a49.1-32 Kin 22.1, 22.11-13, 23.3, 23,25
b49.6-7Yar 1.4-10, 39.8
c49.8-9Ese 1.3-15, 14-20
e49.11Esr 3.2, Hag 2.23
f49.12Hag 1.1, 1.12
g49.13Neh 6.15

Sir 49

Yosaia henego ogo

Yosaianaga mini lolene baya dendebiore. Dendebi bayaleore lalu ira hagua nga biaga delole agalime baya hangu manda manda bu wiagagobi halu mone ibane dendebiore wali agalime nagane ngagobi halu tomo tara dawa nalu tabage balu wali agalime ngita bayaru balu iba ganaru lagagobi hene. a  Wali agalime mini beregedelonaga ibugua mana bayale tigabi wiaru bialu howa ibugua mbirale dama mitangi bialu bi pupu wiaga bigiya bu wiaru bo pambulabaga bialu bo gialo wahai halu bini. Ibugua Anduane Homogonaga biabe bulenego dege mitangi bu hene. Wali agali tigua mana ko bule hongo halu piai hayagola ibuni hanguoreme Ngode Datagaliwabenaga mana ngago talialu hole hongohe hene.

Yaremaia henego ogo

Debidibi Hesegaiabi Yosaiabi tigua Anduane Homogohondo erembira nami bayale henego ainde kini maru henedarume mana ko dewaore wiadambi dambi bima irigi helene. Ani binidago irane tigua Anduane Homogo daligaore kagonaga bi mana wahayagome ani bini. Ani binigome Yuda wali agalinaga kini naheore hene. Hongo Yuda tinaga holenego wali agali tara tara hearuha piai halu tinaga mini daliga mini lene holenego dindi tara tarani wali agali bu hearu tiha piai hene. Anidagua biyagome dindi taraha hameigini tara tara palearume ibalu tanobi Anduane Homogonaga anda heagobi bibahende bo gialahole biai halu wali agali lenego mbira tano ogoniha munini bialu hariga pugu biagoria nape wini. Mbirale uruni bulebira lalu Yaremaiahanda mbiwia halu bi lo winigo ngola hene. b  Yaremaia ibu biabe ogoni bulene agali mbira helo lalu Anduane Homogohanda bamba ibu ai̱ya tombeha bereangi howa dabenegoyu ainde wali agalime Yaremaia mo ko halu haabo hene. Anduane Homogohanda Yaremaia ibu agali Anduane Homogonaga bi mana latagi halu mbiwia hagane helobi mbirale ko ngaru minu dugalu bo gialahole bialu mo ko hai helobi maninaga mo heya halu lone hongo aribia helobi Anduane Homogohanda ibu dabo helene.

Esegiele henego ogo

Esegiele ibugua degandaba mbira hendene. Ibugua handalu hearia Ngode Datagaliwabe ibuni kini biragane dagiani bereagola dahuliyaliru ibuni heba mandagi hearia hendene. c  Ibugua puyabu hongoheore wali agali waitigi bu hearuha piai helalu wali agali ibunaga bu heagoha yagi nabi bayale helene.
(49.9)Hobane ogoniha Girigi bi lalu gilibu wini bayale wále ndo gilibu wia.


Mbiwia haga agali homberia (12) henego ogo

10 Agali mbiwia haga homberiali (12) tinaga kuni ayu homaliha ngaru mani lone heyalu holene gahange karu lelo hame lowa Anduane Homogohondo tinaga bi laharo. Ani larogo irane tigua Yagaba hameigini mo hongo halu tinaga holene henge bayale mbira mani ibilonaga malia ho helo biamogo bialu hai haga hene.

Serubabele Yosuala henego ogo

11 Ainde iname aguaore bialu Serubabelenaga mini yaraga holene karulapeda. Ibuore Anduane Homogonaga giha yari baya taraore bida. e  12 Ani bialu Yosadaga igini Yosuabi nde ogonibi dege hene. Libu dindini heangi howa Anduane Homogonaga anda bayale mbira ibuninaga mini yaraga halu holenaga bia howa anda ogoniha yari baya tara tara wiaru mo wiai howa mo yaribia ho ngelene. f 

Nehemaia henego ogo

13 Wali agalime Nehemaianaga miniore embeda holene nawigo irane ibugua tano timbuni wiagonaga ege pabe gialahole bu wiaru lone arema bu dai bialu tanonaga wai pabe panga gialopaya bu wiaru lone wabu helai halu inanaga anda damene lone biai henegonaga iname ibu embeda holene nawiore. g 

Mamali ala heneru ogo

14 Anigo ainde dindini hene agali bu karu mbirame Inogo bolangua habe naheore hene. Ibu dindi ogo wahalu Anduane Homogohanda dahuliya andagaha haru pene. 15 Ani bialu Yoseba henego ai Yoseba ale agali mbira nahe. Ibu hamene bu hearu ibunime mo tiga buwa baya hangu haru halu ibu damene hearu mo hongo halu haga hene. Anidagua bialu henego manda bialu tigua ibunaga kuniru baya hanguore handaya ho howa yu ibaga bu hene. 16 Wali agalime Siemela Sedelanaga mini yaraga halu haga hene. Anigo mini daliga timbuniore mini lene howa mbirale ema bialu piaga maru ti dege dombeneha agali pigane henego Adama henegonaga mini timbuni daligaore yaraga holene nga.

Copyright information for `HUI