a1.2Lm 16.25, Kl 1.27, 2 Ti 1.1, 1.9, 1 Pi 1.20
b1.3Eb 1.9-10, 1 Te 2.4, 1 Ti 1.1, 1.11, 2.3, 2 Ti 1.10, Ta 2.10, 3.4
c1.4Lm 1.7, 2 Ko 8.23, Ga 2.3, 2 Ti 1.2, 4.10
d1.62 Ti 2.24-26
e1.6-91 Ti 3.2-7
f1.7LBM 10.9, 1 Ko 4.1, Eb 5.18, 1 Pi 5.2
g1.91 Ti 1.10, 1.15, 2 Ti 1.13, 2.15, 4.3, Ta 2.1
h1.101 Ti 1.6, 4.7
i1.11Md 23.14, Yo 10.12, 1 Ti 6.5, 2 Ti 3.6, 1 Pi 5.2
j1.132 Ti 4.2, Ta 2.2
k1.141 Ti 4.7, 2 Ti 4.4
l1.15Md 15.11, Lg 11.39-41, Lm 14.14, 14.20, 14.23, 1 Ko 6.12
m1.16Lm 1.28, 2 Ti 3.5, 3.8, 1 Yo 1.6, 2.4, Yu 4

Titus 1

Polohanda Taidasahondo beba ogo gilibu wia hene

I̱ Polo Ngode Datagaliwabenaga biabe biahagabi Yasu Kerisonagaabosolobi kogoni. Wali agali Ngode Datagaliwabehanda dabayaru ti ibuhondo mini bilina ho haabo helobi bi mana henene yu tiga biai helobi i̱na ti biamogo buliya ibugua i̱ dabo helaya. Haabo holene yule mini dunubia ho holene tene mana henene ngagoria nga. Haabo holene ogoni Ngode Datagaliwabe ibu mini bilinahe howa bibahende nawabi heangi, Ngulebero, lalu heneneore lowini. a  Ngode Datagaliwabehanda horo mbiru pongo bo winigo lola hayagola holene ogoni ibunaga bi mana langialu inahondo mo pani haya. Inanaga Pele Ngiaga Ngode Datagaliwabe ibugua bi mana i̱na wali agalihondo lamuliyanaga biabe ogoni i̱hondo ngiya. b 

Ngode Datagaliwabehondo mini mbiraore wu harabaligo manda buwa Taidasa-o i̱ igini henene kego i̱hondo beba ogo gilibu wia haro. c 

Aba Ngode Datagaliwabebi Pele Ngiaga Keriso Yasubi libugua í̠hondo biamogo bia holenebi mo palia holenebi ngilo hamelo ko.

Kiridini howa Taidasanaga biabe bulene winigo ogo

Biabe biai nahe bulene maru wiago biai habelo i̱na í̠ Kiridi dindini habe lalu piru. Í̠na bialu habe larugo ogo. Tano bibahendeha Keriso hameigini karu haru heloagali ala hene miniwi karu mbira mbira dabo helabe, laru. Agali ala hene miniwi uruni ti kagua nabiagamebi one mbira hangu beremebi tinaga waneiginime Keriso mana yu tiga biaga howa kagua nabi aba ai̱yalanaga bi larago hale hagamebi agali ogonibigo helolene nga, laru. d, e  Agali Ngode Datagaliwabenaga wali agali haru holebirago mana tiga tiga biagago hangume haru helo dabo helabe. Ti mine nahagabi abale keba nahagabi lulu yulewaini iba timbuni nanagabi gungu nabiagabi muni dibaudu nahagabi helolene nga. f  Tigua wali agali nenege hinagabi bayale bibahende ngago bulene hame lagabi mini haru hagabi mini tigabiwibi Ngode Datagaliwabehondo tini loma bia henebi tinginime hame lagaru bibahende haru hai hagamebi holene nga. Tigua bi mana heneneore lameramaligoni hangu hongo howa yu holene nga. Ogonibi howa tigua bi mana henene bayuwa lawai haragome wali agalinaga mini mo hongo halubi maru bi mana hame nalaga karu ti nakarulape harimadane hendelo walia halubi holebira. g 

Kiridi dindini ke̱ haga agali dewa ka, lenego ogo

10 Agali dewa mana henenego yu tiga nabiaga howa tigua bi nahabane ale la gimbu bialu wali agali mo hondo halu ka. Ogoni Yualidongone podo mabu biaga karume ani biaga ka. h  11 Tigua muni dimagoli howa mana ko nakarulape ngaru hangu lawai halu damene dewa bu karu mo gura hangu hangu helo mini burugula halu ka. Agali urunibime bi larago nalalimu lolene nga. i  12 Bamba Kiridiali mbira tininaga manalatagi halu mbiwia haga henegome lalu, Kiridiali ke̱ hagabi nogo gabua ale ko hagabi tomo timbuni nagimbu buwa biabe manga hagabi ka, lene. 13 Ibugua bi ogoni lenego heneneore lene. Irane ogonigo ti Ngode Datagaliwabe mana hangu yu tiga biaabo helo í̠na ti hongo howa talialu lamibe. j  14 Yualinaga mamali tebi agali degeme mana wabu wini ngarubi ti wahai helo ani talibe. Agali urunime mana henene ngaru hame nale wahai halu mana nakarulape ogoni lawai hagane tene ti ka. k  15 Mini tigabiwi karume mbirale bibahende ngago tigabi dege mitangi biaga ka. Anigo Yasuhondo mini mbiraore nawi karume bibahende ngago ko dege mitangi biaga ka. Tinaga minibi mandabi ko hai hene ka. l  16 Tigua bi degeme lalu, Ina Ngode Datagaliwabe mana manda biaihe kama, lagago tigua mana bia tagi haragome, Ina Ngode Datagaliwabe mana manda nabi kama, lalu walia haga. Tigua wali agalihondo handabe manga hagabi mana tigabi bibahende ngaru wahagabi ogonibi howa ti bayale mbira nabibehe holebira. m 

Copyright information for `HUI