a7.21Har 21.2, Man 15.12-15
b7.27-28Har 20.12

Sir 7

Bayale holenenaga bi tara tara lo ngago ogo

Í̠ha mo ko holene ibuligo mana ko ngaru nabibe. Í̠na mana ko ngaru hondo wandialu habe. Anidagua biriyagua nde í̠ha pani nolene nawulebira. Waneigini-o mana ko ibu mabuha tomo hangarimagobi nga. Í̠na mabuha hengederia dewaore anda holigo handabe.

Í̠ timbuni haguane holiya biamogo bia lalu, Anduane Homogohondo bi lolene nawigo nalabe. Ani bialu kinihondo í̠naga mini yaraga hene holiya í̠ mini lene hela lalu hale nahabe. Í̠na Anduane Homogo bime ladebadebo bialu ibugua í̠ mana bayale bialu hagada lelo manda buwa bi nalabe. Ani bialu kini ibugua í̠ agali manda bayalewida lelonaga í̠na kini mohondo halu bi nalabe. Godi hale halu manani ngadagua mo tale biaga karu tinaga biabe bialu kago dimagoli nahabe. Í̠na bu aribia holene manda nabi howa wali agalime mana ko bini ngago baya hangu mo tiga nabibehe holigo ani nabibe. Í̠na agali haguane mbira godi lole ibirago hondowa í̠ni mogo laregola í̠ninaga mini mo ko holene wuligo í̠na biabe ogoni bule hame loleni nalabe. Wali agali í̠ni daluha bu karuhondo ko nabi halu wali agali deni lulu ale howa bulene ngago nabibe.

Mana ko halu mbira berego halu mende nabibe. Ko mbira mbira beregonaga yolo hangu hangu nga.

Í̠na lalu Ngode Datagaliwabe Daligaore kagome í̠naga mbirale bayale bame mulene bu ngoruni handape halu hondowa í̠na ibu mbirale loma bu merogo yamulebira nalabe.

10 Í̠naga mini mbiraore wulene hongohe wu kego heba howa Ngode Datagaliwabehondo bi lalu howa bibahendengi yagibano bu karu biamogo bulene ngago hondowa wahalu pu nabi.

11 Wali agali taga timbuniore ho kago hondowa ibuhondo oba holene nawigohondo oba nahabe. Wali agalinaga mini bope holenagabi mo yaraga holenagabi Ngode Datagaliwabe ibugua hangu biaga ka.

12 Í̠ hamene kago mo ko holenaga te ke̱ howa nale wahalu í̠naga damene kagohondobi anidagua dege nabibe. 13 Í̠na ke̱ holeni nahabe. Ke̱ holene mana ngagoha howa mbirale bayale mbira tagira naibaga.

14 Agali haguane ngoaiho bedagoria bi nagalone kudaga bi nalabe. Ani bialu Ngode Datagaliwabehondo bi nagalone ngago lu laabo nahabe.

15 Mabu biabe bulene erekuibi ngagola wahalu ibida napobe. Ai biabe ogoni Ngode Datagaliwabe Daligaore kago ibuguaore mo winigo nga.

16 Wali agali mana ko biaga karu baba mandagi holeni nahabe. Anduane Homogonaga miniha keba holene abale tagira ibaga ngago manda bialu habe.

17 Í̠ni mo dindiha howa holene nga. Ira denela ngoelame wali agali ko biaga karu nai holebirago manda bialu ani habe.

Í̠naga anda handaya ho holene mana ngago ogo

18 Ai muni hangu mule ínaga nenege wanahabe. Ani bialu dindini wini ngolo ngaru mulenaga í̠ni hameneore kago wanahabe.

19 Í̠ wali mbira manda bayalebi bedago taya bulene ngago irane wali bayaore bedago ibu dindini ngolo ngaru bibahende bolangua hene beda.

20 Wali agali í̠ andaga handaya ho haga bu karuhondo mo ko nahabe. Ani bialu í̠naga biabe ndelahe erekuibi ngaru bialu haga wali agali bu karuhondo mo ko nahabe.

21 Agali í̠naga biabe bia haga mbira biabe baya hangu biaga kago gubalini ho holene nga. Ani howa horo mbirungi ibuni andaga poa hayagua í̠na napobe lolene nawi. a 

22 Í̠ nogo bulumagaru hinu hegua nde baya hangu handaya ho holene nga. Ai nogo urunime í̠naga biyinaya berego biamogo biagayagua nde muni mia nabi helo wahabe.

23 Í̠ waneigini hayagua nde ti wene waneigini emene kaore biawi halu ogoningi howa dege bayale helo mo tiga bibe.

24 Í̠ waneru bereagua nde í̠na ti baya hangu mamage ho howa ti baame berelo wanahe hongo howa handaya ho habe. 25 Ai wandari mbirago agalime dabubilo miriyagua nde í̠naga biabe timbuni biaiore harigoni ndobe. Anigo í̠ wane agali manda bayalebi kago hondowa mibe.

26 Í̠ one gubalini ho keyagua nde wahalu pu nalabe. Anigo ibugua mini kira wu biruligo dege de hondo habe.

27 Í̠na hongo holene bibahendeme í̠ aba mitangi halu í̠ ai̱yahanda nde í̠ taba hanayangi tandaga gibiore nenego mitangi bibe. b  28 Aba ai̱yalame í̠ habelo holene ngini kego baya hangu mitangi bibe. Mbirale tigua í̠ ngiyago damene miadai bibe nahe kego manda bialu holene nga.

Ina Ngode Datagaliwabenaga mini yaraga halu biabe tara tara bulene ngago ogo

29 Í̠naga bu mini bibahende Anduane Homogo andaneha haabo howa agali ibunaga biabe bialu haga agali loma binigo mo miaga bu karuhondo mana bayale bulene ngadagua bialu halimu. 30 Í̠naga hongo holene ngego bibahendeme Ngode Datagaliwabe kago gubalini halu wali agali haru bamba haga kago baya hangu mitangi halu halimu. 31 Í̠na Anduane Homogo ibunihondo gi ho howa agali ibunaga biabe bia haga agali loma binigo mo miaga bu karunaga mini yaraga halu holene nga. Bulene nga lalu maname ledadagua bialu tǵua mbiraleru agali loma binigo mo miaga agali karu mo mialu bulene nga. Mbirale mulene uruni mabuha tomo hengedego pigane boga birarubi ko domolenenaga loma ngarubi nogo ega ge loma bu mulene ngarubi loma maru loma bia hene ngarubi loma marubi bu mulene nga.
(7.31)Bi maru tomo pigane boga birago bu loma bu mulene nga ledago mbuga mini Dagalene 18.11-18 nga. Ko domalenenaga loma ledago mbuga mini Loma Binigo Mo Miaganaga Biabe laga ngagonaga 5.5-6 nga. Nogo egarunaga ge loma bu mulene ledago Haru Tagira Penego 29.17 wialu Loma Binigo Mo Miaganaga Biabe 7.31, Mana Lowinigo Loyane 18.3 nga. Ani bialu loma maru ledago Loma Binigo Mo Miaganaga Biabe 2.1-16 uruniha wigi bidago leda nga.


32 Anduane Homogohanda í̠ mo bayale helo í̠na mbirale ngeru maru yagibano bu karu talebu migi bulene nga. 33 Wali agali homayaru mitangi ho howa wali agali nahome karu mo turu halu mbirale bame migi bulene nga. 34 Wali agali dara ho bedaru baba mandagi dara ho biralu dugu bialu bedaru baba dugu bialu birulene nga. 35 Ainde wali agali warago bo ngaru embeda nahe hondo polene nga. Í̠na ogonidagua biaga hariyagua wali agalime í̠ gubalini ho holebira. 36 Í̠ni mbirale bule manda bu wiridago ngelowa homolene ngago ala mitangi bibe. Anidagua beregola í̠na mana ko mbira nabi holebere.

Copyright information for `HUI