a18.1-4Har 13.17-22
b18.5Har 1.22—2.10, 12.29-30, 14.26-28
c18.20-25Dag 16.41-50

Wis 18

Wá holene timbunime Isaraele wali agali hariga mo walia henego ogo

Anigo í̠naga wali agali ira hungume hariga mo walia hariya. Í̠naga wali agalime bi layuago tinaga waitigime hale henego ainde deme nahendene. Í̠naga wali agali ti tandaga nane heago hondowa waitigi biaru ti dimagoli ho hene. a  Í̠naga wali agali tigua waitigi biarume ko bialu haga wiagonaga pani badai nabiyagonaga waitigi uruni tigua í̠naga wali agali ka̱i̱ lene. Ani bialu tigua í̠naga wali agali hale halu mana ko tigua bialu harimago mitangi nabilimu lene. Í̠naga wali agalihondo wáholene timbuniore mbira miriya. Ani bialu wá timbuni ogonime wali agali uruni ti hariga ala napene manda nabi wiagoha ibugua hariga mo walia haga bima bamba hayiya. Wá holene ogoni ibu ira hungu hongohe timbuni mbira binigo ogonime wali agali tini tingini da nabini. Anigo waitigi biaru ti heagoha wá nahende arumaha haabo hene. Ti arumanaga garabayaha haabo henego irane tigua í̠ waneigini abale garabaya helayagonaga helene. Ai í̠naga waneigini tigua í̠naga mana ngago wali agali bibahendehondo lamiai holebira. Mana ogoni ibu ani wiaabobo bialu wali agali tihondo wá holene hale miagane holebira.

Ngode Datagaliwabehanda Iyibi igini wahene bibahende bo wahai henego ogo

Tinaga waneigini bu karu bo wahai hami̱ya lalu waitigi bu hearu tigua bi lo wiya. Tigua waneigini mbira homelo lowa nu mbiraha honowa ibu homelo panaga mo panaho ngeleneya. Anigo igiri gali ogoni ibu homa nabi bayale winiya. Ani binigo manda bialu pani í̠na tinaga waneigini dewaore bo wahai hariya. Iba li timbuniore ibilalu wali agali ko uruni bo wahaiore hariya. b  Mbiraga ogoni horo mbiru tagira ibulebira lalu ina mamaliruhondo lamiriya. Í̠na tihondo lamialu lalu, Mbirale ogoale buleore, lalu bi lo werego bulubada lowa ti mini dunubia ho helobi ti hongo ho helobi lamiriya. Ainde í̠naga waitigiru bo wahai halu wali agali tigabi karu biamogo buleberego í̠naga wali agali ti manda bu howa mini mbiraore wu haya. Inanaga waitigi hearu homelo bo hilo wahai howa anidagua birigome inanaga mini mo yaraga halu ina í̠naga wali agaliore holoma̱ya dabo helariya.

Wali bayale igini tigabi hearu tigua ohalu wali agali nahaga ngagoha puwa í̠nihondo lomabu nginiya. Ai bibahendeme buleore lowa bi lo mbira halu tigua í̠naga mana lowini ngago baya hangu talialu bule lowa bi lo mbira halu í̠naga wali agali ti turu ho holene horongibi genda yu holene horongibi mo ngoai hami̱ya lalu bi lo winiya. Ani bialu tigua í̠naga mini yaraga halu inanaga mamalirume iba gana bamba lawai heneyago lalu hene. 10 Anigo ai tinaga waitigi biaru homo togo layago wali agali bibahende hale hai hene. Ai tinaga waneigini homayagonaga dara howa kiabu dugu timbuni bigibigi bialu hene. 11 Agali haguane bu hearu tibi nde genda tinaga biabe biahaga hearu yu heagobi dege mandagi yu hene. Ani bialu wali agali damene bu hearu waneigini homayadagua kini ibu igini mbiraore heagobi homa dege bini. 12 Anidagua bialu waneigini dewaore aba ai̱ya bibahendenaga waneigini homaiore hene. Abaleore aube tobane buwa aba ai̱ya tinaga waneigini gubaliniore haga hearu horo ogoningi dege homai heagola homa yu hora holene mbira nahene. 13 Bamba pigane howa wali agali uruni tigua tinaga agali maru halaga biaga gamugamu biagabi bu hearuhondo mini hana ho howa í̠naga bi mo wahaya. Ai mani ti igini wahene damene hearu homai hayagola tigua manda bialu í̠naga wali agali bu karu ti Ngode Datagaliwabe waneiginiore heneda lo handaya.

14 Giligele emene mbira naleore wiangi abaleore mbi timbulo mina hene. 15 Ani binigo í̠naga bi bibahende hongo haiheore howa í̠naga kini biragane dagia dahuliya andaga yu wahalu dalini. Dindi mbira í̠na mo ko hai hole birigoria dalini. Ibu mamage haga agali ale howa ibugua wali agali pani mule ibini. 16 Ibugua í̠naga hame leadagua tiga tigaore talialu í̠naga bi ayu tibu ne gadeleore ngaligobi hene. Ibu dindini heyu hene. Ibu agali luniore howa dahuliya andaga elaho hene. Ibugua mbirale bibahende wiaru bo wahai hayagola mbirale homayarunaga tinginime dindi bibahende to̱latagi haiore hene. 17 Anigo abaleore emaga kome wali agali mo talola halu gi timbuniore buleneme wali agali minai hene. 18 Bibahendeha wali agali dindini odope halu homo wiradagua bima pene. Ani bialu o biyadagoninaga tene ogoale biya lalu hene. Tigua manda bialu ti homolene nga lo manda binigo irane 19 tigua emaga ko hendenego ai emaga ogoniha mbirale biyarunaga galone mo manda bia hayagola ai ti homoligo irane aginaga tigua tandaga ogoni nalu harimada lo manda bini.

Aronohanda Ngode Datagaliwabehondo bi layagome Isaraele biamogo binigo ogo

20 Wali agali bayale tigabi bu hearubi dindi ko iba dalu naibaga wiagoha hemiria homaga biyagome tihabi nde homanaga genda anda íbu dege biya. Anigo í̠naga miniha keba ho holene lu wiaabo nahene. c  21 Agali mini tigabi mbira ibugua wali agalime olayagola biamogo bule abale heyini. Ibuni tinaga loma binigo mo miaga agali hene. Ani howa wali agalinaga minini howa ibugua tinaga í̠hondo bi tara tara layaru bibahende mo loma bialu í̠hondo ibilene. Ibugua ira hagua nga bilo í̠hondo lomabu delalu howa wali agalinaga ko ngaru domo wahabe lalu bi lene. Ibugua í̠naga miniha tandaga ho hearu gi nahe howa warago ko wiaru mo wahai halu ibuni í̠naga biabe bia haga agaliore henego mo walia haya. 22 Ibugua í̠naga miniha tandaga holene bolangua hayago ibuninaga hongome ndo. Ani bialu wai biagane aleme ndo bolangua haya. Ibugua í̠nihondo bi lolene hongome bolangua haya. Ibugua í̠hondo bi lalu, bamba ina mamaliruhondo bi hongo howa lo wirigobi habo nalolene bi lo wirigobi mitangi bibe, laya. 23 Wali agali dewaore homayarunaga tingini ona bu wiai heneya. Ani biyagola agali tigabi ogoni ibugua í̠naga wali agaliru biamogo bule ibiniya. Í̠naga miniha tandaga holene wigome wali agali homa nabi hearubi bo wahai habeheyane ibugua mo wahole ibiniya. 24 Ibugua aga luore mbira biagimbu bulene karulalu ibiniyago aga ogoniha mbira dahuliya andagaha ngaru manda bialubi dindi ngaru manda bialubi hai heleneyago ogoni karulalu ibiya. Ibunaga galu kunini mbira mbira ibu mamalirunaga mini lene henego manda bialu gilibu wima wabuni daligibigo ege to̱le̱ muni yolo timbunime miaga wiarume wabiniyago ogoni mo karuleneya. Ani bialu emboneni agali loma binigo mo miaga haguane kagonaga manda karu leneya. Manda ogoni í̠naga hongo timbuniore ngego manda bialu karulaga wini. 25 Wali agali homelo baga dahuliyali ibiyago ibugua mbirale uruni de hondowa ibu gi halu ogoriani handaya ho hene. Í̠naga wali agali ti í̠naga miniha tandaga holene ogoni emene dege handayago ogoni karulape dege.

Copyright information for `HUI