Sir 8

Bayale hole bulene mana maru ngago ogo

Wali agali mini lene karu baba hongo manda nabibe. ani bialu keria í̠ tinaga giha pilo yaholigo nabibe. Wali agali muni mbirale dewawi bu karu baba lai loleni nalabe. Tigua agali biyinaya dewawi karu yolo bu heledago nahende lalu keria í̠ bope holene wuligo nalabe. Ani larogo irane ngolome wali agali dewaore mo ko hai halu kini karunaga minibi mo talola haga nga. Wali agali bi nagalone laga karu baba lai nalabe. Ani lalu keria í̠ mbiralime gambe hale iraha delo bape haraligobi holigo nabibe laro. Wali agali mini nawi lulu karu baba bi tabirene holeni nahabe. Í̠naga mamali henedaru mege buligo tabirene nabe laro. Wali agali mana ko bulene ngago hondo wandialu heagua ogoni mege buleni nabibe. Ina bibahendeore bialu harimagonaga pani nolene ngadagua noleberemago baya hangu mitangi bu habe. Inabi nde mani wali agali wahe ayu biru ngarubi dege holeberemago ai wahe urunihondo mege nabibe. Ani bialu wali agali mbirago homayagua ogonihondo turu holeni nahabe. Ainde mani inabi homole dege kemago baya hangu mitangi bibe.

Agali manda timbuni bi karume te larago nagalone larabe toba holeni. Ani ndo. Tigua lawai harago baya hangu hale howa mo yai holene ngago irane tigua í̠ tigabi howa agali haguane tinaga biabe bulene ngago biamogo bia habelonaga lolebira. Agali wahe bedaru tigua te bamba tinaga mamali bu heneruha howa lawai hene ngago lalu birulebirago ainde í̠na tinaga te lalu bedago wahalu napobe. Ainde í̠na te anidagua lalu bedago baya hangu hale hariyagua nde í̠ha genda tara tara anda ibugu biraru ogoale ibiyida la dai bulene holebere.

10 Wali agali mana ko biaga bu karunaga bu mini dimagoli holene ira hungu ale hedope holeni nahabe. Ani bialu keria í̠nibi dolene wuligo nabibe laro. 11 Wali agalime í̠ mo keba howa bi laba lowa lalu heagua nde í̠na abale lungulope halu ladai buleni nabibe. Tigua bi í̠na tigabi larego mo beregedalu í̠ mo ko halu mo yobia holebirago nalabe laro. 12 Wali agalime hongo halu í̠ha dano dewaore holiya ngi larago hale halu muleni namibe. Anigo ainde dano helo miriyagua í̠naga muni pu ereba haragoniore ndobe. 13 Í̠na muni ngego emene dege ngelowa mbiralinaga dano henego abale nguliya lalu latagi holeni nahabe. Anigo nguliya lalu abale latagi hariyagua nde dano abaleore mibe. 14 Agali godi hale halu mo tale biaga kago godi laba lole haru poleni napobe. Irane ibunaga hongo tara ngagome ibunaga mini haru helowa bi lolebirago. 15 Wali agali mine haga bu karume í̠ genda dewa mo nguligo í̠ ti heba mandagi ibagabu holeni nahabe. Tigua mana ko tinime hame ledago bialu lulu ale howa biagadaru bialu kagola í̠ heba mandagi mo ko holene wuligo ti heba mandagi nahabe.

16 Wali agali keba haga kago baba gungu nabibe. Ani bialu agali ogoniale baba dindi ko wali agali nahaga ngagoha mba lalu napobe. Agali ogoniale kagome holene mo galone nahaga kago ndobe. Tigua dindi ko wali agali nahaga ogoniha howa í̠ bo waholebiyagua í̠ biamogo bulene mbirali ai kabe. 17 Wali agali lulu karu baba mandagi biruwa bi nalabe. Irane aginaga tigua bi wali agali bu kagoria lo paya bulebirago nalabe. 18 Mbirale do howa lolene ngago wali agali dindi taraha howa ibini bu karu hale helo lolene nawigo nalabe. Mani agi bulebirabi í̠ manda nabi kego nalabe. 19 Wali agali bu karume í̠ abogo keda lo manda nabi kago í̠naga mini ngego wali agali bu kagoria lama ibaga nabibe. Anidagua biriyagua í̠naga turu holene emene ngago mo waholobere.

Copyright information for `HUI