Song of Solomon 7

Igirime iba gana lalu ladai binigo ogo

I̱naga yamali í̠ wandari baya buruguleoreda.
Í̠naga geni gesu bidegola paliaore biarua.
Í̠naga ge bagu bayaleore agali bigiya wabiagame to̱le̱ podalu wabiade hene mbauleoreda.
Iba be mbira amu ngagowaini iba dendebi biraho wiagane ale nga.
Palawaya bayale ngabiru do mabu bidagoria widi mberene amu do huba bu nga.
Í̠naga andu kira keru labo nogo dia igini labo laboli hono wini ogobi labolabo daburabuho kagobida.
Í̠naga ma kego anda lu mbira pele bima iraga kagobida.
Í̠naga de Hesebono tano ogoninaga to̱le̱ panga haraba kawareni uliha iba bedagobida.
Í̠naga ngui bayaore Lebanono agali mamage hagarunaga anda lu bima irigi hene Damasagasa tanohayagi heagonibida.
Í̠naga haguane Hari Kamele kagobida.
Í̠naga mandari baya taraore pingi pongo bideru didoleda.
Mandari gogorali elepebe bidago hondowa kini kagome hame lowa odope habeheda.

Hulu wandari baya taraore í̠ bedegoni.
Í̠na i̱ mo turuore harigola i̱na í̠ gubaliniore ho haruli.
Í̠ore hulu wandari ndo gurulu gibi bibi ayage aleda.
Í̠naga andu kego labo geromi lini aleda.
I̱na iraga howa geromi lini dedago dolebero.
I̱na handalu hewaria í̠naga andu kego labo pu mbira miinigerebi lini dewa dowi kagobiya.
Í̠na buhe̱ larigo ngabi dendebi ira lini mini abelo aleya.
Í̠naga ne hambu ngabiore waini iba aleda.
Í̠na i̱ nu̱nu̱ laregola waini iba dende biagadaguaore biarua.

Wandarigome iba gana lenego ogo

I̱naga yamali-o i̱na í̠hondo waini iba ngulebero.
Waini iba ogoni alego nolene bayale holebira.
10 I̱ ibunaga lawini bedogo ibugua i̱ gubalini haabo haga kagoni.
11 I̱naga yamali bubi-o iya dindi emene mbira anda bu karuha
palu hama mbaliya i̱ porodagua mba íbu.
12 Egerebagiore iya heyalu puwa gerebi ira bu karu de hondo mbaliya.
Gerebi ira uruni mabialu pabua balu yigiyaga ledabe handabiya.
Ira lini mini pomegaranade bayale daga bu karume lini dole pabua bayadabe hondo mbaliya.
Iya mabu ogoniha pu howa i̱na í̠ gubaliniore kodagua walia holiya.
I̱ lawini-o i̱na ira lini bayale bayaleru do yalu ibuwa
í̠ nabelo panga haraba kawareni ngeledo.
Maru ala do yinigo ngelalu maru áyu dege do yinigo ngelalu bido.
Iyame pu kuabu ale iyanaga bu mo heya hagane karubi ngabia handaba.
13 

Copyright information for `HUI