a42.9-11Sir 7.24-25, 26.10-12

Sir 42

Mana í̠ taga holene nawi ngago ogo

Ayu mbirale í̠ taga naholenebi wali agali mende kagome í̠naga mini ngego tigua mo tiga bialu helo yupe naholenebi ngago langiro.

Anduane Homogo Daligaore kagonaga bi mana lo wini ngagobi ibunaga habo nalolene bi lo wini ngagobi manga nahabe. Ani bialu mana í̠ damenerume bialu kago mo tale bulenebi wali agali dindi taraha howa íbu hene karume bialu kagobi baya hangu mo tale bulene ngagobi degedege mo tale bialu habe.

Í̠naga dano í̠ damene baba henego mo tiga bulene taga nahabe. Ani bialu í̠ abanaga paluni ngago í̠ damene bu karu tale bu mulene ngago taga nahe howa tale bulene nga.

Mbirale genda handagane bayale tigabi ngago yu howa genda baya hangu handalu emene timbuni yaguabi ta nabi yolo bia muni taguia bule taga nahe bibe.

Ai í̠naga biyinaya biabe bialu howa muni bolangua hene tigatiga mulene ngadagua mule gi nahabe. Ani bialu í̠ waneigini tibume minu bolenebi wali agali garabaya biabe ale bialu hagame mine haragola tibume minu bolenebi taga holene nawiore.

Í̠naga muni ngego í̠ one bedagome hondo page biagayagua nde í̠naga muni ngego mo do holene taga holene nawi. Wali agali í̠ anda kegoha uba andatagi bu hagayagua nde í̠naga mbirale ngeru baya hangu gedene howa mo do habe. Í̠na mbirale wali agalihondo miridago agira minidabe hondole daga lo hondolenebi í̠ mo yu anda ibini ogodaguada lalu tagira penego ogodaguada lalu mbugani gili bulene ngago taga holene nawi. Ani bialu wali agali manda dewa nawi lulu karu baya hangu lawai holenebi wali agali waheore bedaru ti mini nawi waneiginime bialu hagagobi bialu karu mo tiga bulenebi taga nahe howa biai habe. Heneneore larogo í̠na mana baya hangu talialu biriyagua nde wali agalime í̠ bayale biaga ka lolebira.

Abahanda ibu wane bedago mitangi holene ngago ogo

Wandari bedagome ibu aba mo genda haruda lo minime baya hangu manda nabulebira. Mbiraga ibu abahanda ibu wane bedagonaga genda ya halu ibu u baya hangu napale de ngalaho wiaabo haga kago ibu manda nabi beda. Wandari ibu emene dege bedangi ibu waneore bayale bialu agali polobadabe be agua bulubada. Ibu baya hangu biralu agali piyagua nde ibu agalinime baya hangu handaya ho holobadabe nde naholobada, lalu mitangi tangi bialu biraabo haga. a  10 Wandari ibu agali nape wene bedangi ibu wane bedago agali maru karume mo ko holino miniha genda ho hagane ka. Ai ibu agali nape tini andagaha biruwa waneigini aba ai̱yalame miniha genda yu haga ka. Ani bialu ibu agali pu bedagola waneigini naholigo lowa aba ibu giho haga.

11 Í̠ wane bedagome mine hayagua nde andagaha bo payanda ngelabe. Ibugua mine hama ibaga bialu kagome í̠ waitigi bu karume í̠hondo oba halu wali agali tanoha karubi í̠ daluha haga bu karubi tigua ngoai ho biragane ngagoria biruwa tigua í̠ bime lo ginibia halu mo yobia haragola wali agali dewa bu karunaga deni taga timbuni holene wuligo ainde í̠ wane baya hangu handaya ho habe. 12 Ibu wandari baya ibunaga dengui bayale bedago hondowa agali bu karume dimagoli holigo ibu bame ibaga bu helo yupe nahabe. Ani bialu wali maru agali one bedaru baba bi nagalone ngaru ta nabi loligo andaga berelo baya hangu handaya ho holene nga. 13 Ani larogoni irane hurume aga bayale ngago no budagabu wahagadagua walime wali mende bedago mo ko haga beda.

14 Agalime mine haga ngago ko nga. Anigo walime de dimagoli hayagua ko timbuniore nga ndobe. Ibugua ogonidagua biragome í̠ mo taga halu í̠naga mini bayale kego mo ko hagane nga ndobe

Mbirale Ngode Datagaliwabehanda wabini bu ngaru bibahendeme ibuninaga mini timbuniore mini lene kago mo walia haga nga

(Be 42.15—43. 33)

Ngode Datagaliwabehanda mbirale bibahende wabinigome ibunaga mini yaraga holene nga lenego ogo

15 Ayu i̱na Anduane Homogohanda bini ngaru mitangi bu dai bialu i̱na de handarugo damene latagi holebero. Anduane Homogo ibunime bi lalu mbirale ibu ha layago hai hene.

16 Ni ibugua wá bibahendeha hame haga ka. Anidagua bialu ai Anduane Homogohanda mbirale bibahende karuhabi ngaruhabi ibuninaga hongobi ibunaga holenebi ho to̱latagi heleda.

17 Anduane Homogohanda ibunaga hongo timbuni dahuliyali bu karuhondo mia mini heaguabi tigua Anduane Homogonaga biabe timbuni bini ngaru latagi hai naholebira. Ani bidago irane Anduane Homogo Daligaore kagome mbirale bibahende uruni wabia halu bibahende dindiha ngarumebi dahuliya andagaha karumebi bayaleore wuwa ibuninaga mini dege yaraga helo wabini nga.

18 Ibugua iba solowara timbuni bedago andaneha ngaru baya hangu manda biai halu wali agalinaga bu miniha wiado karu baya hangu manda biai ka. Ibunaga deni mini wiado hene mbira nawiore. Anduane Homogo Daligaore kago ibugua bibahendeore manda biai ho howa ibugua mbirale horo tara tara tagira ibirangi biaga ngaru manda biahe kagome bibahendeore ibu hondo manda biai ka.

19 Anduane Homogohanda mbirale ala bambaore bini ngaru manda biai howa latagi halu mani bule ngarubi manda biai ho howa bibahende mo do ho ngaru mo panaho ngelai holebira.

20 Ibugua wali agalinaga mini ngaru manda biai ho kagome bi mbira ibu deni mo do hene nawulebira.

21 Biabe ibugua bini ngaru bayaleore wialu urunime ibunaga manda timbuni ngago mo walia ho nga. Ibuni dege haluhe haabo haga ka. Anduane Homogo ibu bolangua hene timbuniore kagola ibugua mbirale mbira mo yulenebi yupe holenebi mbirale mbira nawiore. Mbiralime ibu mbirale mbira lawai holene nakarulapeore ka.

22 Anduane Homogohanda bini ngaru bibahendeore bayale taraorebi monehebi manane ira hungu ale nga.

23 Mbirale uruni tigua tinaga biabe ngago bialu haga haga bialu haabo howa tigua Anduane Homogonaga mini ngago talialu haga nga.

24 Mbirale bibahende kira kira mandagi ibaga bu helonaga wabini.

25 Ani binigo ainde mbirale mbira ibuni hanguore holene nawabini. Mbira mbira tiniale dege dege kago bayale helo biamogo bigibigi biaga ka. Ainde mbiralime Anduane Homogohanda biabe bayale bialu hene ngago de hondowa handabe manga holene naheda lo manda bido.

Copyright information for `HUI