Song of Solomon 5

Igirime iba gana lalu ladai binigo ogo

I̱ one i̱naga yamali-o i̱ni mabuha íbu kogoni.
I̱na mbirale bayale ngabiru mo mogo bu ngelowa
mone ibane bayale dendebigobi nalu bedo.
I̱na nogo memenaga andu ibabiwaini ibabi na dege bialu bedogoni.

Wali marume iba gana lenego ogo

Libu yamali bayalego labo-o libugua ibabi hinabi nalu
no karula poragola haru lole nalibu.

Iba gana mane

Wandarime iba gana lenego ogo

Mbiraga i̱ paluwa miniha paliahondo nahe yange yange bu wiru.
I̱ yange yange bu wuwa dege emene paluwa emaga handalu hewaria
i̱ lawini biagome anda i̱ palewago haneni panga dugua lalu hearia handaru.

Igirime iba gana lenego ogo

I̱ lawini i̱naga yamali-o i̱ anda ibuliya panga duguabe.
Mbiraga pibiya ibiyagome i̱naga dengui damialu
mandani dimba beda, laya.

Wandarime iba gana ladai bialu lenego ogo

I̱na i̱ninaga aga golo waharugodago lone aginaga buliyabe.
I̱naga ge wayawaya bu waharugodago lone aginaga mo dodo heloliyabe.

I̱ lawini biagome anda pangani gime yani hayuago hale howa
i̱naga miniha dungu lalu turuore biya.
I̱na heyuwa panga dugua hole manda biru.
I̱naga gime anda panga duguagane heagoria yani harugola
sanda i̱naga gini heago para haya.
I̱na i̱ lawini anda ibilo panga duguarugoyu
ibu abale piyiyagola i̱na de handa nabi haru.
I̱na ibunaga bi hale hoa howa i̱naga miniha genda biya.
I̱na ibu hai biaabo howa handa walia nahe dege haru.
I̱na ibu olarugoyu ibugua ladai binigo i̱ hale nahe dege haru.

Tano pabe mamage haga agalirume i̱ handa walia howa
tigua i̱ bo mberaho wahalu
i̱ dagarenaga biagane aga biwago ti golo yalu piya.
Yarusaleme waliru-o tígua i̱ yamali handa walia harimiyagua
i̱ hame lowa gubalini dugupe ho kogo lamilimu.
Tígua bi ogoni lamuleberema lalu i̱hondo bi lo widaba.
Bi uruni emaga andaha howa ani lalu haruya.

Walirume iba gana lenego ogo

Í̠ wandari maru bedaru bolangua howa í̠ hulu wandari bayaore bedegoni.
Í̠ yamali ogoni ibu agali abibe.
Ibu ina wali maru bedemaru agalini karu bolanguahe kagola iname bi lo wuluma̱yabe.

Wandarime iba gana lenego ogo

10 I̱naga yamali ibu tingini hongoheore baya dombarale ka.
Agali daosini pira (10,000) dewaore bu karunaga dengui baba bitago naheore kagoni.
11 Ibunaga dengui ngolo ale ngiringarale.
Ibunaga mandari mindibi bayaleore ega mindi mbiranaga iri mbauleya.
12 Ibunaga de baya pewele ega gabiago iba angeni wayawaya bini bedaligobiya.
13 Mabuha mbirale bayale ngabiru bu hagadagua
ibunaga peiri heago bayaleoreya.
Ibunaga ne hamburu palawaya bayaleore dedagobi howa
bi larago bayale ngabi sanda ale laga.
14 Ibunaga giru bayaleore hongohe howa
ibunaga gi hondoneru mo yári bia halu gi magi muni timbunime miagaru ibu gini nga.
Ibunaga tingini wála honeore howa ngiringara lalu heore.
Nogo dongone ege to̱le̱ mindibi muni timbunirume miagago aleme yáribi hea.
15 Ibunaga ge biagolabo to̱le̱ pele bayale kirame gene wawa helene mbaulebi
ngolome wabu helene peleorego aleda.
Ibu timbuniore Lebanono hariha ira tamia bayaleore lu timbuni hearubi kagoni.
16 Ibugua i̱ nu̱nu̱ laragola i̱naga bu bamialu turu bialu dungu laga.
Ibunaga tingini bibahendego baya gibiore ka.
Yarusaleme waliru-o i̱naga yamali larugoni ibu ogonibiore ka.
Copyright information for `HUI