a3.1Lm 13.1-7, Kl 1.10, Hi 13.21, 1 Pi 2.13-14
b3.2Eb 4.2, 4.31, Pb 4.5, Kl 3.12, 2 Ti 2.24-25
c3.31 Ko 6.11, Eb 2.1-2, 5.8, Kl 1.21, 1 Pi 4.3
d3.41 Ti 2.3, Ta 1.3, 2.11
e3.5Yo 3.3-5, Lm 11.6, Eb 5.26, 2 Ti 1.9, 1 Pi 3.21
f3.6Yol 2.28, Ab 2.17-18, 2.33, Lm 5.5
g3.7Lm 3.24, 8.23-24, Ga 2.16, Ta 2.11
h3.81 Ti 1.14-15, Ta 2.14
i3.91 Ti 1.4, 2 Ti 2.14-16, 2.23, Ta 1.14
j3.10Md 18.15-17, 2 Ko 13.2, 2 Te 3.6, 3.14, 2 Ti 3.5, 2 Yo 10
k3.11Ab 13.46, 1 Ti 6.3-5
l3.12Ab 20.4, Eb 6.21-22, Kl 4.7-8, 2 Ti 4.12
m3.13Ab 18.24, 1 Ko 3.5-6, 16.12
n3.14Md 7.19, Lm 15.28, Eb 4.28, Pb 1.11, Kl 1.10, Ta 2.14

Titus 3

Mana bayale bule hongo ho holene ngago ogo

Keriso hameigini í̠ aria karu lone mo mitangi bia halu í̠na tihondo ogodagua lamibe. Tigua gabumane haru haga hongohe karume mana lo ngadagua bilobi mana bayale bibahende bulene manda bu helobi lamibe. a  Tihondo agua lamibe, Mbiraligo guraga nabilimu. Bi gungu nabi howa mo palia halubi nenege hinalubi wali agali bibahendehondo gedaore howa bayale bialubi holene nga, lalu lamibe. b  Au lamibe, Ala iname mini nawi howa mana pugualubi ko bialu tinginime hame lagane ko tara tara dewa wiarume dariba hayagola harima. Ani bialu howa iname wali agalihondo ko mitangi bialubi nayido agini henge lalubi harima. Wali agali marume inahondo handabe manga hayagola iname nde tihondo handabe manga ho harima. c  Ani bialu hemagola dege ina Pele Ngiaga Ngode Datagaliwabehanda ibunaga biamogo bia holenebi gubalini holenebi inahondo walia halu pele ngiya. d  Ibugua ina pele ngiyago irane iname biabe bayale mbira birimagonaga ndo ibunaga dara holene wiagome ina pele ngiya. Ngode Datagaliwabe Dinini ibugua ina wayawaya bialu mini gahenge taba hanalu holene gahengebi ngiya. e  Ngode Datagaliwabehanda Pele Ngiaga Yasu Keriso togoni howa ibu Dinini inaha to̱lai helo ngiya. f  Ani biyago irane Ngode Datagaliwabe ibugua Kerisonaga biamogo bia holeneme inahondo, Tí mini tigabiwi kami, laragola ina minime dunubia ho howa haabo holene yu hole kama. g  Bi ogoni heneneore lo nga. h 

Ngode Datagaliwabehondo mini mbiraorewi karume biabe bayale biaabo helo í̠na mana ogoni hongo howa lamialu haabo habelo hamelo ko. Biabe bayale ogonibi biragome wali agali bibahende biamogo bilonaga bulene nga.
Galone ndoni lai lolenebi mamali dewaru mini lo bila holenebi lai gungu bulenebiMana lowinigonaga bi gungu bulenebi urunibi galone nabulene lagago í̠na urunidagua lalu kagoria nahe wandialu habe. i  10 Mbiralime Keriso hameigini karu talebu ki bule bi nakarulape mbira layagua halu kibi lo tiga bialu lamibe. Lameregola ibu hale nahayagua wahalu tagira pu labe. j  11 Agali ogonibi ibugua kagua biragome ibuni miniha ko ngagobi walia haga. k 

Bi galone maru lamaro bialu lenego ogo

12 Ademasadabe be Tiyagasadabe hondowa i̱na mendealigo í̠ keria pu lagua. Libu mendealigo, Pu, laragola í̠na i̱ Nigobolisi tanoni koria ibuleore manda bibe. Ira yuni gilope howa dagare ibagane hororu birangi Nigobolisi tanoni holebero manda bu kogoni. l  13 Mana bayale mo wála halu lamiaga Senasa ibubi Abolosobi libu ibaga bialu polebira. Libu harigani pialu karia buru pale holigo í̠na libu biamogo bule manda buwa habe. m  14 Keriso hameigini ina aria habane nabulene nahelo horo bibahendeni biabe bayale hangu bialu wali agali maru buru pale karu henene biamogo bulene nga manda bilo lamibe. n 

15 Wali agali i̱ heba kamaru bibahendeme, Tí mitangi biaabo halu haramali, layiya lalu lamibe. Wali agali Ngode Datagaliwabe mana yu tiga bu karuhondo iname, Tí mitangi biaabo halu kamago, layiya lalu lamibe. Ngode Datagaliwabenaga biamogo bia holene tíha wiaaboboore wilo hamelo ko.

Copyright information for `HUI