a10.1-2Pig 1.26-28
b10.3Pig 4.8-13
c10.4Pig 7.1—8.22
d10.5Pig 11.1-9, 12.1-3, 22.1-19
e10.6-9Pig 19.1-29
f10.10-12Pig 27.43, 28.10-22, 32.24-30
g10.13-14Pig 37.12-36, 39.1-23, 41.37-44
h10.15-21Har 1.1—15.21

Wis 10

Mini gigabi wuleneme Adama handaya ho henego ogo

Agali pigane Ngode Datagaliwabehanda wabu helayago ibu mini gigabime ibu haru hene. Ani bialu ibugua inanaga mamali ogoni ibu nde ibuni hangu heangi mini gigabi ibu libu haru mandagi hene. Ani howa Adama ibu koha pilayangi ibugua lone mo heya hene. a  Ani mo heya howa dindini ngarubi karubi bibahende Adama ibugua handaya ho howa haru hai helo ibuhondo hongo mini.

Keni ibu mini bayale talia nabinigo ogo

Anigo ainde agali ko mbira ona heneya. Ibu keba taraore haga mbira heneya. Ani howa ibugua mana bayalebi mini gigabi wulenebi talialu nabiaga heneya. Ibu ibunime mo ko heneya. Anidagua biaga howa ibu hamene heago homelo bo wahaya. b 

Mini gigabi wuleneme Noa haru henego ogo

Ko timbuni Keni ibugua binigome iba li timbunime dindi namu lai hene. Anigo mini gigabi ibugua dindi lone mo bayale hene. Ibugua agali mbira ibunaga iba sibiha bereaore ira tigini mbira ibame yu ibagabu haradagua bialu iba sibi ogoni ibame yu ibagabu heagola mini gigabi wulene ogonime baya hangu handaya ho hene. c 

Mini gigabi ibugua Abarahama biamogo bini lenego ogo

Ko tara tara wiagome wali agali bibahendeore mo ko hai heneore hai heagola ti lulu yu ibaga bialu heangi mini gigabi ibugua Abarahama mana tigabi wiago bialu haga heago hondowa ibu gubalini howa dabene. Abarahama ibugua ibu igini kago gubalini ho heaguabi harugo lowa ibuha ko mbira para nahe Ngode Datagaliwabenaga deni ko mbira ibuha para nahe bayale helonaga mini gigabi wulene ibugua Abarahama biamogo bini. d 

Mini gigabi wuleneme Lode biamogo binigo ogo

Lode ibu mana bayale tigabi wiago hangu biaabo haga heagola mini gigabi ibugua Lodela mandagi howa biamogo bialu henego irane Lode ibu wali agali ko biaga hearu heba mandagi nahomelo ani bini. Tano timbuni duria wiagoria ira dene hariha howa ibira hayagola Lode ibu ibida pene. e  Bamba howa hama ibinigo áyu kegoniha wali agali uruninaga mana ko binidago mo walia holene tara tara wiaabo kagoni ndobe. Dindi tinaga winidago áyu wiaabo kagoria dindiha kaba ngaruha ira haguaru datagi halu haabo ka. Ira lini do naganealerume lini da nde dagagoyu baya hangu boga bialu bayale nolene nadagaya. Ani bialu ege to̱le̱ timbuni ibi kui mbira kago ogoni ibu Lode one ibugua Ngode Datagaliwabehanda bi layago mini mbiraore nawiyagonaga manane henego ka. Wali agali tano timbuni duria uruniha haga bu henedaru tigua mini bayale gigabi wualene ogoni galone ndoda lowa mo nagalone ho hene. Ani heagome tinaga mini ndibulo wahene howa tiha mbirale bayale wiaru mbira wá naleore heneya. Ainde wali agalime mbirale tara tara irame dene ngaru de hondowa tigua wali agali urunime mana lehe bia ko halu henedaru mitangi budai bulebira. Ani bialu mana ko timbuniore wali agali tano timbuni duria uruniha hagadarume binidaruni embeda naholebira.

Mini gigabi Yagabala henego ogo

Mini gigabi ibugua wali agaliha ti mo ko holene mbira ibuligonaga ibugua hame ledago bialu helo biamogo biaga ka.

10 Yagaba ibu agali mana tigabi biaga howa ibu hameneme keba timbuniore haya handala ibu ibida pene. Mini gigabi wuleneme Yagaba mana tigabi bilo biamogo bini. Ibugua dahuliya andaga mo walia halu bini. Dahuliya andaga ogoni Ngode Datagaliwabe ibu andaga baya buruguleore ka. Mini gigabi wulene ibugua Yagabahondo mbirale Ngode Datagaliwabenaga ngago lawai haya. Ibu biabe bilo biamogo bini. Ani biamogo biyagola ibugua biabe bayale dewa bini. Ibugua biabe erekuibi bialu hayagome lini bayale maru dene. f  11 Agali tara maru hearume Yagabanaga mbirale wiaru dimagoli ho howa mo page bule manda bialu hearia mini gigabi wulene Yagabala haru mandagi haga heagome biamogo biyagola ibu mbirale bayale dewaore wia tago haga bini. 12 Yagaba waitigi kagome bolino mini gigabi ibugua Yagaba handaya ho hene. Waitigirume Yagaba hariga poragoha bo waholino ibugua baya hangu mamage haga hene. Mini gigabi ibugua Yagaba biamogo biyagola Yagabahanda mbiraga mbirangi Ngode Datagaliwabenaga dahuliyali mbirala gungu timbuni bialu Yagoba ibugua dahuliyali bope hene. Mbiraga dahuliyalila gungu timbuni biyadagoniha mini gigabi wulene ibugua Yagoba lawai henedago ogo. Mbirali Ngode Datagaliwabenaga hame ledago taluwa bialu haga kago ibu hongo timbuniore agali wai biaga pari wayali kagonaga hongo kago bolanguahe ka, lalu lawai hene.

Mini gigabi wulene ibugua Yosebe biamogo binigo ogo

13 Bamba agali tigabiore mbira mini Yosebe hene. Ibu baba hamene ho hearume ibu agali tara ibiyaru minu mialu yolo taguini. Ani binigoyu mini bayale gigabi ibugua Yosebe yu wa nahene. Ibugua Yosebehanda mana ko bulino Yosebela mandagi howa biamogo bialu hene. Tigua Yosebe garabaya andaha heleagolabi mini bayale gigabi ibu libu haru haabo hene. g  14 Ibugua Yosebe wahalu pu napeore. Nape libu haru howa ibugua Yosebe Iyibi dindiha gabumanenaga agali haguane helo mo helene. Ani bialu waitigi maru abale Yosebe bope halu hayaru Yosebehanda lone handaya ho howa haru helo hongo mini. Ibugua agali maru tigua bi ke̱ howa Yosebehanda ko biya laga hearu ke̱ henedalo panaga hendelo ibugua mo panaho ngelene. Ani bialu ibugua Yosebenaga mini timbuni mini lene wiaabo helo mo hela hene.

Mini gigabi ibugua Isaraele wali agali Iyibi dindi wahalu tagira pelo biamogo binigo ogo

15 Ngode Datagaliwabehanda Isaraele wali agali ibuninaga wali agaliore helo dabo helene. Ani heagola ainde Iyibi wali agali tigua Isaraele bope howa mo ko halu hearia mini bayale gigabi ibugua Isaraele haru dai bialu helene. h  16 Mini gigabi ibu agali Ngode Datagaliwabenaga biabe bia haga Mosese hearia dalialu ibini. Mini gigabi ibu agali kini ko hearunaga deni gi nahe hongo howa heyu hene. Ani hongo ho howa ibugua agalime nabiagane aleru dewa bialu hene. 17 Mini gigabi ibugua Ngode Datagaliwabenaga wali agali bu hearume biabe erekuibiore bialu heago hondowa yolo bayale tihondo mini. Tihondo ibugua hariga bayaleore mo walia hene. Horombe ibuni hari beraliba ale howa ti bu dambi ho haga hene. Mbiraga yakundi timbuni heagobi howa wá hadali halu ti hariga mo walia haga bialu hene. 18 Ani bialu ibugua tinaga hariga iba uli timbuni bereago hanuni bope hene. Ani bialu ibugua ti iba solowara mini Iba Daramabi bereago domaede halu pelo biamogo bini. 19 Ani bialu waitigi ibiyagola iba yaribu timbuni bialu li ibiyagome waitigi uruni bo namu lai hene. Ani biyagola waitigi agali biaru iba nalu homai helene. Ani bialu Iyibi waitigi uruninaga tingini ibame iba angeni yaragaho ngelama pene. 20 Wali agali bayale hearume wali agali ko biaga hearunaga mbirale dabudabu tara tara bayale wiaru ti karulai hene. Isaraele wali agali tigua Ngode Datagaliwabe í̠hondo í̠naga mini yaraga halu í̠hondo iba gana lalu haya. Ti bibahendeme í̠hondo turu howa iba gana lagimbu bialu lai haya. I̱naga hongome ti mo wialu pelarigonaga ani biya. 21 Ai mini gigabi bayale wulene ibugua wali agali bi nalaga bu hearunaga hége mo tiga bialu lone bi lelaya. Ani bialu waneigini galirume bi layaru mo beregedalu galone lene helaya.

Copyright information for `HUI