a12.71 Pi 3.13
b12.8Sir 29.8-13
c12.9Min 11.4, Dan 4.27, Sir 3.30
d12.12Yob 33.23-24, Ab 10.4, Mo 8.3-4
e12.15Seg 4.10, Lg 1.19

Tob 12

Dahuliyali Labaelehanda Tobidi Tobaiasalahondo bi laminigo ogo

Ai tigua dabu bialu tomo nalu berenego nai howa Tobidihanda Tobaiasa olalu íbu lowa ibuhondo lalu, I̱ igini-o igiri í̠la hariga mba lalu piribigo ibu yolo mulenego embeda nahabe. Ani bialu mbirale marubi ibunaga yolo meregoria paga halu mulene karulape nga, lene.

Ani layagola Tobaiasahanda hale halu lalu, Aba-o i̱na yolo ogoni agira muliya hame ledebe. Ina mbirale inane yalu ibirimaru hanuni mo talebu ki howa mendehayagi ibu yolo buliya karulapeda. Ibugua i̱ haru hayagola i̱ bayale halu dai biru. Ibugua Gabaele andaga muni mo pialu yu daibu ngiya. Ibugua dege i̱ oneha dama heago waratagi halu í̠naga de mo bayale haya. Anidagua biyago ainde i̱na ibu yolo agira mibehebe, lene.

Tobidihanda ladai bialu lalu, Í̠na manda biridago tigabioredago. Ai mbirale ibunime mo yalu ibiyadago aria talebu ki howa halu mendego ibu mibe, lene.

Ai Tobaiasahanda Labaele olalu íbu lowa lalu, Mbirale i̱ biamogo bialu mo yalu ibiribago hanuni talebu ki howa halu mendego í̠ mo yabelo. Mbirale uruni í̠naga yolo mo yabelo. Ani bialu í̠ni andaga dai beregoha Ngode Datagaliwabehanda í̠ harigani baya hangu handaya ho helo laro, lene.

Ani layagola Labaele ibugua Tobidi Tobaiasala haru pubagi howa libuhondo lamialu lalu, Ai libugua Ngode Datagaliwabenaga mini yaraga halu ibuhondo iba ganaru lalu halibulo. Ibugua libuhondo biabe bayale biyaru wali agali hale helo latagi halu halibu, lalu lamini. Libugua anidagua berebigola wali agali bibahendeme Ngode Datagaliwabehanda biyadaru manda biai holebira. Libugua Ngode Datagaliwabenaga mini yaraga halu haabo halibu, lalu lene.

Heneneore mbira wali agalime kininaga mini wiado kago latagi habe nahe ka. Anigo dindi bibahendeha wali agali bu karume Ngode Datagaliwabehondo ka̱i̱ lalu ibunaga mini yaraga helo ibugua tihondo biabe timbuni biyaru latagi halu holene nga. a 

Mbirale ko ngagome í̠ warape nahelo í̠na mana bayale ngago hangu bialu haabo holene nga.

Ngode Datagaliwabehondo bi bayuwa lolenebi ibunaga hame ngago taluwa bialu holenebi wali agali yagibano karu baya hangu biamogo bulenebi mana uruni ngagome agali homogo mbirale dewawi howa mana ko ngaru hangu mo tene howa bialu haga karu bolangua hene nga. Mbirali yagibano kago muni miagagome mbirali ngolo dewaore ibu andaga mo ngoai howa haga kago bolangua hene ka. b  Mendeali kagohondo mbirale dewa talebu miaga kago ibuha homolene anda naibilo hagira bianda haga nga. Anidagua beregome í̠ha ko ngagobi domo wahai holebira. Wali agali bibahendeore yagibano biamogo biaga kago ibu bayale haga. c  10 Anigo maru mana ko bialu mana bayale ndo tara tara ngaru bialu haga kagome ibuniha ko holene haru anda ibaga nga.

11 I̱na libuhondo bi mbira aguadagua laro. Wali agalime kininaga mini wiado kago latagi habe nahe ka. Anigo iname Ngode Datagaliwabehanda biyaru dindi bibahendeha hale hayogo lelo latagi halu holene nga laru. Ai áyu i̱na mbirale mbira yado nahe libuhondo bi heneneorego langiai holebero. 12 Tobidi í̠nabi Sarahandabi Ngode Datagaliwabehondo bi laribigo i̱nime mo yalu Ngode Datagaliwabenaga wanakuihayagi pu haru. Ani bialu mende homayagola í̠na hora halu hariruni mbira mbiranaga bi dibudibu ogoale bialu ka lalu abaleore mo yalu pugu biruli. d  13 Horo ogoningi í̠na tomo nane wahalu agali homene biago hora hole pirigola Ngode Datagaliwabe ibunime i̱hondo í̠ bahondole pu layagola ibiru. 14 Anigo ai áyu ibugua i̱hondo í̠ lone mo bayale hole pu laya. Ani bialu dama í̠ aruni Saraha heagobi taliatagi halu bule pu laya. 15 Ai i̱ mini Labaele kogoni. I̱ dahuliyali karia Ngode Datagaliwabenaga wanakuiha haabo howa horo bibahendengi Ngode Datagaliwabenaga biabe bule manda manda bu haabo haga karu aria mbirago i̱ kogoni, lene. e 

16 Tobidi Tobaiasala libu bi ogoni hale howa libu mogo timbuni lalu libu dindini bulu palialu palipe hene. Libu gi timbuni howa duru lalu hene. 17 Anigo Labaelehanda libuhondo lalu, Libu gi nahalibu. Bayale holene ngago libu heba haabo helo. Libugua Ngode Datagaliwabenaga mini yaraga haga ngebigo wanahe haabo halibu. 18 Ngode Datagaliwabe ibuninaga hame leagome i̱ ti biamogo bule ibinigo kogoni. I̱ i̱ninaga hameme ibini ndo ko. Ai libu horo bibahendengi dindi ogoriani howa Ngode Datagaliwabehondo iba gana lalu ibuhondo ka̱i̱ laabo halu halibu. 19 Libugua handalu hebira i̱ tomo nara lo manda biribi. I̱ tomo nane bame nene tingi haru. 20 Horo bibahendengi libu dindini kebingi howa Ngode Datagaliwabenaga mini yaraga halu ibuhondo ka̱i̱ lalu haabo halibu. Ai áyu i̱ Ngode Datagaliwabe i̱ pu layago ibuni karia dai bero. Ai mbirale libuha biyaru bibahendenaga bi te gili bilibu, lene.

21 Ani lalu Labaelehanda libu helalu ibu pene. Ani piyagola Tobidi Tobaiasala libugua Labaele lone nahendene. Ani biyagola libugua Ngode Datagaliwabehondo iba gana lalu ibunaga mini yaraga hene. Ani bialu libugua Labaele libu heba howa biabe timbuniore libuhondo bialu hayagonaga Ngode Datagaliwabehondo ka̱i̱ timbuni lene.

22 

Tobidi ibu bayaleore henego ogo

(Be 13—14)

Copyright information for `HUI