a2.1Har 23.16
b2.5Dag 19.11-13
c2.6Amo 8.10
d2.10Mg 5.26
e2.13Man 22.1-3
f2.14Yob 2.9

Tob 2

Tobidi ibu damenerume tomo dewa dawa manda manda binigo ogo

Ani laya handala i̱ni andaga lone dai bialu i̱ one Anabi i̱ igini Tobaiasabi heba mandagi harima. Ani daibu hewagola horo timbuni mini Pendigosi layagola tigua i̱naga tomo timbuni dawa hene. a  I̱ biruwa handalu hewaria tomo tara tara dewaore wiane handaru. Ani hondowa i̱na Tobaiasahondo lamialu, Í̠na mbirali yagibanoore howa ibu ko nabiaga tigabiore mbira taya bialu haru halu ibule pu. Tomo ina haru mandagi nami̱ya haru halu dai bibe. I̱na libu ibalibulo hondo biragua.

Ninibani agali mbira homelo bo wahenego ogo

Tobaiasa ibu pu piyago ibugua abale ga̱ lama daibialu howa lalu, Aba aba-o ina damene mbira áyu ogoniore homelo bo wahaya. Tigua agali ogoni golowa homayagola ibunaga tingini magedi hamani bai heneya, lene. Anidagua layagola i̱ mogo timbuni lalu tomo emeneorebi mbira nane. I̱na heyalu abale puwa agali homene ogoninaga tingini anda emene mbira heagoha mo do haru. Ani mo do halu i̱ni Ngode Datagaliwabenaga deni dodo para nahe bayale holenaga ibaha wayawaya biru. Biai halu tomo nalu berewaria i̱naga bu miniha genda timbuni biya. Ani biyagola i̱ dugu bialu biruwa agali Anduane Homogonaga bi mana latagi haga Amosohanda b  wali agali Bedele tanoha hearuhondo mbiwia halu mani tagira ibulebiragonaga bi lowinigo mitangi biru. Amosohanda mbiwia halu lalu, I̱na Ngode Datagaliwabehondo bi lolene horo timbuni tagira ibirangi wali agali homenerunaga dara ho holene mo wia aribia helolebero. Tinaga turu holene horo ngemiru mo genda ho holene wia aribia helolebero lalu mbiwia ho wini. c  Alendo halu ni paliyagola i̱na puwa homali bialu agali biago mo hora haru. Anigo ainde agali i̱ andaga mandagi handa a̱i̱na̱i̱ hearume i̱ hondowa mege bialu lalu, Agali ogoni ibu mbirale ngaru lo manda nabiagabe tobaneda. Bamba ibugua agali homene tingini wiaru mo hora halu hearia tigua ibu bo wahole talima ibaga bialu hayagoni ndobe. Ai áyu ogoni dege bialu kagonida, laga bialu mege bialu hene.

Tobidinaga de ko henego ogo

Ainde i̱na agali homene mbira mo hora harugome i̱ni Ngode Datagaliwabenaga deni dodohe haru. Ani haruyagola horo ogoningi dege mbira i̱ni Ngode Datagaliwabenaga deni dodo nahe holenaga ibame wayawaya biru. Ani bialu mani tagira puwa anda hái heago kawareni mandaha paliru. Mbiraga ogoningi poboyogo timbuni biyagola i̱naga embone agame dambi nahe paliru. 10 Ega emene maru nde i̱ palirudagoriani anda hái daligahayagi biragayago i̱ manda nabi paliru. Ani palewaria ega biagome ti i̱naga deni tope hayagola mbirale pele mbirame i̱naga de pai haya. Ani biyagola i̱na anogoda heria biamogo bilo pialu hewaria tigua i̱naga de mo bayale nahaya. Ahiga ibugua mali kirani i̱ handaya ho henego ainde ibu dindi tara Elama dindiha hama piya. d 

Tobidi ibu onela lai lenego ogo

11 Ahiga ibu peaha i̱ one ibugua aga wali marume muni mule wabialu bedadagua dege wabialu berene. 12 Ibugua aga uruni wabiai halu yalu poragola agalime muni miaga hene. Horo mbirungi ibugua aga dewaore wabialu agali yolo bule wabibe layadago hearia wabu yalu piya. Ani yalu piyagola agali biagome aga tigatiga yolo bulene winidagua yolo bialu ibugua biabe bayale biyadagonaga mo turu halu nogo meme igini hongolo mbira bame minu miniya.

13 Ani biya handala i̱ one ibu andaga dai biyagola nogo meme igini mbira gu̱ layuane hale haru. I̱na bi hongo howa ladaga halu Ana ibuhondo hale halu lalu, Í̠ nogo meme ogoni agoha hearia haru ibiribe. Nogo meme ogoni page haru haribe. Ai nogo ogoni anduane karia haru dai bibe. Mbirale page binigo nolene nawiore ndobe, laru. e  14 Ani larugola Ana ibugua ladai bialu lalu, O ndo tigua i̱naga aga biago yolo muni karulape ngialu nogo ogoni i̱ mo turu halu bame minu ngiya, laya. Ani layagola i̱na Ana ibunaga bi ogoni mo henene nahe howa, Nogo ogoni yalu daiore bibe, laru. I̱na taga howa keba ha dege bialu i̱naga dengui darama biya. Ani bu hewagola Anahanda bi hongo howa i̱hondo lalu, Áyu í̠ agali ogobiore heneda lalu handarogoni. I̱na wali agali maru bu karu mitangi halu biamogo bulene manda bu hariligo ainde i̱ biamogo bulenego manda nabiore kegonida, laya. f 

Copyright information for `HUI