibilaga bialu ibunaga tandaga holene ngelo kago wali agalihondo mo walia halu ibilaga bini. Ainde mbirale bibahende homaiore kagola puyabume ibunaga hongo bibahende odope haragola Anduane Homogonaga miniha keba holene ngago ereba haiore holebira.

29 Dindi mo ko halu bo haealabagabu wahai holene maru wia dege bidago mbira ira dene mende dalu dindiguni heba ibalu tebone hina gari mane homa lagabiyaru ngagoni ndobe. 30 Ani bialu nogo gabua tara tara biango duduru laiono gabu karubi uruninaga ne gadele bu karubi puya ngarunaga ne kagobi tandagabi hayaga ko biru karubi wali agali mana ko biagaru dibaga ayu tibu nene gadele ngagobi

31 uruni ti bibahendeme Anduane Homogohanda bia lalu lamirago hale halu bule turu timbuni holebira. Ani bialu biabe bia larago bule abale manda manda bu holebira. Ai tigua biabe bialu howa Anduane Homogohanda bi larago mo wanahaga ka. 32 Heneneore ina mbirale uruni bibahende bamba howa i̱naga miniha mitangi dewa bu henego ai mbugani gilibu wero.

33 Anduane Homogonaga biabe bulene ngago bibahende bayale dege wialu mbirale ibugua ina ngiaga ngaru ibunime ngulene horo manda bu henedangiore ngiaga ka.

34 Í̠na mbirale bibahendeore ngaruni mbirago ko lolene nawigo ko nalabe. Horo mbira Anduane Homogohanda manda bu winigo tagira ibirangi bibahende bayale dege holebira.

35 Ai ayu tígua turu holenenaga iba ganaru lalu Anduane Homogonaga mini yaraga hadaba, lene.

Copyright information for `HUI